Tuona 21

1L puol po k t yaad g ŋaa’b l pin, g tug ŋadunŋ g tol Kɔs. K l wonn po, k t pund Rod. G nyiɛ l buol g tuad Patara. 2L buol i, k t la ŋadunŋ k u saa Fenisi doug n, k t kua. 3Tin saa saa g tan nyuan Sipr yaa youg, k t gɔgd g tɔgn yanbaɔnŋ g ŋaa l kpendegl, g saa Siiri po. T maa maa nnyan i g daan pund Tiir, naan k b bo bu nyan tiɛd ŋadunŋ n. 4L buol i k t la Yiesu ŋuantieb g tien yen’m daa ŋanlile. G Foŋanm te k b maad Pɔl k wan daa saa Serusalɛm. 5Ama l daa ŋanlile po n pend, k t guan g tug t sɔnu. K banm yen b puob yen b bid ciɛn’ti, g daan nyan’ti doug n. K t kul gbaan mɔgl kunŋ g tien jaandi. 6Lann i k t cab t lieb. K tinm kua t ŋadunŋ Tiir nyan, k b mɔ lebd g kun. 7K t kaag g saa saa g daan pund Pitolemaayis doug n, g gad g fuond t ninjanm Kristo‑yab g tund yen’m. 8K l fann k t gad Sesaare, g daan can Filiip, yua nba bo muand Laabamann nyan. U bo tie niib banlile nba k b bo lugd’b Serusalɛm nyan ninŋ yend i. 9U bo mɔg bipuobi banna i, k b kul ne sua daa g ban jua. Banm n bo tu maad Yendu n yed k ban maad yal. 10T bo g luol g tien l buol dana ŋanŋaa nne, g Yendu sogni nba k b yi’ug Agabus nyan nyiɛ Suude g baal t buol. 11Lann i g juab Pɔl gbann g lol wano mɔno nui yen u titala g maad: « Foŋanm n maad yal n ne: “ Jua nba yen gbann ne, Suif‑nba daan bu lol’o nne i Serusalɛm, g tug’o g te’og buolfanu yab. ” » 12Tin gbad l maam, k tinm yen Sesaare yab miɛl Pɔl sugl k wan ji daa saa Serusalɛm. 13Ama g Pɔl ŋmiɛn’ti: « Laabaal k i buud g bua n wad n pal i ? Min g tuo k ban lol’n kukua kaa, n tuo k ban kpi’n mɔno Yonmdaan Yiesu sann po Serusalɛm doug n. » 14Nyan wan bo g tuo t maam nyan, t ji bo ŋaa i g nyaan maad k lan tien nyan Yonmdaan n bua nand nyan. 15Tin tien l buol dana waam, k t bobn t tiɛd g gad Serusalɛm. 16G Yiesu ŋuantieb nba bo be Sesaare nyan, g yenm ciɛn’ti, g gad yen’ti jua nne ŋaag k b yi’ug Minasɔn. L jua bo nyiɛ Sipr i, g bo te Yiesu ŋuantua k l wai. T bo bu duan u ŋaag i. 17Tin pund Serusalɛm youg nba, k t ninjanm Kristo‑yab gaal’ti yen pamann. 18K l fann k tinm yen Pɔl gad Saak ŋaag. L bo sua g Kristo‑yab nikpela kul tigl l buol. 19Pɔl n fuond’b g gbenn, k u ŋanm g dugn’m Yendu n te k u sun tuona nba kul, yab g tie Suif‑nba siign. 20Kristo‑yab nikpela n gbad l maam, k b ji dond Yendu g nyaan maad Pɔl: « T ninja, a la waa, Suif‑nba tie tuda tuda i g tuo g gaal Kristo, k b kul ne pal biɛ kɔn Moyis kadaaɔg n diɛni po. 21B maad’b k a tund Suif‑nba nba be buolfanu siign k ban daa cɔln yal be l kadaaɔg n, g daa kɔnd b bid, g biɛ daa cɔln Suif‑nba bogda. 22T ji bu tien nle i ? B yen bu l bann k a be ne buol ne. 23Lann, tien tin bu maad’a yal. Jab banna be t buol ne g puon puoni Yendu nunŋ n. 24Tug’b, k i kul ń gad g daan taan g tien l bogdl g ŋanm i kua, k a pa b po, k ban fid g kuol yud. Nnyan i g nil kul bu bann k ban maad a po yal kul tie faaɔg u. Lann i k b bu bann k a mɔ cɔln yal be Moyis kadaaɔg n. 25Ama yab g tie Suif‑nba g yen tuo g gaal Yiesu nuan, t daan diɛn’m kadaaɔg g maad’b tin kal g suol yal o. Lan tie k ban daa ŋman padnand, g daa di sɔm, g daa ŋman bonkobug nba kpe k b g kod, g biɛ daa conm. » 26K l fann g Pɔl tug l jab banna k b gad g tien l bogdl g ŋanm b kua, g yuand g kua jaanddeciɛɔnŋ n. G Pɔl ji ŋɔn daal nba k b bu yid salg sua kul po, k l ŋanml bogdl po ń juab. 27L ŋanml daa ŋanlile po n ji bo bua n gbenn, k Asi Suif‑nba la Pɔl jaanddeciɛɔnŋ n. Lann i g tud tud niwulug k b fiil g yie Pɔl po, k b suol’o 28g tand g maad k nne: « Israyɛl niib, baal man g tod’ti ! Jua ne n muand naan kul g kɔn yen t buolu, g tud niib k ban daa mɔg siɛl yaa cɔlunŋ t bogda yen t jaanddeciɛɔnŋ po, g tan te g yab g tie Suif‑nba mɔno kua jaanddeciɛɔnŋ n. B kuan jɔgnd n nyan Yendu ŋaag n. » 29B bo maad nnyan g dugn b bo la Pɔl doug n k u yeg yen Efɛs jua Trofiim. B ji bo mali g Pɔl kua yen’o jaanddeciɛɔnŋ n i. 30Lann i g nyɔgl tien doug n kul, g niib san g tigl. K b suol Pɔl g fil g nyan’o jaanddeciɛɔnŋ n, g luon dimɔi l youg mɔno. 31B ji bo kpaan k ban kpi Pɔl i, g niib gad g maad Rom sijenm kul ciɛn k l mɔn Serusalɛm doug n. 32L youg mɔno k u fiil g tug sijebid yen sijeciɛnm, k b san g gad niwulug buol. Niwulug n l la sijenm kul ciɛn yen sijenm yaa youg, k b ŋaa g ji g pua Pɔl. 33Lann i g sijenm kul ciɛn nagn u buol g cab mɔb k ban suol g lol’o yen kudsiseli nle, g nyaan bual k u tie ŋmaa i ? K u tien bɛ i ? 34Ama g niwulug n ninŋ g yenm yign k nne g lieb yign k nne. L po bo te g sijenm kul ciɛn kan fid g bann yal n tien. Lann i k u cab mɔb k ban tug Pɔl g gad yen’o sijekanŋ n. 35Ban do dimɔŋmaada po yaa youg, g niwulug yie Pɔl po g sijenm tan gbal g tug’o. 36G dugn niwulug bo ŋua g yign g tua: « Kpi’ug man ! Kpi’ug man ! » 37Youg nba k b ji bo bua n kuan Pɔl sijekanŋ n, k u bual sijenm kul ciɛn: « N bu fid g maad’a siɛl ii ? » K u ŋmiɛn’o: « A gbiɛ grɛk yaa aa ? 38Lann fin kaa tie Esipt jua nba daan kpid wounŋ, g tug bibiɛdi tuda ŋanna, dana nba pend ne ninŋ, g gad yen’m tinkuonŋ n ninŋ ii ? » 39G Pɔl ŋmiɛn: « Min tie Suif i, b mal’n Tars i, Silisi doug n. N tie l dogbenŋl n ninŋ big i. Cab’n k min maad yen niwulug. » 40G sijenm kul ciɛn cab’o. Lann i g Pɔl sed dimɔŋmaada ŋann po, g ŋag niwulug nuu k b suon silb. K u gaal maam g maad’b Ebro‑nba maam n k nne:

will be added

X\