Tuona 4

1Piɛr yen San biɛ daa bo l sie g maad yen niwulug u, g salg-yidkab yen jaanddeciɛɔnŋ sijenm canbaa yen Sadusien-nba baal b buol. 2B pala bo bie bonciɛnn g dugn Piɛr yen San bo nyii Yiesu yiedu po i, g tund niib g kpienm tan bu yied. 3K b suol’b g luon’m g ji guu siŋaaɔg, g dugn l bo sua k l bɔnn o. 4Yen l kul, niib nba bo cenŋ Piɛr yen San tundl, b ninŋ bonciɛnn bo tuo g gaal Kristo. Yab bo dug Yiesu po ji bo g luol niib tuda ŋanmu. 5Lan fann, g Suif‑nba yudanm yen b nikpela, yen Yendu Kadaaɔg gbanbanda taan lieb Serusalɛm. 6Salg-yidkab kul ciɛn Ann bo be, g Kaayif be, g San be, k Alɛksandr be. Yab nba kul bo tie salg-yidkab kul ciɛn cugl n yab mɔ bo be. 7K b te k b baal yen Piɛr yen San b buol. Lann i k b bual’b: « Yiko lann po i, lann i kaa ŋmaa yaa sann po i, k i paag jua ne i ? » 8L youg, g Piɛr gbie yen Foŋanm g maad: « Doug n yudanm yen doug n nikpela, 9t tien wabg ŋanm k i bual’ti dinne tin tien ŋanm nba po yen lan tien nand g jua ne paag. 10Bann man, yinm yen Israyɛl buolu kul g Nasarɛt Yiesu Kristo, yua k i daan kpaa’ɔg dapunpɔnn po, k u kpe, g Yendu te k u yied kpienm siign, u yaa sann po i g jua nba ne sie i buol ne g mɔg laafiɛ. 11“ Yiesu n tie tann nba k yinm tanmaala bo lu. L tann n tan guan g te dieog fiɛgl tanjal. ” 12Yiesu buol i kaa, nil kan fid g la fielu. G dugn ŋanduna ne ninŋ Yiesu sann i kaa sanfann ji g be g Yendu tie k t bu fid g taa g la fielu. » 13Ban bo la g Piɛr yen San maad g g jie siɛl, g yen tie niib nba bo g kua kalaatu k b nunŋ po biɛ g luod nyan, k l yaa g lid’b. K b bann k b tie niib nba daan tu ŋua Yiesu i. 14Ban biɛ bo nyuan g jua nba bo paag sie b buol nyan, b ji bo kan fid g jiin siɛl. 15K b te k b nyan Piɛr yen San, g ji taan g kal b ŋmiɛl n g maad: 16« T bu tien niib ne nle i ? G dugn Serusalɛm niib kul ban yaalidug bonn nba k b tien ne. T kan fid g nai. 17Ama l tie k tin mɔnd k l maam ń ji daa yad naan kul i. T bu fu yen’m i, g bel’b k ban ji daa ban g taa l jua sann baa sua buol. » 18Lann i k b yiin Piɛr yen San g bel’b k ban ji daa fann g taa Yiesu sann, g biɛ daa ban g tund nil Yiesu maam. 19Ama g Piɛr yen San ŋmiɛn’m: « Yinm mɔno n diid g liɛ Yendu buol, l dagd k tin cɔln Yendu bii, tin cɔln yinm i ? Maad man’ti. 20Tinm nuan kan fid gii ŋmin, g kan maad tin la yal yen tin gbad yal. » 21Lann i k b biɛ fu yen’m. B bo g la ban bu tien nand g dad b tubl. Lann i, k b ŋaa’b g dugn niwulug po, k l maa b kul ji bo yiin g dond Yendu, yal nba bo tien po i. 22L kon bo tie yaalidug bonn i g dugn jua nba bo paag nyan, u bina bo cie bina piinna. 23Ban tan ŋaa Piɛr yen San, k b gad g la b lieb g dugn’m salg-yidkab ciɛnm yen Suif‑nba nikpela n maad’b yal kul. 24Ban gbad l maam, k b kul taan mɔb g jaand Yendu g maad: « Yonmdaan, fin n tag polu yen tinŋ yen mɔgl yen bona nba be kul. 25Fin n bo tie t yaaja Dafiid a tuonsunn Foŋanm k u maad: “ Laabaal g buoli ne fiil g nyɔgl i ? Laabaal g niib jaad b kua k b taand mɔb i ? 26Ŋanduna ne batieb pol g sed, g doug n yudanm mɔ taan mɔb g kɔn yen Yonmdaan yen wan lugd yua nba. ” 27L tie mɔni i, Erod yen Pɔns Pilat taan mɔb doug ne ninŋ yen buolfanu niib, yen Israyɛl yab g kɔn yen Yiesu, a tuonsunŋan nba k a lugd’o. 28B tien yal nba kul k a bo liid g bobn k a bu tien yen a paalu yen a buam n ninŋ. 29Yonmdaan, ji diid ban cagn’ti nand, g te k a tuonsunna ń muand a maam g daa jie siɛl ; 30tand a nuu g te g niib ń paag, g yaalidug bona yen palug ń tien a tuonsunŋan Yiesu sann po. » 31Ban jaand g gbenn, g tinŋ jeg naan buol nba k b bo taan lieb nyan. K b kul gbie yen Foŋanm g ji muand Yendu maam yen papaal. 32Niib nba kul bo dug Yiesu po bo taa mɔb i, g mɔg maalyenm. Sua bo g diɛ u mɔgm k l tie u kua yal. Yua kul n bo mɔg yal bo tie tintaanbonn i. 33Yiesu sundi bo muand yen Yendu paalu g maad g Yonmdaan Yiesu yied. Yendu ŋalbalg biɛ bo be yen b kul bonciɛnn. 34Siɛl bo g pɔd baa sua b siign. G dugn yab bo mɔg tini lann i kaa ŋai bo tu kuad g baal yen l ligli 35g bil Yiesu sundi buol. B bo tu bɔgd yua kul yen u payiɛnu i. 36Nnyan i g Sosɛf, yua g Yiesu sundi bo pul’o Barnabas bo kuad u kpaab g baal yen l ligli g tie’b. U bo tie Lefiit i, g nyiɛ Sipr. (Barnabas sann niimn tie jua nba paand niib pala.)

will be added

X\