Tuona 15

1Niib nne bo nyiɛ Suude g baal Antiyɔs g tund b ninjanm Kristo‑yab g maad: « I gii g te k b kɔnd’i nyan Moyis n bo ŋɔn nand nyan, i kan la fielu. » 2Pɔl yen Barnabas bo g tuo l maam po, k b gag yen lieb hal bonciɛnn. Lann i g Kristo tintaanu tug yanjagl g sun Pɔl yen Barnabas yen lann Antiyɔs Kristo‑yab n ninŋ yenm, k ban gad Serusalɛm g daan la Yiesu sundi yen Kristo‑yab nikpela l maam po, 3g tie’b bona nba bu tod’b ban gad l sɔnu. Ban saa, b nyiɛ Fenisi yen Samari i, g dugd niib, buolfanu yab n gaal Yendu nand. K l maam manŋ b ninjanm Kristo‑yab pala bonciɛnn. 4Ban pund Serusalɛm, g Kristo‑yab tintaanu yen b nikpela yen Yiesu sundi gaal’b. Lann i k b dugn’m Yendu n te k b sun yal kul. 5Ama g Farisiɛn-nba cagl n, yab bo te Kristo‑yab, yenm fiil g maad: « L tie k ban kɔnd Kristo‑yab nba g tie Suif‑nba, g biɛ te ban gii cɔln Moyis yiko i. » 6G Yiesu sundi yen Kristo‑yab nikpela taan g kal g bu diid l maam. 7B bo nai yen lieb k l wai yo, g Piɛr tan fiil g maad: « N ninjanm, i ban g Yendu lugd’n i siign k l wai, k min muand yab g tie Suif‑nba Laabamann k ban gbad g mɔ ń tuo g gaal Yiesu. 8Yendu nba ban yal be niib pala n ninŋ, n tie’b Foŋanm nyan t mɔ nyan. G ŋɔn k u tuo g gaal’b. 9U g tien baa siɛl yaa lugdm tinm yen banm siign. U penn b pala g dugn b dug u po. 10Laabaal k i dalg Yendu, g tunŋ Kristo‑yab tugl nba k t yaajanm bo g fid g tug k tinm mɔno biɛ g fid g tug i ? 11Ama Yonmdaan Yiesu Kristo ŋalbalg po i, k t dug k t la fielu nyan banm nyan. » 12L youg, g yab bo be l buol kul suon. G Barnabas yen Pɔl dugn’m yaalidug bona nba yen palug nba g Yendu bo te k b tien yab g tie Suif‑nba siign. K b kul cenŋ. 13Ban maad g gbenn, g Saak gaal maam g maad: « N ninjanm, cenŋ man n maam. 14Simɔn dugn Yendu n cind g lugd niib nand, yab g tie Suif‑nba siign k ban te u buolu. 15K l tuag yen Yendu sogni‑nba n bo maad yal ; g dugn Yendu Kadaaɔg n, Yonmdaan bo maad: 16“ L po gii pend, n bu guan g maa Dafiid ŋaag nba bo baa. G ŋanm g fiin u digbeonŋ g sen. 17L youg niib nba tenn bu kpaan Yonmdaan, banm yen buoli nba kul k n yiin’m k ban te n yab. Yonmdaan n maad yal nba n nyan. 18U ŋɔn l bona kul hal youg n ninŋ yo ”. » 19G Saak pugn g maad: « L po n te k min diid g sua k t bo kan gii pugd buolfanu yab tuga, yab tug b kua g cab Yendu. 20Ama t diɛn g maad’b man, k ban suol b kua yen padnand yen cunconm yen bonkobd nba kpe k b g kod, g suol b kua g daa di sɔm. 21G dugn hal youg n ninŋ yo, g niib lii Moyis kadaaɔg g muand dingbana kul n ninŋ, g biɛ lii tintaann died n Saaba daal kul. » 22Lann i g Yiesu sundi yen Kristo‑yab nikpela yen Kristo‑yab tintaanu niib kul kal, g suol k l tie k ban lugd siɛb b ninŋ i, g sun’m k ban yeg yen Pɔl yen Barnabas g gad Antiyɔs. B bo lugd Silas yen Suud, yua k b bo yi’ug Barsabas. B bo tie niib nba k b ninjanm Kristo‑yab cɔln’m i. 23Ban bo diɛn yal kadaaɔg n g tie’b k ban gad yenn n ne: « Yiesu sundi yen Kristo‑yab nikpela fuond b ninjanm Kristo‑yab nba g tie Suif‑nba g be Antiyɔs yen Siiri yen Silisi. 24T gbad g niib nyiɛ t siign, g gad i buol yen maam g ŋmad i yam g kuan’i maalm, k t yen g sun’m. 25L po n te k t taan mɔb g lugd niib t siign g sun’m k ban yeg yen t dɔnn‑nba Barnabas yen Pɔl, g gad i buol. 26Banm nba tuo g lu b miɛl t Yonmdaan Yiesu Kristo po. 27T sun Suud yen Silas n nyan i buol k banm mɔno n maad’i tin diɛn’i yal. 28Tinm mɔno yen Foŋanm diid g sua k l g dagd k tin gii pugd’i tuga, l gii g tie kɔa nba tie bonmɔnn k i kan fid g ŋaa kua i kaa. 29Lan tie k i kan ŋman padnand, i kan di sɔm, i kan ŋman bonkobug nba kpe k b g kod, i kan gii conm. L gii tie k i ŋaa l bona kul ne, l baa ŋan. I be man pamann n. » 30Lann i g yab nba k b bo sun’m nyan cab’b g gad Antiyɔs. Ban pund, k b tigl Kristo‑yab g tie’b l kadaaɔg. 31Ban lii l kadaaɔg k l paan b pala, k b pala manŋ bonciɛnn. 32Suud yen Silas mɔno bo tie Yendu sogni‑nba i. B bo maad maam bonciɛnn g paan b pala, g yed k ban ŋanm gii diɛ k l paa. 33Ban tien dana ŋanŋaa, k b ninjanm Kristo‑yab nba be l buol cab’b k ban lebd g kun yab daan sun’m buol yen laafiɛ. [ 35G Pɔl yen Barnabas nuan be Antiyɔs, k banm yen b lieb bonciɛnn tund g biɛ muand niib Yonmdaan Laabamann. 36Lan tien dana waam, g Pɔl maad Barnabas: « T lebd doi nba ninŋ kul k t daan muand Yonmdaan maam nyan, g gɔnn t ninjanm Kristo‑yab, g liɛ b be nle. » 37Barnabas bo bua k b gii saa ban tug San, yua k b yi’ug Mark nyan i, k ban yeg. 38Ama g Pɔl yie g Mark ji kan ŋuan’m ; g dugn Mark bo yie hal Panfili doug n yo, g paad, g g taan’m k b bu sun b tuonn. 39B bo gag yen lieb bonciɛnn g tan juod g paad. G Barnabas tug Mark k b kua ŋadunŋ g gad Sipr. 40G Pɔl mɔ tug Silas. K b ninjanm Kristo‑yab jaand g miɛl Yonmdaan ŋalbalg Pɔl po, k wano yen Silas tol, 41g tɔgn Siiri yen Silisi doi n ninŋ g paand Kristo‑yab tintaanu niib pala.

will be added

X\