1 T bo ciɛl yo, k b ji maad’ti k tin be kpendegl nba po ne yi Malt i. 2 L doug n niib bo ŋanm g gaal’ti. B bo son muu i, g te k t kul baal g yie, g dugn taag bo cil g baa g wad be. 3 G Pɔl wod daad g bu lu muu n, jaa waalabl be l n. G muuwalu te k u nyiɛ daad n g jɔl Pɔl nuu g diɛ. 4 L doug n niib n yaan la g waalabl juan Pɔl nuu po nyan, k b ji maad b ŋmiɛl n k nne: « Jua ne baa tie nikpiil i. U gbaa gbaa g nyiɛ mɔgl n, ama g Mɔnkundaan yen g bua’ɔg yen miɛl. » 5 Ama g Pɔl mii, g waalabl jɔnd g baa muu n. L bo g maad Pɔl baa siɛl. 6 B kul ji bo guu g Pɔl ń mɔl i, lann i kaa k wan baa g kpe. Ama lan bo wai k b la k l g tien Pɔl baa siɛl nyan, k b lebd b maalm g maad k u tie yendu i. 7 L kpendegl bad bo mɔg kpaab nne g maa ŋaag l n, k l g fag yen l buol. B bo yi’ug Publiyus i. Wano n bo gaal’ti nyan u dɔnn‑nba nyan u ŋaag n, k t tien daa ŋantaa. 8 L bo sua k u baa dua yen gbannantounŋ yen sabuonŋ i. G Pɔl kua u buol, g jaand g maan nui u po, k u paag. 9 Lann i k l doug n yiɛnlieb kul baal Pɔl buol k u paag b mɔ. 10 L buol niib bo cɔln’ti hal bonciɛnn. Tin bo bua n fiil, b bo tie’ti bona nba kul bo bu fid g tod’ti sɔnu po. 11 T bo tien l buol ŋmaali yintaa yo, g fid g kua Alɛksandri ŋadunŋ nba bo sed fawaaɔg youg Malt kpendegl bɔngbann nyan. B bo yi l ŋadunŋ Diyoskuur i. 12 T bo pund Siirakus doug n g tien l buol daa ŋantaa. 13 G nyiɛ l buol g kagn bɔngbann g pund Rejiyo. K l fann g faalu nyiɛ yanbaɔnŋ g pien’ti, k l daa ŋanle po k t pund Pusɔl. 14 L doug n i, k t la t ninjanm Kristo‑yab k b gɔgl’ti k tin tien daa ŋanlile yen’m. T bo sonm nnyan i g daan pund Rom. 15 T ninjanm Rom Kristo‑yab n gbad t laabaal, g yenm tuog’ti Apiyus daag n, g lieb tuog’ti naan buol nba k b yi Candied-tintaa. Pɔl n la’b yaa youg nba, k u tien Yendu balg k u pal paag. 16 Tin tan pund Rom, g Rom yikodanm cab Pɔl k wan kpaan ŋaag gii be, g sije guu’ug. 17 Wan pund l daa ŋantaa po, k u yiin Rom Suif‑nba liig yab u ŋaag n. Ban tigl g gbenn yaa youg nba, k u maad’b: « N ninjanm, n g tien siɛl g biil n buolu, n biɛ g tien siɛl k l g tuag yen t yaajanm bogda. Ama b yen suol’n Serusalɛm doug n, g tug’n g tie Rom yab. 18 K b bual’n buali g bua ban ŋaa’n, g dugn b bo g la min tien yal k l dagd yen k ban kpi’n. 19 G Suif‑nba yie n po, k n tan gbal g maad g Rom badciɛn n bu bu’n. L daan g tie k n bua n maad siɛl g biil n buolu kaa. 20 L po n te k n miɛl k min la’i g pag yen’i. Yen mɔni Israyɛl yab n daan yal po n te k b lol’n kudsiseli ne. » 21 K b ŋmiɛn’o: « T g gaal siɛl yaa kadaaɔg k l nyiɛ Suude g maad a maam. T ninjanm n ninŋ baa sua biɛ g baal g dugn a maam lann i kaa g maad mabiid a po. 22 Ama t bua k fin mɔno ń ŋanm g dugn’ti ŋan mali yal. G dugn t ban g kaannaa kul niib g tuo i cagl po. » 23 K banm yen Pɔl suol daal nba k b bu guan u ŋaag n. K l daal pund k b baal g yab. G Pɔl gaal maam siŋaaɔg n saa yen daajuoug, g kun mɔni Yendu diem po. U bo nyii Moyis kadaaɔg po yen Yendu sogni‑nba kadaaɔg po i g ŋɔnŋ’b, g kpaan k ban bann Yiesu n tie yua nba. 24 Yenm bo tuo g gaal Pɔl maam, g lieb yie. 25 B ji bo tan bua n kun g sua k b daa l g gbad lieb maam, lann i g Pɔl maad’b: « Foŋanm bo mɔg mɔni youg nba k u bo te g Yendu sogni Esaayi maad i yaajanm k nne: 26 “ Gad g maad buolu ne: I bu ŋanm g luod i tuba g cenŋ, i yen kan gbad baa siɛl. G ŋanm g nud i ninbina g diid, g yen kan la baa siɛl. 27 G dugn b tie kangbada i. B yie g nyal b tuba, g yie g pii b ninbina k ban daa la baa siɛl, g biɛ daa gbad baa siɛl. K lan tan daa kua b pala n, k ban lebd b binbem k n paag’b. ” » 28 Lann i g Pɔl biɛ pugn g maad: « Ji bann man g Yendu sun fielu Laabamann yab g tie Suif‑nba po i. Banm n ji bu gaal l Laabamann. » [ 29 Wan maad l lanbona g gbenn, g Suif‑nba yad g nai nai yen b lieb.] 30 Pɔl bo tien bina ŋanle i ŋaag nba ninŋ k u bo pa g be nyan. Niib nba kul bo baad g bu la’ɔg, u bo gaan’m l buol i. 31 G maad niib Yendu diem po. G tund niib yen papaal yal nba nyuan Yonmdaan Yiesu Kristo po, g baa siɛl g mabnd’o.
