Tuona 3

1Diyenn g Piɛr yen San gad jaanddeciɛɔnŋ n, g bu jaand daajuoug kud muntaa jaandi. 2L sua k b baal yen jua nne k b mal’o k u tie wabg, g kaan’o jaanddeciɛɔnŋ dimɔb n. B bo yi l dimɔb « Dimɔŋanm » i. Daal kul, b bo tu baal yen l wabg l buol i k wan gii miɛd niib nba kua jaanddeciɛɔnŋ n ligli. 3Wan la g Piɛr yen San bua n kua jaanddeciɛɔnŋ n, k u miɛl’b ligli. 4Lann i, g Piɛr yen San nyuan’o suoo, g Piɛr maad’o: « Diid’ti ». 5G wabg ji ŋanm g nyuan’m suoo, g daan k b bu te’og siɛl. 6Ama g Piɛr maad’o: « N g mɔg ligli, n biɛ g mɔg wula mɔ. Min mɔg yal, n bu te’a lann i. Nasarɛt Yiesu Kristo sann po, fiil g sonm. » 7Lann i g Piɛr suol u nuujendu g fiin’o. L youg mɔno, k u taapuod yen u taagbina tod. 8K u yug g cii. K wano yen Piɛr yen San yeg g kua jaanddeciɛɔnŋ n ninŋ, k u yuug g ciid g dond Yendu. 9G niib nyuan’o k u sonm, g dond Yendu. 10Ban bann k wano n tu kal g miɛd jaanddeciɛɔnŋ Dimɔŋanm buol nyan, k l yaa g lid’b g jiwaani kua’b yen yal tien. 11L jua bo g bua k u kpiɛd Piɛr yen San. K l yaa g lid niwulug k b siɛn g ŋua’b ciɛɔg n. B bo yi l ciɛɔg Salomɔn ciɛɔg u. 12Piɛr n la nnyan k u maad niwulug: « Israyɛl niib, laabaal g yal tien ne suol’i yaalidug u ? Bɛ n tien k i nyuan nyan t paalu po i, lann i kaa tin ŋua Yendu po n te g wabg ne paag i ? 13Yua nba tie t baa‑nba Yendu, Abraham, Isaak yen Sakɔb Yendu, wano n tie u tuonsunn Yiesu yudand. Yinm mɔno n bo suol’o g tie yikodanm, g yie k i g ban’o Pilat nunŋ n, g Pilat yen bo bua k wan ŋaa’ɔg. 14I yie yua nba tie niŋan, g tie mɔnkundaan yo, g maad Pilat k wan luod nikpiil g ŋaa. 15Nnyan i, k i daan te k b kpii miɛldaan. Yendu mɔ yen yied’o kpienm siign o. Tinm tie sieda‑nba. 16Jua nba k i nyuan’o g biɛ ban’o ne paag Yiesu nba k t daan u ninŋ nyan sann po i. T dindann Yiesu ninŋ n paag jua ne, i kul nunŋ n. 17N ninjanm, n ban k yinm yen i canbaa‑nba daan sun l kul ne yen yanbɔnm i. 18Ama g Yendu nuan yen bo tuod g te k u sogni‑nba maad k wan lugd yua nba bo bu l cagn i. U tien lann n nyan. 19Ji lebd man i binbem g tug i kua g cab Yonmdaan, k wan di sugl i biid po. 20Nnyan i k u bu te yin fuod, g biɛ sun Kristo nba k u bo liid g puon’i. Wano n tie Yiesu. 21U yen daa baa be polu yo, saa yen bona kul n tan bu ŋmagd g gbenn, nyan Yendu n bo te k u sogni‑nba nba tie niŋanm maad siɛnyoug nand nyan. 22Moyis n daa bo cind g maad: “ Yonmdaan i Yendu bu nyan i ninjanm n ninŋ niyend, wan gii tie Yendu sogni nyan min nyan. I cenŋ man u maam man. 23Nil nba kul yie g g cenŋ u maam, Yonmdaan bu nyan’o i siign g biɛn’o. ” 24Yendu sogni‑nba, lan cil hal Samiɛl saa yen u mɔ yaa puol po ŋuani, b mɔ bo tuod g maad yal tie mɔlane. 25Yinm n tie Yendu sogni‑nba yaabuona. Yendu bo puon yinm i youg nba k u bo suol dɔnnu yen t yaajanm. U bo maad Abraham: “ A yaabuona yaa yaabuona buol i g ŋanduna buoli kul bu gaal n yedŋanm. ” 26Yendu n nyan u tuonsunn, u cind g sun’o i buol i, g sua kul ń ŋaa tuonbiid sunu, k wan yad u yedŋanm i po. »

will be added

X\