Tuona 23

1G Pɔl nyuan nyuan Suif‑nba buuddanm g tan maad: « N ninjanm, hal min cil g ŋua Yendu saa yen mɔlane, n l ŋua’ɔg yen papienn i. » 2Lann i g salg-yidkab kul ciɛn Ananias maad yab bo kpiɛ Pɔl nyan, k ban pua u mɔb po. 3G Pɔl maad’o: « Fin i g Yendu bu pua’a, diid wan naan guonpieonŋ. A kal l buol g yed k a bu’n nyan yiko n bual nand i, k fin mɔno yen kand l yiko po n nyan, g yed k ban pua’n. » 4G yab bo kpiɛ Pɔl nyan maad’o: « Fin n sugd Yendu salg-yidkab kul ciɛn a ! » 5G Pɔl ŋmiɛn’m: « N ninjanm, n bo g ban k u tie salg-yidkab kul ciɛn. Yen mɔni l diɛn Yendu Kadaaɔg n ninŋ g maad: “ A kan maad mabiid a doug n bad po. ” » 6Pɔl n bo ban g Suif‑nba buuddanm siign Sadusien-nba yen Farisiɛn-nba be nyan, k u maad: « N ninjanm, n tie Farisiɛn i k n baa‑nba mɔ tie Farisiɛn-nba. Min dug g kpienm tan bu yied nyan po n te k b bu’n ne. » 7Wan maad nnyan, g Farisiɛn-nba yen Sadusien-nba ji gag yen lieb, g bɔgd caga ŋanle. 8G dugn Sadusien-nba bo tu maad g kpienm tan kan yied, g malɛg‑nba g be, g cicili mɔ biɛ g be. Ama g Farisiɛn-nba nuan yen tuo k l kul ne be. 9Nyɔgl bo pugd bonciɛnn, g Farisiɛn-nba cagl n, yab nba tie Yendu Kadaaɔg gbanbanda nyan, g yenm fiil g gaal jad g maad: « Tinm g la jua ne n biil yal. L g kua cicilg lann i kaa malɛg n pag yen’o. » 10Nyan l gigaɔg n ji bo ŋanm g paag nyan, g sijenm kul ciɛn jie k b tan bu dad g pad pad Pɔl. Lann i g te g sijenm jiid g tug’o l niib siign, g guan g kua yen’o sijekanŋ n. 11K l daal nyiɛɔg g Yonmdaan baal Pɔl buol g maad’o: « Paan a pal g daa jie. Ŋan maad n po nand Serusalɛm ne, l tie k ŋan biɛ daan maad n po nnyan i, Rom doug n. » 12K l fann g Suif‑nba ninŋ siɛb taan g kal, g taan mɔb g pol k b gii g kpii Pɔl, b daa kan di, b biɛ daa kan nyu. 13Yab nba bo taan g pol k b bu kpi Pɔl bo cie niib piinna. 14B bo gad g la salg-yidkab ciɛnm yen Suif‑nba nikpela g maad’b: « T taan mɔb g pol k t gii g kpii Pɔl, t daa kan di baa siɛl. 15Lann, yinm yen Suif‑nba buuddanm, sun man mɔlane mɔno k ban maad sijenm kul ciɛn, k wan te k ban baal yen Pɔl i buol, k lan gii tie k i bua n ŋanm g diid u maam i. Tinm, t cegn g bu gbenn u maam k u daa g pund i buol. » 16Ama g Pɔl niipuo bija gbad l maam, g gad sijekanŋ n g kua g maad Pɔl. 17Lann i g Pɔl yiin sijeciɛnm n ninŋ yend g maad’o: « Ciɛn naasenbig ne i canbaa buol, u mɔg maam g bu maad’o. » 18K l sijeciɛn tug’o g kua yen’o b canbaa buol g maad: « Pɔl nba k t luon’o n yiin’n g maad’n, k min ciɛn naasenbig ne a buol, k u mɔg maam g bu maad’a. » 19G sijenm kul ciɛn suol naasenbig nuu, g piɛd yen’o g bual’o k u mɔg bɛ i, g bua n maad’o i ? 20G naasenbig ŋmiɛn: « Suif‑nba taan mɔb g bu baal g miɛl’a ŋan won te ban baal yen Pɔl Suif‑nba buuddanm buol. B bu maad’a k b bua ban ŋanm g diid Pɔl maam i, 21ama ŋan daa tuo b maam. G dugn b taan g cie niib piinna g won bu laan g guul Pɔl. B pol k b won gii g kpii Pɔl i kaa, b daa kan di, b biɛ daa kan nyu. B bobn g gbenn o, b ji guu k fin i ń cab k ban gad yen Pɔl. » 22G sijenm kul ciɛn cab naasenbig g nyaan maad’o: « Daa ŋaa baa sua ń gbad k a maad’n l maam. » 23L puol po g sijenm kul ciɛn yiin sijeciɛnm n ninŋ banle, g maad’b: « Taan man sijenm kobiinle yen tanjagla piinlile yen niib kobiinle nba baa diɛ kpana, k b kul ń bobn g gbenn, k i gad Sesaare nyiɛɔg kud munwai. 24Bobn man taani mɔ, g Pɔl ń jag, k i ciɛn’o g daan te’og gobna Feliks yen laafiɛ. » 25K u biɛ diɛn kadaaɔg nba k b daan bu te wano Feliks g maad k nne: 26« Min Klod Lisias n da kadaaɔg ne g fuond canbaaciɛɔnŋ Feliks. 27Jua nba k n te k b baad yen’o a buol ne, Suif‑nba n daan suol’o g bu kpi’ug. Min gbad k u tie Rom jua nyan, k n tug n sijenm k t gad g fiel’o. 28Min daan bua min bann yal po te k b jalg’o nyan, k n gad yen’o banm Suif‑nba buuddanm buol. 29N tan la k b jalg’o yal tie banm Suif‑nba yiko po i. Ama n g la wan tien yal k l dagd yen ban kpi’ug lann i kaa k wan kua dansalg. 30Ban biɛ maad’n g Suif‑nba bobn g bu kpi’ug nyan, l po n te k n sun sijenm k ban baal yen’o a buol. G nyaan maad yab jalg’o nyan, k ban gad yen l maam a buol. » 31G sijenm tien nyan wan yed k ban tien nand nyan. G tug Pɔl nyiɛɔg g saa saa g daan pund yen’o Antipatris, 32k l fann g sijenm nba bo sonm nyan lebd sijekanŋ n, g ŋaa tanjagla kua k b saa yen’o. 33Ban tan pund Sesaare yaa youg, g tanjagla tug kadaaɔg g tie gobna Feliks g biɛ kubn’o Pɔl mɔ. 34Wan lii kadaaɔg g gbenn, k u bual Pɔl wan nyiɛ yaa diem nba ninŋ. Wan gbad g Pɔl tie Silisi jua, 35k u maad’o: « N tan bu cenŋ a maam youg nba g yab jalg’a pund. » Lann i g te k b luon’o bad Erod ŋaag n.

will be added

X\