Tuona 27

1Ban suol k t bu kua ŋadunŋ g gad Itali, k b tug Pɔl yen dansallei banŋaa nne, g kubn’m Rom sijeciɛn nne k b yi’ug Juliyus. Wano Juliyus bo tie sijenm cagl nba suun Rom badciɛn po nyan ninŋ yend i. 2T bo kua Adramiit doug n ŋadunŋ u. L ŋadunŋ bo bu kagn Asi dingbana i g gad. Tinm yen Maseduann jua nne n bo yeg k b yi’ug Aristark k u nyiɛ Tɛsaloniik. 3K l fann k t pund Sidɔn. G Juliyus diid Pɔl yen nunmanŋ g cab’o k wan gad g fuond u dɔnn‑nba, k ban te’og wan bua yal. 4K t nyiɛ l buol g sua g faalu togd’ti, k t tɔgn g legn Sipr kpendegl. 5K t puod mɔgl nba kpiɛ Silisi yen Panfili, g pund Miira, Lisi doug n. 6L buol i g sijeciɛn la Alɛksandri ŋadunŋ nne k l saa Itali doug n, k u te k t kua. 7T bo g luol g tien dana ŋanŋaa g saa waam waam yen t ŋadunŋ. T bo la fala bonciɛnn yo, g tan fid g pund Kiniid doug n. Nyan faalu n bo togi’ti k t kan fid g gad fagm nyan, k t kpib sɔnu g tɔgn Salmone g legn Krɛt kpendegl. 8T bo cagn nnyan i g saa, g kaag bɔngbann g daan pund siɛl buol nne k b yi Bɔnpɔr, k l kpiɛ yen Lase doug. 9T bo biɛn yaam bonciɛnn hal k l ji tan biɛ t po yen tin fid g sonm yen t ŋadunŋ, g dugn mɔlolu youg bo pend o. L po n bo te g Pɔl bo tuod g maad yab ŋmagd ŋadunŋ k nne: 10« N dɔnn‑nba, n la k t sɔnu ne baa biɛ t po. T ŋadunŋ yen t tuga kul bu biɛl. Tinm mɔno gii g mɔnd t bu biɛl. » 11Ama sijeciɛn bo g cenŋ Pɔl maam, u bo cenŋ yua ŋmagd ŋadunŋ yen yua yen ŋadunŋ maam i. 12Ŋadunŋ sedbuol biɛ bo g ŋan g dugn l bo tie fawaaɔg youg u. L po n te k b ninŋ bonciɛnn bo yie k ban yaad l buol g mɔnd g pund Feniks gii be g sua g fawaaɔg pend. Feniks mɔ bo tie Krɛt doug n ŋadunŋ sedbuol i, k l kua buol be g guan nintual po. 13Faalu nne bo nyiɛ yanbaɔnŋ po g g ŋanm g paa, k b ji mali k b bu fid g pund ban saa naan i. Lann i k b dad g don kudkpiɛga nba tu sen ŋadunŋ nyan, g fiil g kaag g g bua k b fagd yen Krɛt bɔngbann. 14Ama lan yann waam nne, g faalu nne kpid yen paalu kpendegl po, k b yi l faalu Erakilɔn, g baal g yil b po, 15k t gbaa k tin gad faalu n nyiɛ naan po g tan gbal. K l pien g gad yen’ti. 16K t baal g pend kpendegbig nne k b yi Koda k l legn’ti. L buol i k t gbaa gbaa g tan suol ŋadnbig nba k t bo tul yen t ŋadunŋ nyan g don’o. 17G tug ŋui g lol g lind t ŋadunŋ. Nyan ban bo jie k b tan bu gad g tuon Libi bɔngbann tanbiinguona nyan, k b jiin ŋadunŋ cabciɛɔnŋ g ji ŋaa g faalu piend ŋadunŋ g saa. 18L faaciɛnu bo l nyɔgn’ti yen paalu nnyan i, k l tan fann k b gbal g tug tuga g lu mɔgl n. 19L daa ŋantaa po k banm mɔno biɛ tug ŋadunŋ n ninŋ tuonsuntiɛd g lu mɔgl n. 20L bo tien dana ŋanŋaa g faaciɛnu ŋann l paa nnyan i, g sua kan fid g la yendu g bual ŋmaabid. T ji bo g mali mɔno k t bu ciɛl. 21L bo tien dana ŋanŋaa g yab be ŋadunŋ n g dii baa siɛl. Lann i g Pɔl fiil g sed b nunŋ n g maad: « N dɔnn‑nba, i daan bo gii tuo n maam, i daan bo kan fiil Krɛt. Nnyan, fala nba k t la yen t bona nba biɛl ne bo kan biɛl. 22Ama mɔlane n bua g yua kul ń guan g paan u pal g dugn baa sua kan kpe, ŋadunŋ kua n bu biɛl. 23Min ŋua Yendu nba g suun u po ne, sun u malɛg nyiɛɔg ne mɔno 24g maad’n: “ Pɔl daa jie, a bu pund Rom badciɛn nunŋ n. A yaa po Yendu bu fiel yab be ŋadunŋ ne ninŋ kul. ” 25Lann, paan man i pala g dugn n pal paa Yendu po. L bu tien nyan wan maad’n nand nyan i. 26Ŋadunŋ daan bu lu’ti kpendegl nne po i. » 27L bo tien piig yen daa ŋanna g faaciɛnu l piend’ti Mediterane mɔgl po. L piig yen daa ŋanna daal yɔugsiiug u, g yab suun ŋadunŋ n ji mali k t g fag yen bɔngbann. 28Lann i k b lu ŋuu nba k b diɛ g bignd nyan, g sua k l daa tenn g nyua nyan taabana piintaa yen ŋanlile nyan. G ŋadunŋ sud g fagd waam k b biɛ guan g lu ŋuu, g ji la k l tie taabana piinle yen ŋanniin. 29Nyan ban bo jie g ŋadunŋ tan bu tuon tana nyan, k b lu kudkpiɛga ŋanna nne k l tuul ŋadunŋ puol po k lan sen ŋadunŋ, g ji guu k lan fann tonm. 30Yab suun ŋadunŋ n ninŋ ji bo kpaan k ban san g ŋaa ŋadunŋ u. Lann i k b jiin ŋadnbig nyum po, g ji tua k b bua ban lu ŋadunŋ liig kudkpiɛga nba luol yen ŋui nyan i. 31Ban tien nnyan g Pɔl maad Rom sijeciɛn yen sijebid k nne: « I gii ŋaa g niib ne nyiɛ ŋadunŋ n, i kan ciɛl. » 32Lann i g sijenm ciel ŋui nba bo luol ŋadnbig nyan g ŋaa g nyum tug’l. 33Ban ji bo guu k lan fann nyan, g Pɔl paan b kul pala k ban di jied, g maad’b: « Dinne tie piig yen daa ŋanna n nyan k i be g g dii baa siɛl. 34N miɛd’i k i di sugl g di jied g dugn l bu tod’i yin gii mɔg miɛl. I ninŋ baa sua yukobyeonŋ kan biɛl. » 35Wan maad nnyan g gbenn, k u tug kpanu g tien Yendu balg b kul nunŋ n g jend g ji ŋman. 36Lann i k b kul pala paag k b mɔ dii. 37Tinm nba bo be ŋadunŋ n, t bo taan g tie niib kobiinle yen piinlile yen niib banluob i. 38Ban dii g buo yaa youg, k b tug bii nba k b diɛ g tie kpanu nyan, g lu mɔgl n g ŋadunŋ ń ji daa kpai. 39Lan tan fann yaa youg, g yab suun ŋadunŋ n diid g g bann ban be naan. Ama b bo la g mɔgl kunŋ bil yen tanbiinn, g mɔg nyunlual nne, k b ji mali k l gii tie k l bu fid ban gad g sed l buol. 40Lann i k b lod ŋui nba bo luol yen kudkpiɛga nyan g lu nyum n. G biɛ lod lanbanpipaba nba tu luol k b diɛ g ŋmagd ŋadunŋ nyan, g ji don cabl nba tu luol ŋadunŋ liig po nyan, g faalu ji piend ŋadunŋ g saa yenn mɔgl kunŋ. 41Lann i k b saa saa g daan tuon tanbiinguonn nne nyum n, g liig fel g ŋadunŋ ji kan fid g lie. G nyunguona baal yen paalu g pua g mud ŋadunŋ puol po. 42G sijenm ji bua ban kpi dansali, g baa sua ń tan daa dug nyum g san g ciɛl. 43Ama Rom sijeciɛn n bo bua wan fiel Pɔl nyan, k u bel’b k b g kpii’b. Lann i g cab mɔb g yab ban nyundugnu ń kpiɛ g baa nyum n g dug g nya. 44G lieb ń jɔl jɔl kalaga lann i kaa ŋadunŋ bonjena, g mɔ ń nya. L bo tien nnyan i, k b kul duo bɔngbann g baa siɛl g tien sua.

will be added

X\