Tuona 8

1Sɔl mɔ bo taa yab bo kpii Etiɛnn nyan po i. L daal k l mɔnn yab bo dug Yiesu po Serusalɛm doug n. K b kul yad g kua Suude yen Samari dingbana n ninŋ, g ŋaa Yiesu sundi kua. 2G yab nba bo ŋua Yendu yen b pal kul tug Etiɛnn g gad g pii g mɔ u kumɔni hal bonciɛnn. 3Ama g Sɔl nuan gbaa k wan biɛn yab bo dug Yiesu po. U bo kua b ŋai n i, g so jab yen puob g luond’b dansaldieog n. 4G yab nba bo dug Yiesu po g san g ciɛl nyan, waa dingbana n g muand Laabamann. 5L bo tien nnyan i g Filiip gad dopienu nne ninŋ k l be Samari g muand niib Kristo n tie yua. 6Niwulug bo tu gbad Filiip n maad yal, g biɛ la wan tie yaalidug bona nba, g ŋanm g luod tuba g cenŋ u maam. 7Niib bonciɛnn bo be l buol g sanpola ŋua’b, k l sanpola ji tu yign bag bag g yaad g ŋaa’b. G yab k b gbanu bo kpe yen wabi mɔ paagd. 8Lann i g pamanciɛnn kpen l doug n. 9L sua g jua nne bo be l doug n k b yi’ug Simɔn. U bo tie belbɔnd i, k l mɔg yaalidug Samari niib po. U mɔ bo yi u kua k u tie wano i. 10G bid yen nikpela kul ŋua’ɔg g cenŋ u maam. B kul bo tua g jua ne nuan mɔg Yendu paalu i, ban yi yal nba Paaciɛnu mɔno. 11Niib bo cenŋ u maam g dugn u bo cil g tie l belbɔnd k l wai. L po mɔno n te g niib bo ŋua’ɔg. 12Ama Filiip n bo muand’b Yendu diem Laabamann, g biɛ maad’b Yiesu Kristo n tie yua k b gaal nyan, jab yen puob bo te k b wuul’b nyum. 13K wano Simɔn mɔno tuo g gaal Kristo k b wul’o nyum. U ji bo g bua k u sud g ŋaa Filiip. U bo tu la yaalidug bona yen palug nba tie, lan suol’o yaalidug. 14Yiesu sundi bo be Serusalɛm g gbad g Samari niib mɔ tuo g gaal Yendu maam, k b sun Piɛr yen San b buol. 15Ban pund Samari, k b jaand yab dug Yiesu po, k ban gaal Foŋanm. 16G dugn Foŋanm daa bo g jiid b ninŋ baa sua po. B daa bo wul’b nyum kua i Yonmdaan Yiesu sann po. 17Lann i g Piɛr yen San maan nui b po k b gaal Foŋanm. 18Simɔn n la g Piɛr yen San maand nui yab dug Yiesu po k b gaan Foŋanm, k u tug ligli g tie’b 19g maad: « Te man n mɔ l paalu, k n tu gii maan nui yab nba po ban gaal Foŋanm. » 20G Piɛr jiin’o: « Fin yen a ligli kul ń biɛl fam, g dugn a mali k a bu fid g tug ligli g daa Yendu n piin yal fam. 21Yal nba tie ne buol ne, a g mɔg baa siɛl l n ninŋ ; a g mɔg yiko yen ŋan kua l n ninŋ, g dugn a maalm fag yen Yendu. 22Ŋaa a maalbiid g jaand g miɛl Yonmdaan, l g kua u bu di sugl a maalbiid po. 23G dugn n la k a tug n gbie yen nanŋ, k a biɛ kan ŋaa biid tienu. » 24G Simɔn jiin’m g maad: « Yinm mɔno ń jaand Yonmdaan n po, k yin maad yal ne, baa siɛl ń daa baal’n. » 25G Piɛr yen San ŋɔn niib Yiesu n tie yua, g biɛ muand’b Yendu maam. L puol po k b lebd Serusalɛm doug n. Ban leb Serusalɛm k b muand Laabamann Samari dingbana bonciɛnn n ninŋ. 26Yonmdaan malɛg bo maad Filiip: « Fiil g tɔgn yanbaɔnŋ po, g tug sɔnu nba nyiɛ Serusalɛm g ji Gasa. Niib g paa g tɔg l sɔnu. » 27G Filiip fiil g gad l youg mɔno, g la jua nne sɔnu po. L jua bo tie Etiyopi Puobad tuonsungbenŋl i. Wano i k b bo biil u jatiɛd k u guu l puo mɔgm kul. B bo yi l puo Kandas i. U bo baal Serusalɛm g pug Yendu i, 28g ji leb g kun. U bo kal tolug n ninŋ, g taanm diɛl’o, k u lii Yendu sogni Esaayi kadaaɔg. 29Lann i g Foŋanm maad Filiip: « Nagn tantolug ne buol. » 30G Filiip san g nagn g gbad k l jua lii Yendu sogni Esaayi kadaaɔg. G Filiip bual’o: « A gbiɛ ŋan lii yal ne niimn ii ? » 31K l jua ŋmiɛn’o: « N bu tien nle i g gbad l niimn g nil g ŋɔn’n i ? » K u maad Filiip k wan do g kal u buol. 32Wan bo lii yal Esaayi kadaaɔg n n ne: « B daan saa yen’o k u ŋmin nyan ban tu tug pieog g saa g daan bu kod nyan i. U daan ŋmin nyan pebig n tu ŋmin yab ja u kobd nunŋ n nyan i. U daan g yaad mɔb g maad baa siɛl. 33B daan sɔnd’o i, g yie g g kun’o mɔni. Ŋmaa n tan bu fid g maad u tennm po i ? G dugn, b junn u miɛl tinŋ po ne u. » 34K l jua ji bual Filiip: « N miɛd’a sugl, maad’n Yendu sogni n maad yua nba. U maad wano mɔno bii, u maad sua i ? » 35Lann i g Filiip gaal maam, g cil l kadaaɔg n, g muand’o Laabamann Yiesu po. 36K b saa saa g daan la nyum sɔnu po. K l jua maad Filiip: « Nyum n nyan, bɛ n biɛ pɔd yen ŋan wul’n i ? » [ 37G Filiip maad’o: « A gii dug Yiesu po yen a pal kul, l bu fid g tien. » K l jua maad: « N tuo g Yiesu Kristo tie Yendu Bija. »] 38Lann i k l jua te k b sen tolug, k wano yen Filiip jiid nyum n, g Filiip wul’o. 39Ban nyiɛ nyum n ninŋ yaa youg, g Yonmdaan Foŋanm tug Filiip g yaad yen’o k l jua ji g la’ɔg, g tug u sɔnu g paan g saa yen pamann. 40Filiip nuan tan sua k u ji be Asɔt doug n i. Lann i k u nyiɛ l buol g gad Sesaare. Wan saa, k u muand Laabamann doi nba be sɔnu po g daan pund Sesaare.

will be added

X\