Tuona 26

1K Agripa maad Pɔl: « A bu fid g maad g kɔn a kua po. » Lann i g Pɔl don nuu g gaal maam g maad g kɔn u kua po k nne: 2« Bad Agripa, dinne n pal man yen min la yiɛl g bu maad a nunŋ n, g kɔn n kua po Suif‑nba n jalg’n yal nba kul po. 3G dugn a ŋanm g ban Suif‑nba bogda kul yen l maadi. Lann di sugl g cenŋ’n yen yanfuom. 4Suif‑nba kul ban min bo be nand hal n naasend n. B ban hal lan cil, min bo tu be nand yen n doug n niib yen min bo tu be nand Serusalɛm doug n. 5B ban’n hal k l wai. B bu fid g maad k l tie mɔni l gii tie k b bua, k n bo tu be Farisiɛn-nba cagl n i. Suif‑nba jaandi n ninŋ, l cagl n ninŋ binbenu n ŋanm g paa. 6B ji bu’n mɔlane g dugn n guu puoni nba g Yendu bo puon t yaajanm i. 7T buolu n, piig yen cuga ŋanle nba be ŋua Yendu yen b pal kul yendu n yen nyiɛɔg, g guu k wan puon t yaajanm yal ń tien yen mɔni. Bad Agripa, Suif‑nba jalg’n l dindann po i. 8Laabaal k yinm Suif‑nba g tuo g Yendu bu yied kpienm i ? 9Min mɔno, n bo tu mali k l tie mabl i, k min bel niib k ban daa taan Nasarɛt Yiesu sann. 10N bo tien lann i, Serusalɛm doug n. Yendu salg-yidkab ciɛnm n bo cab’n yiko k n suol l niib bonciɛnn g luon dansaldieog n. Ban bo tu jiɛl b buud k ban kpi’b, n mɔ bo tu taa yab bua k ban kpi’b nyan po i. 11N bo tu paa g waa tintaann died n kul g cagn’m, g kpaan k n niin’m k ban yie Yiesu i. N pal bo bie b po g pend, k n ji l ŋua’b hal yen dofani n ninŋ g cagn’m. 12L po n te g diyenn k n bo saa Damas, yen salg-yidkab ciɛnm n bo tie’n yiko nba g sun’n k n suol Yiesu ŋuantieb. 13Bad Agripa, n bo paa sɔnu po yensikpikpalg n, g tan la g yinyiem nyiɛ polu po g paa g cie yendukpaana, k l baal g nyigd g fand min yen yab nba bo yeg. 14K t kul baa tinŋ n, k n gbad g niɛlu nne maad’n Ebro‑nba maam n ninŋ k nne: “ Sɔl, Sɔl, laabaal k a cagn’n i ? A tie nyan naab nba yied k u kan sun u daan tuonn k u yen ŋua g puag’o g tan bu duol’o fam nyan i. ” 15K n bual: “ Yonmdaan, a tie ŋmaa i ? ” G Yonmdaan ŋmiɛn: “ Min n tie Yiesu, a cagn min i. 16Ama fiil g sed. N legd g ŋɔn n kua k a te n tuonsunn. A baa tie n sieda i, g ŋɔnŋ niib ŋan la’n nand dinne yen bona nba k n bu ŋɔn’a dana nba baad. 17N bu sun’a Suif‑nba buol yen buolfanu yab buol. N bu guul’a k b kan fid g tien’a baa siɛl. 18N sun’a k a luod b ninbina i, g nyan’m bunbɔnn n g kuan’m yinyiem n, g fiel’b Sitaan nui n k ban te Yendu yab. Nnyan yab dug n po, n bu piin b biid k ban mɔ ń tan di faal yen yab nba tie Yendu yab. ” 19Bad Agripa, lan ji nyiɛ l buol saa yen dinne, n cɔln Yonmdaan n bo te k n la yal i. 20N daan cind g muand Damas yab yen Serusalɛm yab i, g guan g muand Suude dingbana kul niib yen buolfanu niib. G maad’b k ban lebd b binbem gii ŋua Yendu, gii suun tuona nba ŋɔnŋ k b lebd b binbem yen mɔni. 21L yaa po n te, g Suif‑nba bo suol’n jaanddeciɛɔnŋ n g bua ban kpi’n. 22Ama Yendu guul’n hal k n tan pund dinne. K n biɛ daa l mɔg miɛl, g bu kun mɔni bid yen nikpela buol, g Yendu sogni‑nba yen Moyis n bo maad yal tien o. N g pugd baa siɛl l po. 23B bo maad g Kristo tan bu cagn, k u bu te yua nba bu kpiɛ g yied kpienm siign, g muand yab tie Suif‑nba yen buolfanu yab yinyiem maam. » 24Pɔl n daa bo l maad nnyan g kɔn u kua po, g Fɛstus gaal jad u po g maad: « Pɔl, a tie waad i. A banm bonciɛnn n te k a waad. » 25G Pɔl ŋmiɛn’o: « Canbaa Fɛstus, n g waad kaa, maam nba k n maad ne tie mɔni i g biɛ dagd yen k n maad. 26Bad Agripa ban l kul ne. L po n te k n maad g g jie siɛl u nunŋ n. N ban k u ban l bona kul ne g dugn l bona kul ne daan g tien lɔdg n ninŋ siɛl buol kaa. 27Bad Agripa, a tuo g Yendu sogni‑nba n maad yal tie mɔni ii ? N ban k a tuo k l maam tie mɔni. » 28Lann i k Agripa maad Pɔl: « Ŋan maad’n yal waam nne n bu te min te Kristo‑yua aa ? » 29G Pɔl ŋmiɛn’o: « Min maad’a yal gii tie waam nne ii, lan yab ii, n miɛd Yendu k lan daa tie fin kukua kaa, ama lan gii tie i kul, fin yen yab cenŋ’n dinne, i kul ń te nyan min nyan, g yen daa luol yen kudsiseli. » 30Lann i g bad yen badciɛn yen Berenis yen yab nba bo be l buol nyan kul fiil. 31Ban nyiɛ yaa youg, k b ji maad maad yen b lieb k nne: « Jua ne g biil baa siɛl k l dagd k ban kpi’ug lann i kaa k ban luon’o dansalg. » 32K Agripa maad Fɛstus: « Jua ne bo gii g bual g Rom badciɛn n bu bu’ug, t bo bu fid g luod g ŋaa’ɔg. »

will be added

X\