Kolɔs Kristo-yab 1

1Min Pɔl, Yendu yanbuam po i k n tie Yiesu Kristo sundu. Min n da kadaaɔg ne, min yen t ninja Timote. 2T fuond yinm t naataani nba tie Yendu niib g be Kolɔs g dug Kristo po yen i pal kul. T Baa Yendu ń yad yedŋanm i po, g te k i yam ń gii dua. 3Youg nba kul k t jaand g miɛd Yendu, wano nba tie t Yonmdaan Yiesu Kristo Baa, t tu tien’o balg i po, 4g dugn t gbad yin dug Yiesu Kristo po g biɛ bua yab nba tie u niib kul nand. 5Yin daan g Yendu bil bona g guun’i polu nyan po n te k i dug Kristo po g biɛ mɔg l buam. Ban muand’i Laabamann nba k l tie mamɔni nyan n te k i mɔg l dindann. 6L Laabamann n pund hal i buol nand nyan, l yad nnyan mɔ i ŋanduna n ninŋ kul. L suun tuonn g lebd niib binbem g saa liig nyan lan bo sun tuonn nand i siign ninŋ daal nba k i mɔ bo cind g gbad Yendu ŋalbalg maam, g bann g Yendu bua’i nyan. 7Epafras tund’i lann n nyan. Wano Epafras tie t dɔnn i g biɛ tie t tuonsunlua. Tin bo bu sun tuonn nba i buol nyan u suun lann n nyan. U tie Kristo tuonsunn nba dagd k yin gii dug u po i. 8Wano n maad’ti Yendu Fuom n te k i mɔg buam nba. 9L po n te, g hal daal nba k t mɔ gbad l laabaal, k t jaand youg kul g miɛd Yendu k wan te’i yanfuom yen banm nba nya Foŋanm buol, k i bann u yanbuam kul canyiin. 10Nnyan i k i bu fid gii be nyan Yonmdaan n bua nand, gii tie yal man u po youg kul, g suun tuonŋana kul, g band Yendu g pugd. 11T miɛd’o k wan pugn’i paalu, wano nba k u paalu g mɔg l liel, k yin fid gii mɔg mindl yen juunn bonn kul n ninŋ, 12g tien t Baa Yendu balg yen pamann. Wano n te k i bu fid g la yiɛl u buol gii be yinyiem n yen niib nba tie u yab. 13Bunbɔnn n bo mɔg paalu t po, k u fiel’ti g nyan’ti l n ninŋ g kuan’ti u Bija nba k u ŋanm g bua’ɔg nyan diem n ninŋ. 14U Bija po i k t la fielu, k u dii sugl t biid po. 15Kristo n tie Yendu nba k t g nyuan’o ninnaɔnŋ. U bo be g sua g siɛl daa g tag, wano n tie Yendu tagm kul Yudaan. 16K l maa Yendu bo te k wano n tag bonn kul, lann n tie bona nba kul be polu po yen bona nba kul be tinŋ po ne, tin nyuan yal nba kul yen tin g nyuan yal nba kul, polu po yudanm yen yonmdanm yen yikodanm yen paaludanm. Yendu te k u tag bonn kul k lan don wano Kristo sann i. 17Kristo bo be g sua g siɛl kul daa g be, wano n te g bonn kul sie l sinsienu n. 18Wano n tie u tintaanu kul yul, k l tintaanu tie gbannand. Wano n tie cilg, g tie yua nba bo kpiɛ g yied kpienm siign k wan gii be bonn kul liig. 19Yendu mɔno n bo bua g tug u munn kul g tien Kristo n ninŋ. 20Yendu yanbuam po i k u bo te g bona nba kul be tinŋ po ne yen yal l be polu po kul guan g manŋ yen’o g dugn Kristo po. U te g laafiɛ be tinm yen wano siign g dugn wano Kristo sɔm nba bo wul dapunpɔnn po nyan. 21Siɛnyoug, i maalm yen i tuonbiid bo te k i tie Yendu ninnanda, g fag yen’o, 22ama mɔlane nuan, u te k i guan g manŋ yen’o g dugn u Bija n te nifosaal g tuo g kpe nyan po. U tien nnyan, k yin fid g baal u buol g tie papiendanm i, g g mɔg siɛl yaa biid, g biɛ g mɔg ban bu jalg’i yal nba po. 23Ama l bual k yin ŋanm gii diɛ i dindann i gii sie k l paa, g daa fagd yen ban bo muand’i Yendu Laabamann k i gbad g ji mɔg dindann nba nyan. B bo muand l Laabamann niib nba kul be tinŋ po ne i. Min Pɔl tuonn tie l Laabamann muandu i. 24Mɔlane, n pal man yen min laad fala nba i po. Yen mɔni min laad fala nba ne, n laad k n tond Kristo n bo bu la fala nba kul u gbannand po i, l gbannand n tie u tintaanu. 25N te Kristo tintaanu tuonsunn k n sun Yendu n bual’n k n sun yal nba i. Lann n tie k n muand’i Yendu maam kul canyiin. 26L maam bo tie ŋasiil i, g Yendu bo wuon niib kul siɛnyoug, ama g tan dɔgd g ŋɔn u niib mɔlane. 27U bo bua wan wuod l ŋasiil g ŋɔn’m k ban bann lan mɔn g biɛ mɔg yudand nand nba i yab g tie Suif‑nba siign n. L ŋasiil tie ne i: Kristo be i ninŋ g tien’i dindann k i mɔ tan bu gaal Yendu yudand. 28Wano Kristo laabaal i k t muand, g tien sua kul cegli, g tund sua kul yen yanfuom k tin te g sua kul ń cie Kristo n ninŋ. 29L po n te k n diɛ Kristo paalu nba n be n ninŋ g suun tuonn paaa nyan, g kɔn jad g suun n tuonn.

will be added

X\