Tuona 25

1Fɛstus bo baal u diem n, k l daa ŋantaa daal k u nyiɛ Sesaare g duo Serusalɛm. 2L buol i g salg-yidkab ciɛnm yen Suif‑nba nba tie nigbenŋa baal g la’ɔg, g maad k b mɔg maam yen Pɔl. 3Ban bo bobn g bua ban kpi Pɔl sɔnu po nyan, k b maad Fɛstus k wan di sugl g te g Pɔl ń baal Serusalɛm. 4G Fɛstus ŋmiɛn’m g Pɔl luo Sesaare dansaldieog n, k wano mɔno kan wai yen wan lebd Sesaare, 5k b liig yab ń ŋuan’o, k ban gad Sesaare, k b daan gii mɔg maam nba g bu maad g ŋɔn’m Pɔl n biil yal nba, ban maad. 6Fɛstus bo tien l buol dana ŋanniin lann i kaa dana piig kua i. Wan lebd g kun Sesaare k l fann, k u kal ban tu bu buud naan g te k b baal yen Pɔl. 7Pɔl n l pund yaa youg, g Suif‑nba nba nyiɛ Serusalɛm nyan kaan g lind’o, g jalg’o bona bonciɛnn po hal k l biɛ. B yen bo kan fid g ŋɔn k ban jalg’o yal po tie mɔni. 8G Pɔl kɔn u kua po g maad: « N g tien siɛl k l g tuag yen Suif‑nba yiko, n g tien siɛl g biil jaanddeciɛɔnŋ, n biɛ g biil Rom badciɛn mɔ baa siɛl. » 9Fɛstus n bo bua wan manŋ Suif‑nba pala nyan, k u bual Pɔl k nne: « A tuo k a bu gad Serusalɛm ban daan bu’a n nunŋ n, ban jalg’a yal po ii ? » 10G Pɔl ŋmiɛn: « Min be naan ne mɔ tie Rom badciɛn buud buol i. L buol i k b bu bu’n. Fin mɔno a ban k n g biil Suif‑nba baa siɛl. 11L gii tie k n biil siɛl, l gii tie k n tien siɛl k l dagd k ban kpi’n, n kan yie k ban daa kpi’n. Ama l gii tie k ban jalg’n yal nba ne po kul, g baa siɛl g tie mɔni, baa sua g mɔg yiko k wan tug’n g cab’b. N bua g Rom badciɛn mɔno i ń bu n buud. » 12Lann i g Fɛstus pag yen u kpaaga g maad Pɔl: « A yed k a bua Rom badciɛn i ń bu a buud a, lann a bu gad u buol i. » 13L bo tien dana waam yo, g bad Agripa yen Berenis baal Sesaare g bu fuond Fɛstus. 14Ban bo wai l buol nyan, g Fɛstus tan tug Pɔl maam g maad bad k nne: « Jua nne be ne buol ne, Feliks n daan luon’o dansalg. 15Min daan gad Serusalɛm i, g salg-yidkab ciɛnm yen Suif‑nba nikpela baal yen u maam n buol g jalg’o, g maad’n k min jiɛl u buud g te’og biid. 16K n ŋmiɛn’m g Rom yab g maan k ban tuo g nil biil k b yen daa g bu’ug. B daa tu cab l daan wan maad g kɔn u kua po, yab jalg’o nunŋ n i. 17Lann i k min yen banm kul n daan guan ne buol ne, n ji daan g ŋaa k l wai. L daan fann k n kal min tu bu buud naan i, g te k b baal yen l jua. 18Yab kɔn yen’o daan tigl, k n mali k ban bu yed k u biil yal nba baa biɛ i. N yen daan tan sua k l g tie nnyan. 19N daan tan la k b kɔn yen lieb b danm bogda po i yen jua nba k b yi’ug Yiesu nyan po. L jua kpe o, g Pɔl yie k u fei. 20N daan g ban min bu tien nand l maam po, lann i k n bual’o k u bu gad Serusalɛm ban daan bu’ug uu ? 21Ama g Pɔl yie g Canbaaciɛɔnŋ mɔno n bu bu u buud. K n te k b guan g kaan’o, g guu daal nba k n bu te ban gad yen’o Rom badciɛn buol. » 22K Agripa maad Fɛstus: « N bo bua k min mɔno n cenŋ l jua maam. » G Fɛstus ŋmiɛn’o: « Wonn a won bu cenŋ’o. » 23K l fann, k Agripa yen Berenis pund yen yudand nba yab, g kua ban tu bu buud naan. Banm yen sijeciɛnm yen doug n nigbenŋa n bo yeg. G Fɛstus te k b baal yen Pɔl. 24Lann i k wano Fɛstus gaal maam g maad: « Bad Agripa yen yinm nba kul be ne buol ne, jua nba k i nyuan’o ne, Suif‑nba daan g mɔg dindin g baal yen l jua maam g la’n Serusalɛm yen ne buol ne g yign g maad k l tie k l jua miɛl ń junn i. 25Min yaa po, min yen daan g la wan tien yal k l dagd yen kuum. Ama wano mɔno n daan bual g badciɛn n bu u buud nyan, k n yed k ban gad yen’o u buol. 26Min daan kan fid g diɛn baa siɛl lan gii tie mɔni Pɔl maam po, g te badciɛn nyan, l po n te k n te k b baal yen’o i kul nunŋ n, mandg fin bad Agripa nunŋ n, k a bual’o k n fid g la siɛl g diɛn u po. 27G dugn l kan gii mɔg niimn yen min te k ban tug dansalg g gad yen’o, k n yen kan fid g ŋɔn ban yed k u biil yal nba. »

will be added

X\