Tuona 16

1Pɔl bo tan pund Dɛrb, g pend Listr. Listr doug n bo mɔg jua nne k u tie Yiesu ŋuantua k b yi’ug Timote. U naa bo tie Suif i, g tie Kristo‑yua. U baa n bo tie Grɛk. 2Kristo‑yab nba bo be Listr yen Ikoniyɔm bo tun g maad g Timote tie nimɔn i. 3Pɔl bo bua Timote ń te u yegnu. Lann i g tug’o g kɔnd’o, g dugn b bo be Suif‑nba siign i, g yua kul biɛ ban k u baa tie Grɛk. 4Ban bo pend doi nba ninŋ, b bo maad Kristo‑yab k ban cɔln lanbona nba g Yiesu sundi yen Kristo‑yab nikpela suol Serusalɛm doug n. 5L po bo te g Kristo‑yab pala paagd dindann n, g niib biɛ pugd b po daal kul. 6Foŋanm bo yie g Pɔl yen Silas ń daa muand maam Asi dingbana n ninŋ. Lann i k b tɔgn Frisi yen Galasi. 7Ban saa g daan nag Misi k b bign k ban gad Bitini. Ama g Yiesu Foŋanm g cab’b sɔnu. 8Lann i k b tɔgn Misi g pend g gad Trowas. 9G nyiɛɔg tan baal k l tien Pɔl nyan danŋd nyan, k u la Maseduann jua nne k u sie g baln’o g tua: « Baal Maseduann g tod’ti. » 10Lan tien’o nnyan g pend, k t kpaan k tin gad Maseduann tonm ; k l maa t ji bo bann g Yendu yiin’ti l buol i, k tin muand u Laabamann. 11Lann i k t kua ŋadunŋ Trowas doug n, g gbaa g gad tonm doug nba g nyum kaan g lind, k b yi Samotras nyan. K l fann, k t gad Neyapolis. 12G nyiɛ ŋadunŋ n l buol g gad Filiip, Rom yab n bo yend yaa doug. Filiip bo tie Maseduann docincinn i. T bo g luol g tien dana ŋanŋaa l doug n. 13Saaba daal k t nyiɛ doug kunŋ, g gad siɛl buol nne k l be bɔngbann. T bo mali k t bu la naan buol g Suif‑nba tu taand lieb g jaand i. K t baal g la puob, g kal g pag yen’m. 14L puob n ninŋ, puo nne bo be g tie yua nba dond Yendu, k b yi’ug Lidi. U bo tie kpinkpendl i, g nyiɛ Tiatiir doug n, g kuad cabmɔna nba k l daaɔg paa. U bo cenŋ tin maad yal, g Yonmdaan fand’o k u tug Pɔl maam g bil u pal n ninŋ. 15Tin wul wano yen u ŋaag yab nyum g gbenn, k u gɔgl’ti g maad: « Yin diid g sua k n dug Yonmdaan po nyan, lann baal man gii be n ŋaapo. » K u niid’ti k tin tuo. 16Diyenn k t tan saa jaandi g daan tuog sipaan nne k u tie yonm, g mɔg nindanm. L nindanm n bo te k u tie ninnyuandaan. Wan bo nyuan bona nba g maad bo te k u canbaa‑nba laad ligli bonciɛnn. 17U ji bo ŋua tinm yen Pɔl i, g yign yen paalu g maad: « Jab ne tie Yendu Badciɛn tuonsunna i. 18B baal k ban ŋɔn’i yin bu tɔgn sɔnu nba g la fielu i. » L sipaan bo l ŋua g maad nnyan i daal kul. G Pɔl pal tan bie k u gbeg g gaal jad l nindanm po g maad: « Yiesu Kristo sann po, ŋaa man sipaan ne. » L youg mɔno g nindanm yaad g ŋaa’ɔg. 19Yonm ŋann canbaa‑nba n la k b yonm ji kan fid g te ban la ligli nyan, k b suol Pɔl yen Silas g fil g gad yen’m niib n bo tu taand lieb naan, doug n yudanm buol. 20G tuad yen’m buuddanm buol g maad’b: « Jab ne n ŋmad t doug. B tie Suif‑nba i 21g tund niib b danm bogda, k l yen g cab k tinm Rom yab ń tuo, lann i kaa k tin gii tie l bogda. » 22Lann i g niwulug mɔ fiil g yie b po. G buuddanm te k b dad g land Pɔl yen Silas tiɛd, g cab k ban pua’b gbana. 23K b pua pua’b, g luon’m g nyaan maad yua guu nyan, k wan ŋanm gii guu’b. 24G yua nba k b bo maad’o k wan ŋanm gii guu’b nyan, kuan’m dansaldieog n hal liig po, g kpaa’b. 25Yɔugsiiug po, g Pɔl yen Silas tan jaand g yiin g dond Yendu, g dansallei cenŋ. 26G tinŋ tan kpil g jeg yen paalu. G dansaldieog fiɛgl mig mig. L youg mɔno g gana kul luod, g kudsiseli nba bo luol dansali nyan mɔ lod lod. 27G yua bo guu dansaldieog nyan nyuand g sua g dansaldieog gana luod. Lann i k u nɔd jug g bu kpi u kua, g dugn u bo mali g dansali kul yad o. 28G Pɔl yign yen paalu g maad: « Daa tie a kua siɛl yaa bonbiiug ! T kul be ne. » 29L youg g yua bo guu dansaldieog nyan ji jegl, g bual fidl po, g san g kua g baa g gbaan Pɔl yen Silas nintual n, 30g tug’b g nyan’m cincann g bual’b: « Canbaa‑nba, n bu tien nle i g la fielu i ? » 31K b ŋmiɛn’o: « I dug Yonmdaan Yiesu po, a bu la fielu fin yen a ŋaag yab. » 32K b muand wano yen yab bo be u ŋaag n ninŋ kul Yonmdaan maam. 33L youg mɔno k u tug’b l nyiɛɔg, g ŋuul b nala. K b wul wano yen u ŋaag yab kul nyum. 34K u tug’b g duo yen’m u ŋaapo, g cand’b. Wano yen u ŋaag yab kul bo be pamann n, yen ban dug Yendu po. 35Lan fann, g buuddanm sun b tuonsunna k ban gad g maad yua guu dansaldieog k wan ŋaa l niib. 36G yua guu dansaldieog nyan gad yen l maam Pɔl buol g maad’o: « Buuddanm sun g maad k min ŋaa’i. Lann, nya man g ji gii saa man yen laafiɛ. » 37G Pɔl maad ban bo sun yab k nne: « B g bu’ti g yen te k b pua’ti gbana niib kul nunŋ n, tinm nba tie Rom yab. G tug’ti g gad g luon. G ji bua mɔlane ban wuon g ŋaa’ti. Lann kan tien. Banm mɔno ń baal g luod’ti ! » 38Lann i g tuonsunna ŋann lebd yen l maam g maad buuddanm. G jiwaani suol’b yen ban gbad g Pɔl yen Silas tie Rom yab. 39K b baal g miɛl’b sugl, g luod’b g baln’m k ban nya b doug n. 40Pɔl yen Silas n nyiɛ dansaldieog n, k b gad Lidi ŋaag. L buol i k b la b ninjanm Kristo‑yab, g pugn’m papaal, g nyiɛ l doug n.

will be added

X\