Tuona 20

1L nyɔgl po n gbenn, g Pɔl taan Yiesu ŋuantieb g paan b pala. Lann i g cab’b g tug sɔnu g saa Maseduann. 2Wan pund Maseduann, k u waa dingbana n ninŋ kul, g paan Yiesu ŋuantieb pala, g pend g gad Grɛs. 3U bo tien l doug n ŋmaali ntaa i. Wan bo tan bua n tug ŋadunŋ g gad Siiri yaa youg, k u gbad g Suif‑nba bua n kpi’ug. Lann i k u tug yanjagl g guan g tɔgn Maseduann po. 4Yab bo ciɛn’o sana n ne: Piirus bija Sopatɛr yua bo tie Bere jua, yen Tɛsaloniik jab Aristark yen Sekundus, yen Dɛrb jua Gaayus, yen Timote, yen Asi jab Tisiik yen Trofiim. 5Banm n bo liid g daan bu guul’ti Trowas. 6Jaanm nba k b bo tu ŋman kpanu nba k b g tien yen dibina nyan bo pend yo, k tinm mɔno tug ŋadunŋ Filiip doug n. T bo tien daa ŋanmu yo, g fid g pund b buol Trowas. T kul bo tien l buol daa ŋanlile i. 7G laad n ninŋ dacincinn daal, k t taan lieb g bu biid kpanu. L bo sua k l wonn po g Pɔl bu fiil. Lann i k u gaal maam g maad yen Kristo‑yab g yɔug tan yɔgd. 8Tin bo taan lieb naan detuadug po, fida bo be bonciɛnn. 9L bo sua g naasen nne be k b yi’ug Etiis k u kal detuada ŋantaa takobonn po. Pɔl n bo maad g g gbend tonm nyan, g guam tan suol l naasen k u guan g lagd l detuada ŋantaa po g baa. K b fiin’o g sua k u kpe o. 10G Pɔl jiid g gbaa g gad g wob’o g maad: « I yam ń daa ŋmad man. U mɔg miɛl ! » 11Lann i k u guan g duo g jend kpanu g ŋman, g biɛ gaal maam g maad k l tan fann, k u yaad g ŋaa’b. 12K b tug l naasen g ciɛn’o k u mɔg miɛl. G nil kul yam duan. 13Pɔl bo bua wan sonm i g gad Asɔs. K tinm tug ŋadunŋ g gaal liig g daan bu tug’o l doug n. 14Wan tan pund Asɔs, k t tug’o yen ŋadunŋ g gad Mitilɛnn. 15K t nyiɛ l buol yen ŋadunŋ, k l wonn po k t pund Siiyo. L wontunm po k t pund Samɔs. K l dinnedaal po k t pund Mile. 16Pɔl bo g bua k u sed Efɛs doug n, g dugn u bo g bua wan biɛn yaam Asi dingbana n. U bo bua wan tien tonm, l gii tie k l bu fid wan pund Serusalɛm, Pantekuot daal. 17Pɔl bo be Mile doug n i, g sun g yiin Efɛs Kristo‑yab tintaanu nikpela. 18Ban tan baal u buol, k u maad’b: « Yinm mɔno, i ban lan cil hal dacincinn daal nba k n pund Asi doug n, min bo tu be yen’i nand. 19N jiin n kua g sun Yonmdaan tuonn yen ninsiid, g biɛ la fala g dugn Suif‑nba bo kpaan k ban janm’n. 20Yal nba tie bonmɔnn k n bo bu maad’i, n g ŋaa baa siɛl. N muand’i, g biɛ tund’i Yendu maam, niib kul buol yen i ŋai n. 21N biɛ muand Suif‑nba yen yab g tie Suif‑nba mɔ, k ban lebd b binbem g tug b kua g cab Yendu, g biɛ tuo g gaal t Yonmdaan Yiesu. 22Mɔlane, Foŋanm niin’n g saa yen’n Serusalɛm n nyan. N g ban yal daan bu baal’n. 23Ama n ban g doug kul ninŋ, Foŋanm tu maad’n k n bu cagn k ban biɛ luon’n dansalg. 24Yen l kul ne, n g tug n miɛl k l tie siɛl n po. Yal tie bonmɔnn n po, l tie k min fid g sun g gbenn tuonn nba k t Yonmdaan Yiesu kubn’n i. Lan tie k min muand Yendu ŋalbalg Laabamann. 25N kal i buol ne, g muand’i Yendu diem maam. Mɔlane n ban k i ninŋ ne, baa sua ji kan ban g la’n. 26L po n te k n bua min maad’i k i ninŋ ne baa sua gii tud sɔnu, l ji g la’n, 27g dugn n ŋɔn’i Yendu n bua n tien yal nba kul, g g wuon’i baa siɛl. 28I tiɛn man i kua po, g biɛ gii guu pelol nba g Foŋanm tug’i k yin gii kpaa l pei. Ŋanm man gii kpaa Yendu tintaanu nba g Yonmdaan wul u sɔm g yend. 29N ban k n gii kun, n puol po fuabɔjad bu baal g kua i ninŋ. B kan ŋaa pelol. 30G baa i ninŋ mɔno, niib bu fiil g fa faaɔg g bɔnd Yiesu ŋuantieb ban ŋuan’m. 31Lann, i ceg man gii tiɛn g bina ŋantaa siign, yendu n yen nyiɛɔg, yen ninsiid i, k n ŋmagd yua kul k wan tɔgn sɔnŋanu n. 32Mɔlane n ji kubnd’i Yendu nuu n, u ŋalbalg maam ń gii ŋmagd’i. L maam n mɔg paalu nba bu paan i pala, g biɛ te yin di faal nba k u cegn g bu te yab nba kul tie u yab. 33N g buad nil ligli, lann i kaa u wula, lann i kaa u tiɛd. 34Yinm mɔno, i ban k n sun yen n nui ne i, g la min yen n yegni n bo bua yal nba. 35N l tun g ŋɔnŋ’i k yin gii suun nnyan i, g fid g tod tali g biɛ gii tiɛn t Yonmdaan Yiesu mɔno n bo maad yal. U bo maad: “ L tie pamann i yua tien po g cie yua gaan. ” » 36Pɔl n maad g gbenn, k u taan g gbaan yen’m g jaand. 37Lann i k b kul ŋmaa bubuul g yuug g jɔlg Pɔl g cabd’o. 38B kul pala bo wad yen Pɔl n bo maad’b k b ji kan ban g la’ɔg. K b ciɛn’o g daan pund ŋadunŋ buol.

will be added

X\