Tuona 24

1Daa ŋanmu po bo pend yo, k Ananias, yua bo tie salg-yidkab kul ciɛn nyan, pund Sesaare yen Suif‑nba nikpela n ninŋ yenm, yen buud maband nne k b yi’ug Tɛrtulus, k b kua g la gobna Feliks g maad’o k b mɔg maam yen Pɔl. 2Lann i k b yiin Pɔl, g Tɛrtulus gaal maam g bu ŋɔn ban mɔg maam nba yen’o, g maad k nne: « Canbaaciɛɔnŋ Feliks, a yaa po n te k t be t yam n yen laafiɛ. Ŋan ŋanm g kub doug yen yanfuom po n te, g bona lebd g ji ŋan g doug sonm. 3Tin be naan nba kul, t gaan l ŋanm daal kul. T tiend’a balg bonciɛnn l bona kul po. 4Min g bua k n biɛn’a yaam nyan, l po n te k n miɛd’a k a di sugl g cenŋ’ti waam. 5T la g jua ne n ŋmad doug. Wano n kuand ŋmadl Suif‑nba kul ninŋ ŋanduna munn kul. U tie cagl nba k b yi Nasariɛn-nba nyan canbaa i. 6U bign k wan tien bonsiɛl mɔno g biil t jaanddeciɛɔnŋ k lan te fam, k t suol’o. [T daan bua tin bu’ug nyan t yiko n bual nand i, 7ama g sijenm kul ciɛn Lisias baal g fiel’o yen paalu t nui n ninŋ. 8G biɛ maad g yab jalg’o nyan ń baal a buol.] L gii tie k a bual l jua buali, fin mɔno bu bann k tin jalg’o yal po kul tie mɔni. » 9G Suif‑nba taan u po, k wan maad yal tie mɔni i. 10G gobna cab Pɔl mɔb k wan maad. G Pɔl gaal maam g maad: « N ban g bina bonciɛnn n nyan k a bu buud doug ne ninŋ. L po n te k n pal paa k n bu maad g kɔn n kua po a buol ne. 11A bu fid g bual g diid, dana piig yen ŋanle n nyan, k n baal Serusalɛm g bua k n pug Yendu. 12Baa sua g la’n k n sie g kɔn yen nil g bual k n kpid wounŋ jaanddeciɛɔnŋ n, lann i kaa tintaann desiɛɔg n, lann i kaa doug n siɛl buol. 13B biɛ kan fid g ŋɔn, k ban jalg’n yal po mɔlane mɔno tie mɔni. 14Ama min ban yal n ne: Min pug Yendu nba k t yaajanm bo pug i, g tuag Yonmdaan sɔnu. K banm yen yie k l tie sɔnbiiug u, k n yen tuo g yal diɛn Moyis kadaaɔg n yen Yendu sogni‑nba kadaaɔg n kul tie mɔni. 15Min mɔg dindann nba Yendu n ninŋ, b mɔ biɛ mɔg l dindann i. Lan tie g yaa danm nba kpe g tie nimɔnm ii, nibiid ii, b kul tan bu yied. 16L po n te k n l gbaa k n daa mɔg siɛl yaa biid Yendu nunŋ n yen niib buol. 17L tien bina ŋanŋaa n nyan k n tu g be Serusalɛm. N daan kpen k n tod n buolu yen ligli i, g biɛ yid Yendu salg. 18L po n te k n daan be jaanddeciɛɔnŋ n, k b tan baal g la’n. L daan sua k n gad k min ŋanm n kua nyan t danm bogda n bual nand nyan i. Niib daan g tigl n buol, siɛl yaa nyɔgl mɔ biɛ daan g tien. 19Ama Asi doug n Suif‑nba yenm daan be. L bo gii tie k ban jalg’n, banm n bo bu fid g sed a nintual n g jalg’n. 20Lann i kaa, niib nba jalg’n mɔlane ń ji ŋɔn ban daan bu’n Suif‑nba buuddanm buol, g la k n biil yal nba. 21L gii g tie min daan sed b nunŋ n, g maad maam nba yen paalu i kaa. N daan maad: “ Min daan g kpienm tan bu yied po n te k b bu’n dinne. ” » 22Feliks n bo ban hal bonŋann, Kristo‑yab jaandi n tie yal nyan, k u lie buud daal g maad: « Sijenm kul ciɛn Lisias gii baal, n bu jiɛl i buud. » 23Lann i g maad sijeciɛn k wan gii guu Pɔl g ji daa mabnd’o bonciɛnn. K wan daa biel u dɔnn‑nba, g ŋaa’b k ban gii baad g nyuan u ninŋ. 24L bo tien dana waam yo, g Feliks tan baal yen u ŋaapuo Drusiil. Wano Drusiil bo tie Suif i. G Feliks te k b yiin Pɔl, g Pɔl maad’b dindann Yiesu Kristo n ninŋ n tie yal nba, k b cenŋ. 25Ama Pɔl n ji bo tan ŋɔnŋ’b nil n baa be nand k l ŋan Yendu po, yen nil n baa so u kua nand, yen buud nba baad ŋanduna po, g jiwaani kua Feliks k u maad Pɔl: « L daa dagd nnyan dinne o. N tan gii la yaam n bu guan g yiin’a. » 26Feliks bo tun g yi Pɔl k b pag k u daan g Pɔl bu te’og ligli i. 27Bina ŋanle bo pend yo, g Pɔrsiyus Fɛstus gaal Feliks yiɛl g te gobna. Feliks n bo bua Suif‑nba pala ń gii man u po nyan, k u ŋaa Pɔl dansaldieog n.

will be added

X\