Tuona 14

1Pɔl yen Barnabas bo pund Ikoniyɔm, g yaan gad g kua Suif‑nba tintaann dieog n, g maad maam hal k l kua Suif‑nba yen yab nba g tie Suif‑nba pala n, g bonciɛnn tuo g gaal Yiesu. 2Ama g Suif‑nba nba bo g tuo b maam nyan, tud tud yab bo g tie Suif‑nba k b yam nyiɛ b ninjanm nba tie Kristo‑yab n ninŋ. 3G Pɔl yen Barnabas kal g wai Ikoniyɔm doug n. B bo dug Yonmdaan po, g muand u maam g g jie baa siɛl. G Yonmdaan ŋɔn k u ŋalbalg be yen’m, g te k b tie yaalidug bona yen palug. 4L doug n niib ji bo bɔgd caga ŋanle i, g yenm ŋua Suif‑nba g lieb mɔ ŋua Yiesu sundi. 5Suif‑nba yen yab g tie Suif‑nba yen b yudanm bo bobnd g bu cagn Pɔl yen Barnabas g biɛ jaa’b tana g kpi’b. 6Ama banm banle n gbad l maam yaa youg, k b san g gad Listr g tuad Dɛrb yen l dingbankunkogi n. L doi be Likaaɔni tinŋ n i. 7L po mɔ k b biɛ muand Laabamann. 8Listr doug n bo mɔg jua nne k u titala kul kpe. B bo mal’o k u tie wabg i, u bo g ban g sonm palb. 9G diyenn k u tan kal g cenŋ Pɔl maam, g Pɔl nyuan’o suoo g la k u dug k u bu fid g paag. 10K u maad’o yen paalu: « Fiil g sed a titala po. » K u yug g cii, g ji sonm. 11Niwulug nuan n l la Pɔl n tien yal, k b yign yen paalu banm Likaaɔni yab maam n g maad: « T yendui n kpand niib g jiid t buol. » 12Lann i k b pul Barnabas « Seos », g pul Pɔl mɔ « Ɛrmɛs », g dugn wano n bo tun g maad. 13G yua bo tu yid yendu Seos salg nyan, tug tiidi puud g tien laani g lan naatona g baal yen’m doug dimɔb n. K wano yen niwulug bu yid Pɔl yen Barnabas salg. 14Ban gbad nnyan, k b dad g pad b tiɛd, g san g kua niwulug n g ta g maad: 15« T ninjanm, laabaal k i tie nnyan i ? T mɔ tie niib nyan yinm nyan i. T baal g muand’i Laabamann i, k l tie k yin ŋaa yin naan bona nba g yi g yendui, k l yen g mɔg niimn nyan, g ji tug i kua g cab Yendu nba fo, g tag polu yen tinŋ yen mɔgl, yen bona nba kul be l kul ne ninŋ. 16Youg nba pend Yendu bo ŋaa g buolu kul tuag u yul po sɔnu i. 17Ama yen l kul ne, Yendu nba be polu po bo tie’b ŋanm g ŋɔnŋ’b u buam ; g te g taag baa, g te g jied tie siɛɔg kul, g biɛ te k b be pamann n. » 18Pɔl yen Barnabas n bo l maad’b yal kul, b bo la fala bonciɛnn yo, g tan pan’m k b g fid g yid’b salg. 19L youg g Suif‑nba nyiɛ Ikoniyɔm yen Antiyɔs nba be Pisidi nyan, g baal g sagn niwulug yen Pɔl‑nba, g jaa Pɔl tana g tan mali k u kpe i, g fil g nyan’o doug n. 20G Kristo‑yab baal g sed g lind’o, k u fiil g kua doug n. K l fann k wano yen Barnabas gad Dɛrb doug n. 21Ban muand Laabamann l doug n, g niib bonciɛnn te Kristo‑yab, k b lebd Listr yen Ikoniyɔm yen Antiyɔs nba be Pisidi nyan. 22B bo paand Kristo‑yab pala, k ban ŋanm gii sie dindann n. B bo maad: « T bu la fala bonciɛnn yo, g fid g kua Yendu diem n. » 23Lann i k b lugd nikpela Kristo‑yab tintaanu n ninŋ kul, g lol mɔb g jaand b po, g tug’b g kubn’m Yonmdaan nuu n, wano nba k b dug u po. 24G nyiɛ l buol, g pend Pisidi g gad Panfili doug n, 25g daan muand Yendu maam Pɛrse, yen Atali. 26L buol i k b tug ŋadunŋ g lebd Antiyɔs. L doug n i, g Kristo‑yab bo miɛl Yendu ŋalbalg, g kubn’m tuonn nba k b sun. 27Ban pund l doug n, k b taan Kristo‑yab tintaanu niib, g dugn’m Yendu n te k b tien yal kul, yen lan tien nand g Yendu luod sɔnu, g buolfanu yab mɔ ji bann’o. 28K b kal l buol yen Kristo‑yab g wai bonciɛnn.

will be added

X\