Tuona 7

1G salg-yidkab kul ciɛn bual Etiɛnn: « Ban maad yal a po ne tie mɔni yaa aa ? » 2K Etiɛnn ŋmiɛn: « N baa‑nba yen n ninjanm, cenŋ man ne: T Yendu nba mɔg yudand bo ŋɔn u kua t yaaja Abraham g sua k u daa be Mesopotami, g daa g kua Aran doug n. 3U bo maad’o: “ Nya g ŋaa a doug yen a ŋaag yab, g gad doug nba ninŋ k n bu ŋɔn’a. ” 4Lann i k Abraham nyiɛ Kalde‑nba doug n g gad g kua Aran. U baa kpe yo k l puol po g Yendu te k u nyiɛ l buol, g baal g kua doug nba ninŋ k i be mɔlane. 5Yendu bo g tie’og baa siɛl, baa tinŋ boncebg nne l doug n. Ama u yen bo puon’o g maad: “ N bu te’a l doug, a tan gii g be a yaabuona ń yend. ” L yen bo sua k Abraham daa g mɔg baa big. 6Yendu biɛ bo maad’o: “ A yaabuona bu gad g kua dofanu n g te yonmi, k ban cagn’m bina kobiinna. 7Ama min, n tan bu bu buolu nba tug’b g tien’m b yonmi nyan. L po gii pend, a yaabuona bu nya l dofanu n g guan doug ne ninŋ gii dond’n. ” 8Lann i g Yendu suol dɔnnu yen Abraham. L dɔnnu banm n tie kɔnd. K Abraham mal Isaak g kɔnd’o daa ŋanniin daal, k Isaak mɔ tan kɔnd Sakɔb, g Sakɔb mɔ tan kɔnd u bid piig yen banle nba tie t yaajanm. 9K t yaajanm ŋanm fiil yen nanŋ b ninja Sosɛf po, g kuad’o k b gad yen’o Esipt, k u te yonm. Ama Yendu bo be yen’o, 10g nyan’o fala n ninŋ kul. G tie’og u ŋalbalg yen u yanfuom k u tu bu fid g maad yen Faraaɔn, yua bo tie Esipt bad. G Faraaɔn din Sosɛf Esipt gobna, g tug u ŋaag kul g kubn’o. 11Lann i g kom tan baa Esipt doug n kul yen Kanaan doug n, g niib cagn bonciɛnn, k t yaajanm ji tan g laad siɛl g di. 12Sakɔb n gbad g jied be Esipt, k u sun t yaajanm l doug n. 13Ban gad taal munle po g Sosɛf te k u ninjanm bann’o. G Faraaɔn ji bann Sosɛf n nyiɛ ŋaag nba ninŋ. 14Lann i g Sosɛf sun k b baal yen u baa Sakɔb yen u ŋaag yab kul. B kul bo tie niib piinlile yen banmu i. 15G Sakɔb jiid Esipt. L buol i k u kpe, wano yen t yaajanm, 16k b tug’b g baal yen’m Sisem, g pii’b kakul nba ninŋ k Abraham bo daa yen u ligli Emɔr bid buol, Sisem doug n. 17Ama Yendu n bo puon Abraham k u bu tien yal, l youg ji bo nag g sua g Suif‑nba pugn, g mal g yabd Esipt doug n. 18Diyenn g badpaanŋ nne tan gaal kog Esipt doug n, wano nuan bo g ban Sosɛf. 19L bad bo bɔnd t buolu niib, g cagn t yaajanm g tan niin’m mɔno k b lunn b bid, k b kpenn. 20L youg u, k b mal Moyis k u ŋan g pend. K b ŋub’o u baa ŋaag n ninŋ ŋmaali yintaa. 21B bo tan lu’ug u, g Faraaɔn bipuo gann’o, g kun g ŋub’o nyan u big nyan. 22L bo tien nnyan i, g Moyis gaal Esipt yab banm kul, g ban maam bonciɛnn g biɛ paa tuonn. 23Wan tan la bina piinna, k u tug yanjagl k u bu gad g la u ninjanm Israyɛl bid. 24Wan gad, k u la k Esipt jua cagn u ninja, k u gaal u ninja po g kpii Esipt jua. 25U bo mali k u ninjanm bu gbad g Yendu tug wano i, k wan fiel’b, ama k b yen bo g gbad l niimn. 26K l fann, g Moyis la k u ninjanm banle sie g kɔn yen lieb, k u bua n pad’b g maad: “ N dɔnn‑nba, i tie ninjann i, g laabaal k i kɔn yen i lieb i ? ” 27Ama g yua nba bo cagn u lua nyan, pii g tud Moyis g maad’o: “ Ŋmaa tug’a k a gii tie t bad g biɛ gii bu t buud i ? 28A bua n kpi n mɔ nyan ŋan won kpii Esipt jua nand nyan yaa aa ? ” 29Moyis n gbad l maam k u san g gad g kua Madian. L buol i k u mal bijabi banle. 30Bina piinna bo pend yo, g Yonmdaan malɛg ŋɔn u kua Moyis, tuntuug nba bo suol muu nyan ninŋ tinkuonŋ n ninŋ, Sinaayi jual buol. 31Wano Moyis n la nnyan k l yaa g lid’o yen wan la yal. K u nagn k wan diid, lann i g gbad Yonmdaan niɛlu k l maad k nne: 32“ Min n tie a yaajanm Yendu: Abraham yen Isaak yen Sakɔb Yendu ”. G jiwaani kua Moyis k u ji jegl, g g bua k u yaad g diid mɔno. 33L youg g Yonmdaan maad’o: “ Pid a taacaad g dugn ŋan sie tinŋ nba po ne, n be l buol i. 34Yen mɔni, n la n buolu n cagn nand Esipt doug n, g gbad u finfabni, lann i k n jiid k n fiel’o. Baal mɔlane k n bu sun’a Esipt doug n. ” 35Moyis nba k Israyɛl yab bo yie’og g maad g ŋmaa n tug’o k wan gii tie b bad g biɛ gii bu b buud nyan, wano i g Yendu tan sun’o g te g malɛg tod’o, k u tie b bad g biɛ tie b Fietua. L malɛg n bo be tuntuug nba bo so muu nyan ninŋ. 36L Moyis n tan tien yaalidug bona yen palug, g nyan Israyɛl buolu Esipt doug n, g te k b puod mɔgmɔnn, k u ŋmagd’b tinkuonŋ n ninŋ bina piinna siign. 37Wano n biɛ bo maad Israyɛl yab: “ Yendu bu lugd i buolu n yeno, wan gii tie Yendu sogni nyan min nyan. ” 38Youg nba k t yaajanm Yendu buolu bo taan lieb tinkuonŋ n ninŋ, Moyis bo be banm yen malɛg siign, g gaan maam nba tien miɛl malɛg buol Sinaayi jual po, g sɔgnd’ti. 39Ama t yaajanm bo g bua k b cɔlm’o, g yie’og k b yam guan Esipt. 40Lann i k t yaajanm maad Aharɔn: “ Naan yendui nba baa be t liig k t ŋua, g dugn Moyis nba nyan’ti Esipt doug n nuan, t ji g ban yal baal’o. ” 41L dana n ninŋ mɔno k b naan yendu k u tie naabig, k b baad yen sali g yid’o, k b tien jaanciɛnm yen banm mɔno n sun yaa tuonn. 42Lann i g Yendu nyɔl’b, g ŋaa’b k b dond polu po ŋmaabid nyan lan bo tan diɛn Yendu sogni‑nba kadaaɔg n nand nyan. L bo diɛn g maad: “ Israyɛl yab, bina piinna nba k i bo be tinkuonŋ n ninŋ, i bo diɛ bonkobd yen sali g yid min yaa aa ? 43I bo tug yendu nba k b yi Molɔk nyan yen u jounŋ, yen yendu nba k b yi Refann nyan ŋmaabig ninnaɔnŋ u. L yendui i k i bo naan g dond’b. L po n te k n bu nyan’i i doug n, g gad yen’i hal Babilɔnn yaa liig. ” 44T yaajanm n bo be tinkuonŋ n ninŋ, b bo mɔg Yendu-cend‑buol-jounŋ g Yendu Mɔmaam be l ninŋ. Yendu n bo te g Moyis pua l jounŋ. U bo pua nyan wan bo la l jounŋ k l naan nand nyan i. 45T yaajanm ji bo tan gaal l jounŋ u g diɛ, youg nba g Sosuwe bo be b liig. B bo kua yen l jounŋ u, doug nba ninŋ g Yendu bo te k b pua tɔb g yaan l doug n niib g yend. K l jounŋ ji be yen’m saa yen Dafiid youg. 46Yendu bo tie Dafiid u ŋalbalg, g Dafiid miɛl’o k wan cab’o k wan maa ŋaag g te wano Sakɔb Yendu. 47Ama Salomɔn n ji bo tan maa ŋaag g tie’og. 48Yendu Badciɛn mɔ yen g kua ŋai nba g niib maa yen b nui kaa. Yendu bo te k u sogni maad lann n nyan: 49“ Polu tie n kinkaanbuol i, g tinŋ tie n taaŋmaabuol. I bu fid g maa ŋalanŋ i g te’n i ? Lɛ buol n bu fid g te n dinduanbuol i ? 50Min mɔno kaa tag l bona kul ne ii ? ” » Lann i k Etiɛnn biɛ maad Suif‑nba buuddanm: 51« Yinm kangbada ne, i yie k i kan lebd i pala g cenŋ Yendu, yinm l yie Foŋanm i. I tie nyan i yaajanm nyan i. 52Yendu sogni lano po i, k i yaajanm g ŋɔn’o fala i ? B kpii yab bo liid mɔno g muand Mɔnkundaan baalu. I kuad wano i mɔlane, g biɛ kpii’ug. 53Yinm nba gaal Yendu Mɔmaam u malɛg‑nba buol, i biɛ g cɔln l Mɔmaam. » 54Suif‑nba buuddanm n gbad l maam, k b pala bie Etiɛnn po, k b ji ŋman nyina. 55Ama wano n yen bo gbie yen Foŋanm nyan, k u yaad g diid polu po, g la Yendu yudand yen Yiesu k u sie Yendu nuujendu. 56Lann i k u maad: « Cenŋ man, n la g polu luod k n nyuan g Nifosaal Bija sie Yendu nuujendu. » 57Ban gbad l maam k b kul yign yen paalu, g pii b tuba, g bed g gad g gob Etiɛnn. 58G dad g nyan’o doug kunŋ g jaa’ɔg tana g bu kpi’ug. G yab bo fa faaɔg g jalg Etiɛnn nyan, land b tiɛd g bil naasen nne buol k b yi’ug Sɔl. 59Ban bo jaag Etiɛnn tana yaa youg, u bo jaand g maad k nne: « Yonmdaan Yiesu, gaal n nalnŋ. » 60L puol po k u baa g gbaan g yign yen paalu g maad: « Yonmdaan, di sugl biid nba k b tien ne po. » Wan maad l lanbona g gbenn, k u jiin.

will be added

X\