Tuona 18

1L puol po g Pɔl nyiɛ Atɛnn g gad Korɛnt. 2L buol i, k u la jua nne k b yi’ug Akilas, k u tie Suif. U bo tie Pɔn doug n jua i. U daa bo l nyiɛ Itali n nyan g baal, wano yen u ŋaapuo Prisiil. G dugn bad Klod bo nyan yiko g Suif‑nba kul ń nya Rom doug n. Lann i g Pɔl gad b pin. 3Banm yen Pɔl kul bo suun tuonyenn i, b bo tie jonpuala i. L po n te g Pɔl bo be b ŋaag n, k b taan g suun. 4Saaba daal kul, Pɔl bo saa tintaann dieog n i, g gaan maam g maad g gbaa g Suif‑nba yen Grɛk‑nba ń tuo k wan maad yal tie mɔni. 5Silas yen Timote n nyiɛ Maseduann g pund, Pɔl ji bo tug u yaam kul g muand Yendu maam i, g ŋɔnŋ Suif‑nba g Yiesu n tie Kristo. 6Ama g Suif‑nba yie Pɔl po g ji sugd’o. Lann i g Pɔl yog yog u tiɛd g nyan tangulunŋ, g maad: « Yal baal kul l bu tuan i yula po i. Min g mɔg siɛl yaa biid. Lan cil mɔlane, n ji baa saa yab g tie Suif‑nba buol i. » 7G Pɔl nyiɛ l buol g gad jua nne ŋaag k b yi’ug Titiyus Sustus. L jua bo tie yua dond Yendu i k u ŋaag kpiɛ yen tintaann dieog. 8Krispus, yua bo tie tintaann dieog n canbaa nyan, bo gaal Kristo, wano yen u ŋaag yab kul. G Korɛnt yab nba bo cenŋ Pɔl nyan, bonciɛnn mɔ gaal Kristo k b wul’b nyum. 9G nyayeonŋ, k l tien Pɔl nyan danŋd nyan g Yonmdaan maad’o: « Daa jie siɛl, yi maad g daa ŋmin. 10G dugn n baa be yen’a. Sua kan fid g suun nuu a po g tien’a bonbiiug. N niib be doug ne ninŋ g yab. » 11Pɔl bo tien l buol binn yen ŋmaali nluob i, g tund niib Yendu maam. 12Youg nba g Galiyɔn bo tie yudaan Akaayi doug n g kal Rom badciɛn sann po, diyenn, g Suif‑nba taan mɔb g yie Pɔl po, g tug’o g gad yen’o buuddanm buol 13g maad: « Jua ne n gbaa g niib ń gii dond Yendu nand nba k t yiko g cab. » 14Pɔl bo yed k wan maad nne g Galiyɔn gaal maam g maad Suif‑nba: « L bo gii tie k u tien yal n biɛ, lann i kaa k u sun yal nba kua, n bo bu cenŋ’i lan bual nand. 15Ama yin jalg i lieb lanbona po yen sana po yen i yiko po nyan, yinm mɔno ń diid l n ninŋ. Min kan bu l buud. » 16Lann i k u bel g yaan’m. 17G Suif‑nba kul suol tintaann dieog n canbaa Sostɛnn, g pua’ɔg buuddanm nunŋ n, k l g maad Galiyɔn baa siɛl. 18Pɔl biɛ bo wai bonciɛnn Korɛnt doug n. G tan nyiɛ l buol g ŋaa u ninjanm Kristo‑yab. K wano yen Prisiil yen Akilas kua ŋadunŋ g gad Siiri. Pɔl bo kuol yukolnpaanu Sankre doug n yo, g fid g kua ŋadunŋ, g dugn u bo puon puoni nne. 19Ban tan pund Efɛs doug n, g Pɔl paad g ŋaa u yegni, g gad g kua tinaanu dieog n, g pag yen Suif‑nba. 20Lann i g Suif‑nba gɔgl’o k wan daa gii be yen’m. G Pɔl yie 21g cab’b g nyaan maad’b: « Yendu gii bua, disiɛl n bu guan i buol. » L puol po, k u kua ŋadunŋ Efɛs g gad Sesaare doug n. 22Wan pund Sesaare k u duo Serusalɛm g fuond Kristo‑yab tintaanu, g guan g jiid Antiyɔs. 23U bo kal l doug n waam yo, g guan g lebd g tɔgn Galasi yen Frisi doi n ninŋ g paand Yiesu ŋuantieb kul pala. 24Jua nne n bo be g tie Alɛksandri jua g baal Efɛs. B bo yi l jua Apolɔs i, k u tie Suif. U bo ban maam, g biɛ ban Yendu Kadaaɔg n diɛni lan bual nand. 25U bo tie yua nba k b tund’o g ŋɔn’o Yonmdaan Sɔnu i. U pal bo kɔn Yendu maam po k u muand g biɛ tund niib yen mɔni Yiesu n tie yua. Ama u bo ban San nyunwulu kua i. 26Lann i k u gaal maam tintaann dieog n g maad yen papaal. Prisiil yen Akilas n gbad u maam, k b tug’o b kua n ninŋ g biɛ ŋanm g ŋɔn’o yen mɔni Yendu Sɔnu. 27Apolɔs bo bua wan gad Akaayi doug n, k u ninjanm Kristo‑yab paan u pal g diɛn kadaaɔg k wan daan te l po Yiesu ŋuantieb k ban ŋanm g gaal’o. Wan pund yaa youg, Yendu ŋalbalg po k u tod l buol niib nba dug Yiesu po. 28G dugn u bo tu maad g di Suif‑nba mɔni niib kul nunŋ n. U bo diɛ Yendu Kadaaɔg n diɛni i g ŋɔnŋ’b yen mɔni g Yiesu n tie Kristo.

will be added

X\