Tuona 17

1B bo tɔgn Anfipolis yen Apoloni i, g pund Tɛsaloniik. Suif‑nba bo mɔg tintaann dieog l buol. 2G Pɔl saa g kua l n ninŋ Saaba daal kul, g pag yen Suif‑nba nyan wan bo tu tie nand tintaann delied n ninŋ nyan, g daan biin Saaba‑nba ŋantaa. U bo diɛ Yendu Kadaaɔg n diɛni i, 3g ŋɔnŋ’b l niimn g tua g: « Kristo bo bu l cagn i, g yied kpienm siign. L Kristo n tie Yiesu, yua k n maad’i u maam ne. » 4B ninŋ siɛb bo gbad l maam g tuo yen mɔni, g pugn Pɔl yen Silas po. Grɛk‑nba ninŋ, yab bo dond Yendu, b ninŋ bonciɛnn yen puob nba bo mɔg yudand mɔ bo pugn b po. 5Ama g Suif‑nba yie, g fiil yen nanŋ, g tug yukpiena nba waa sɔnjala po, g tigl niib g te k b kpil doug. K b gad Jasɔn ŋaag g kpaan Pɔl yen Silas, k ban suol’b, g gad yen’m niwulug buol. 6Ban gad g g la’b nyan, k b ji suol Jasɔn yen b ninjanm Kristo‑yab n ninŋ yenm, g fil g gad yen’m buuddanm buol, g yign g maad: « Niib nba ŋmad ŋanduna munn, ji be t doug ne i. 7Jasɔn n gaal’b u ŋaag n. L niib kul n tie yal g tuag Rom badciɛn yiko n bual nand. G dugn b maad g badfano be k b yi’ug Yiesu. » 8L maam bo ŋmad niwulug yen buuddanm kul yam. 9B bo te g Jasɔn yen u lieb ŋanm bil ligli yo, k b fid g ŋaa’b. 10Lan tan l bɔnn yaa youg, g Kristo‑yab te g Pɔl yen Silas gad Bere. Ban pund l doug n, k b gad g kua Suif‑nba tintaann dieog n. 11L buol Suif‑nba bo gbiɛ maam niimn g cie Tɛsaloniik yab. B bo gaal Yendu maam yen b pala kul. Daal kul b bo tu diid Yendu Kadaaɔg n i, g liɛ Pɔl n maad yal tie mɔni i. 12B ninŋ niib bonciɛnn bo te Kristo‑yab. Grɛk‑nba ninŋ mɔ, puob nba bo mɔg yudand, yen jab bonciɛnn mɔ bo te Kristo‑yab. 13Ama Tɛsaloniik Suif‑nba n gbad g Bere doug n mɔ Pɔl biɛ muand Yendu maam, k b baal yen ŋmadl g don niwulug mutuol. 14Lann i k t ninjanm Kristo‑yab tien tonm g te g Pɔl tol mɔgl po, g nyaan ŋaa Timote yen Silas nuan l buol. 15Yab nba bo ciɛnd Pɔl bo ciɛn’o g daan pund hal Atɛnn doug n. Ban leb, g Pɔl nagn’m k ban daan maad Timote yen Silas k ban ŋuan’o tonm nii. 16Pɔl ji bo guu Timote yen Silas Atɛnn i. U bo la k b maa yendui l doug n kaannaa kul, k u pal biil bonciɛnn. 17K u pag yen Suif‑nba yen yab nba kua Suif‑nba jaandi, tintaann dieog n. Daal kul u bo tu pag yen niib nba k u cend’b, niib n bo tu taand lieb naan i. 18Kadabanda nne bo be k b yi yenm Epikuriɛn-nba, g yi lieb Stoyisiɛn-nba. B mɔ bo baal g pag yen Pɔl, g yenm tan maad: « Maciɛndaan ne bua wan maad bɛ i ? » G lieb maad: « U ne baa muand dingbanfana yendui maam i. » G dugn Pɔl bo muand Yiesu Laabamann yen u yiedu maam i. 19Lann i k b tug’o g gad yen’o jual nne po, k b yi l jual Areyopaas, g bual’o: « A bu fid g ŋɔn’ti tundpaann nba k a tund ne niimn ii ? 20G dugn ŋan maad bona nba ne tie bonsaana i t po. T bua tin gbad l niimn. » 21Atɛnn yab kul yen saanm nba bo be b doug n mɔ yaa tuonn n yen bo tie k ban gii maad, lann i kaa ban gii cenŋ masaanm. 22Lann i g Pɔl fiil g sed buuddanm siign g maad: « Atɛnn yab, n la g bona kul ninŋ k i dond yendui hal bonciɛnn. 23G dugn min waa i doug ne ninŋ kul, n la k i maa yendui g dond. N tan la binbindyenn po mɔno k l diɛn k nne: “ Yendu nba k t g ban’o yal ”. Yin dond yua g yen g ban’o nyan, n baal g ŋɔnŋ’i wano i. 24Yendu nba tag ŋanduna yen bona nba kul be l n ninŋ, wano nba tie polu yen tinŋ Yonmdaan, u g be jaanddied nba ninŋ g niib maa yen b nui kaa. 25U biɛ g bua g baa sua tien siɛl u po, g dugn baa siɛl g pɔd’o. Wano n tien niib kul miɛl yen fuom yen bona kul. 26U cil niyend buol i, g tag niib nba kul be tinŋ po ne. Wano n sen bona kul youg, g biɛ ŋɔn niib kul n baa kua naan. 27U tien nnyan k ban gii kpaan’o i. L gii tie baa k b tuln g kpaan’o, l bu fid g tuu ban la’ɔg. Yen mɔni Yendu g fag yen t ninŋ baa sua. 28G dugn wano n te k t mɔg miɛl, g be, g biɛ waa. I yanyinna n ninŋ siɛb mɔno bo maad lann i g tua: “ T mɔ tie u bid i. ” 29Nyan tin tie Yendu bid nyan, t ji kan gii mali g Yendu naan yen yendui nba k b tag yen wula, lann i kaa yen ligli, lann i kaa yen tana nba g niib mɔno mali g kpied. 30B bo tien l bona kul ne g dugn b bo g ban Yendu i. Yendu mɔ g tug l yanbɔnm youg g sun yen tuonn. Mɔlane u ji maad niib kul k ban be naan kul, ban lebd b binbem. 31U sen daal nba k u bu bu ŋanduna niib kul yen mɔnkund. U bo lugd nil l po, g yied’o kpienm siign. U tien nnyan i, g ŋɔn nil kul k u lugd wano i yen mɔni, k wan gii tie mɔnkundaan. » 32Ban gbad g Pɔl maad kpienm yiedu maam g yenm ji laa’ɔg. G lieb mɔ maad: « Disiɛl yo, k t bu ŋanm g cenŋ a maam ne. » 33L bo tien nnyan i g Pɔl yaad g ŋaa’b. 34Yen l yaa kul, siɛb bo gaal Pɔl maam g ji dug Yiesu po. B ninŋ Deniis bo be. U bo tie l buol buuddanm n ninŋ yeno i. G puo nne be k b yi’ug Damariis. Lieb mɔ biɛ bo be.

will be added

X\