Tuona 6

1L dana n ninŋ g Yiesu ŋuantieb pugn bonciɛnn. B ninŋ, g Suif‑nba nba maad grɛk nyan yie Ebro‑nba po, g maad’b k l tien nle i k b tu bua n biid pekɔa jied, g sunm b yaa pekɔa po i ? 2Lann i g Yiesu sundi piig yen banle ŋann, taan yab bo ŋua Yiesu nyan kul g maad’b: « L g dagd k tin ŋaa Yendu maam muandu gii nyuan jied biidu n ninŋ. 3Lann n ninjanm, lugd man i ninŋ niib banlile, yab nba g sua kan fid g jalg’b baa siɛl po, g Foŋanm be yen’m k b mɔg yanfuom, k t bu te’b l tuonn. 4Nnyan, t yaa tuonn ji baa tie jaandi yen Yendu maam muandu i. » 5G niib kul tuo l maam. Lann i k b lugd Etiɛnn, u bo tie nil nba mɔg dindann bonciɛnn g gbie yen Foŋanm. G lugd Filiip yen Prokɔr yen Nikanɔr yen Timɔn yen Parmena yen Nikola, yua bo tie Antiyɔs jua g bo kua Suif‑nba jaandi, 6g baal yen’m g Yiesu sundi jaand g maan nui b po. 7Yendu maam bo yad g saa, g Yiesu ŋuantieb pugd bonciɛnn Serusalɛm doug n. G salg-yidkab bonciɛnn mɔ tuo g gaal Yiesu. 8Yendu bo tie Etiɛnn u ŋalbalg yen u paalu k u tie palug yen yaalidug bona bonciɛnn, g niib kul nyuan. 9Suif‑nba nne bo mɔg b tintaann dieog k b yi « Yab‑nyiɛ-yonmd‑n. » B ninŋ siɛb bo fiil g cil g nai yen wano Etiɛnn. L tintaann dieog n, yenm bo nyiɛ Siirɛnn yen Alɛksandri, g lieb nyiɛ Silisi yen Asi. 10Ama b bo kan fid g nai g paad Etiɛnn g dugn Foŋanm bo te k u maad yen yanfuom. 11Lann i k b la niib g tie’b ligli k ban maad k b gbad k u maad g sugd Moyis yen Yendu. 12K b tig muu g nyɔgl tien, g niib fiil yen Suif‑nba nikpela yen Yendu Kadaaɔg gbanbanda, g gad g suol Etiɛnn, g gad yen’o Suif‑nba buuddanm buol. 13K b kpaan niib k b baal g fa faaɔg g jalg’o g maad: « Jua ne l maad mabiid i Yendu jaanddeciɛɔnŋ po yen Moyis yiko po. 14T gbad k u maad g Nasarɛt Yiesu bu mud jaanddeciɛɔnŋ g biɛ lebd bogda nba g Moyis bo tie’ti. » 15G danm nba kul bo kal buud po nyuand Etiɛnn g la k u nunŋ naan nyan malɛg yal nyan.

will be added

X\