Tuona 5

1Jua nne mɔ bo be g yi Ananias k u ŋaapuo yi Safiira. Wano n bo kuad u kpaab g juog yen u ŋaapuo 2g bɔgd ligli g wuon. G tug yal tenn g gad g tie Yiesu sundi. 3Lann i g Piɛr maad’o: « Ananias, l tien nle i k a ŋaa g Sitaan kua a pal n g yend’a, g te k a bɔgd a kpaab ligli g wuon, g baal g bɔnd Foŋanm i ? 4A bo bu fid g ŋaa g daa kuad a kpaab, lann i kaa ŋan kuad nyan, a bo bu fid g tug l ligli g tien ŋan bua yal. A tien nle i g ŋaa k l maalm kua a pal n i ? A g bɔnd niib kaa, a bɔnd Yendu i. » 5Ananias n gbad l maam, k u baa k l gbenn nnyan. G jiwaani kua niib nba kul bo gbad yal tien. 6Lann i g naasenm fiil g tug’o g pɔbn’o cabl n, g gad g pii. 7Lan tien nyan kud muntaa nyan, k Ananias ŋaapuo baal g kua. U daa bo g ban yal tien. 8G Piɛr bual’o: « Diid a, yin kuad i kpaab, i gaal ligli ne yaa aa ? » G puo ŋmiɛn’o k ɛɛn, k b gaal l ligli i. 9Lann i g Piɛr maad’o: « L tien nle i k fin yen a sal taan mɔb g bign k yin bɔnd Yonmdaan Foŋanm i ? A la i, yab gad g pii a sal, banm n be dimɔb n nyan. B bu tug a mɔ g gad yen’a. » 10L youg mɔno k u mɔ caad g baa Piɛr nunŋ n k l gbenn nnyan. G naasenm kua g sua k u kpe g dua. K b tug u mɔ g gad g pii’ug g kpiɛn u sal. 11G jiwaani kua yab nba kul bo dug Yiesu po yen yab nba bo gbad l maam kul. 12Yiesu sundi bo tie yaalidug bona yen palug bonciɛnn niib kul buol. Yab bo dug Yiesu po kul bo taa mɔb, g taand lieb Salomɔn ciɛɔg n. 13Nifanm nba bo be bo bua b maam bonciɛnn, ama g baa sua yen g paand pal g kua b ninŋ. 14Yen l kul jab yen puob, bonciɛnn bo tan tuo g gaal Yonmdaan g pugn b po. 15Niib bo baad yen yiɛnm g duand’b liɛni yen dinduantiɛd po sɔnjakuni, k l gii tie g Piɛr tan pend, u jinjunŋ ń pend b ninŋ baa yend po. 16Lann i g lieb bonciɛnn mɔ nya Serusalɛm dingbankunkogi n g siɛn g baad yen yiɛnm yen yab g sanpola bo ŋua’b. K b kul ne laad laafiɛ. 17L youg, g salg-yidkab kul ciɛn yen yab bo be yen’o g tie Sadusien-nba cagl n ninŋ yab nyan, fiil yen nanŋ g te 18k b suol Yiesu sundi g luon’m dansaldieog n. 19Ama g Yonmdaan malɛg tan baal nyiɛɔg, g luod dansaldieog gana g nyan’m cincann g maad’b: 20« Gad man g sed jaanddeciɛɔnŋ n g muand niib manfopaann maam. » 21Ban gbad nnyan, k b fiil siŋapanpan g gad g kua jaanddeciɛɔnŋ n, g cil g tund niib. L sua g Yendu salg-yidkab kul ciɛn yen yab bo be yen’o mɔ gad, g taan g kal yen Suif‑nba buuddanm yen Suif‑nba nikpela, g sun k ban gad g luod Yiesu sundi g baal yen’m nii. 22G sijenm gad g g la Yiesu sundi dansaldieog n, g guan g maad’b: 23« T pund g sua g dansaldieog gana kul ŋanm g luo, g sijenm sie dimɔb n g guu. Ama tin luod dansaldieog t g la baa sua l ninŋ. » 24Ban gbad l maam, k l yaa g lid jaanddeciɛɔnŋ sijenm kul ciɛn yen salg-yidkab ciɛnm, yen lan tien nand g Yiesu sundi nyiɛ. K b ji mali yal bu baal l puol po. 25L youg g nil baal g maad’b: « Yab nba k i won suol g luon’m nyan, sie jaanddeciɛɔnŋ n g tund niib. » 26Lann i g jaanddeciɛɔnŋ sijenm kul ciɛn tug sijenm k b gad g tug Yiesu sundi g guan yen’m. B yen bo g tuo g sii’b g dugn b bo jie g niib tan bu jaa’b tana. 27Ban guan yen’m Suif‑nba buuddanm buol, g salg-yidkab kul ciɛn bual’b: 28« T daan g bel’i yen ninmɔnn k yin daa tund niib l sann po ii ? Ama k yinm yen yad l tundl Serusalɛm doug n kul, g bua g niib ń jalg’ti k tinm n kpii l jua. » 29Lann i g Piɛr yen u lieb ŋmiɛn’m: « T bu cɔln Yendu i, t kan cɔln niib kaa. 30Yinm n daan kpaa Yiesu dapunpɔnn po, k u kpe. Ama k t yaajanm Yendu te k u yied kpienm siign. 31Wano i g Yendu don’o g kaan’o u jendu, g te k u tie Bad g biɛ tie Fietua, k wan te k Israyɛl yab ń lebd b binbem, k wan di sugl b biid po. 32Tinm yen Foŋanm tie sieda‑nba. Wano Foŋanm i, g Yendu tie yaa danm nba cɔlm’o. » 33Suif‑nba buuddanm n gbad nnyan, k b pala bie g pend k b ji lolg k ban kpi Yiesu sundi. 34Ama g jua nne fiil Suif‑nba buuddanm siign g maad k ban daa nyan Yiesu sundi u. U bo tie Farisiɛn i, k b yi’ug Gamaliɛl. U biɛ bo tie Yendu Kadaaɔg gbanband i, g niib kul cɔlm’o. 35Lann i k u maad: « Israyɛl yab, suol man i kua yen yin bua n tien niib ne yal. 36Bann man k l daa g wai mɔno, g jua nne bo fiil k b yi’ug Tewudas. U bo yi u kua nigbenŋl i, g niib nba g luol kobiinna ŋuan’o. Ama k b tan kpii’ug, g yab bo ŋuan’o nyan kul san g yad, k b tintaanu yod. 37U yal po n pend, g Galile jua Suuda fiil cɔdl youg, g mɔ yaan te g niib bonciɛnn ŋuan’o. K b tan kpii u mɔ, k u niib kul san g yad. 38L po n te k n ji maad’i: Daa kua man b maam n. Ŋaa’b man k ban gii saa. G dugn l gii sua k b didugd lann i kaa k b tuona tie niib maalm, l bu yod l kua i. 39Ama l gii sua k l tie Yendu yal, i kan fid g tien’m baa siɛl. Lann suol man i kua g daa tan kɔn yen Yendu. » K b kul tuo k u maam tie mɔni. 40Lann i k b guan g yiin Yiesu sundi g te k b pua’b gbana. G bel’b k ban daa ban g taa Yiesu sann. G ji ŋaa’b. 41K b nyiɛ Suif‑nba buuddanm buol g paan g saa. K b kul pala man yen Yendu n diid g sua k b dagd yen ban cagn’m Yiesu sann po. 42Daal kul b bo be jaanddeciɛɔnŋ n yen ŋai n ninŋ, g tund g biɛ muand Yendu Laabamann, g maad niib g Yiesu n tie yua nba g Yendu lugd’o.

will be added

X\