Tuona 13

1Antiyɔs Kristo‑yab tintaanu n, Yendu sogni‑nba bo be, g yab tund niib Yendu maam mɔ be. Lan tie Barnabas yen Simeyɔn yua k b yi’ug Nibɔnn, yen Siirɛnn jua Lusiyus, yen Manayɛn yua k b bo taan g ŋub’o yen gobna Erod. Sɔl mɔ bo be. 2G diyenn k b lol mɔb g dond Yonmdaan g Foŋanm maad’b: « Lugd man Barnabas yen Sɔl k ban sun tuonn nba k n yiin’m k ban sun. » 3Ban lol mɔb g jaand g gbenn, k b maan nui Barnabas yen Sɔl po g ji cab’b k ban gii saa. 4Lann i g Foŋanm sun’m k b gad Selesi. L buol i, k b kua ŋadunŋ g gad doug nne ninŋ g nyum kaan g lind, k b yi Sipr. 5Ban tan pund Salamiinn doug n, k b muand Yendu maam Suif‑nba tintaann died n. San Mark bo be yen’m g tod’b. 6K b nyiɛ l buol g tɔgn Sipr doi n ninŋ kul, g daan pund doug nba juod k b yi Pafɔs, g la nyɔgdaan nne k u yi u kua k u tie Yendu sogni. U bo tie Suif i, k b yi’ug Bar‑Yiesu. 7U bo be gobna Sɛrgiyus Pɔlus buol i. L gobna yam bo fo. Wano n bo tan yiin Barnabas yen Sɔl g bua yen u pal kul wan cenŋ Yendu maam. 8Ama g yua bo tie belbɔnd, g Grɛk‑nba maam n k b yi’ug Elimas nyan, bo yie g kpaan k wan bel Sipr gobna k wan daa tuo g gaal Yendu maam. 9Lann i g Sɔl, yua k b biɛ bo yi’ug Pɔl nyan, bo gbie yen Foŋanm g nyuan’o suoo g tan maad: 10« A tie nil nba gbie yen janmi g biɛ gbie yen tonu i. A tie Sitaan bija i, g mɔg nanŋ yal ŋan kul po. Bɛ youg po i, k a tan bu ŋaa g kan biil Yonmdaan sɔni i ? 11Mɔlane po, cenŋ ne. Yonmdaan bu dad a tubl g te ŋan juan. L bu yann k a ninbinn g la yendu yinyiem. » L youg mɔno k u juan g ji jiln g kpaan yua nba bu dadb’o. 12Sipr gobna n la yal nba bo tien yen wan bo cenŋ tundl nba Yonmdaan po, k l sii u pal hal bonciɛnn k u tuo g gaal Yiesu. 13Pɔl yen u yegni bo nyiɛ Pafɔs g tug ŋadunŋ g gad Pɛrse, Panfili doug n. L buol i g San Mark ŋaa’b g lebd Serusalɛm. 14Lann i g Barnabas yen Pɔl nyiɛ Pɛrse g gad Antiyɔs, Pisidi doug n. G Saaba daal k b kua Suif‑nba tintaann dieog n ninŋ g kal. 15Ban lii Moyis kadaaɔg yen Yendu sogni‑nba kadaaɔg g gbenn, k l tintaann dieog n canbaa‑nba sun k b maad’b: « T ninjanm, i gii mɔg siɛl yaa lanbona g bu paan niib pala, yin gaal maam g maad. » 16Lann i g Pɔl fiil g ŋag nuu g maad: « Israyɛl buolu yen yinm yab nba jie Yendu, cenŋ man ne: 17Israyɛl yab, Yendu n bo lugd t yaajanm, g te k b mal g yabd youg nba k b bo be Esipt doug n g tie saanm. K u paalu po k u yuand g te k b nyiɛ Esipt doug n. 18Wano n bo kub’b bina piinna tinkuonŋ n ninŋ, 19g biɛ pua g yaan buoli ŋanlile Kanaan doug n, g tug b tinŋ g tie’b. 20L kul ne bo tien bina kobiinna yen piinmu siign i. L puol po k u lugd t yaajanm siign buuddanm saa yen Yendu sogni Samiɛl youg. 21K b yuand g bual bad po, g Yendu tie’b Kis bija Saawul, k u kaln kog po bina piinna. U bo tie Bɛnsamɛn cugl n jua i. 22G Yendu tan yie’og g lugd Dafiid k u te b bad. Yendu bo maad wano i g tua: “ N la Sese bija Dafiid, u dagd n po g bu fid g tien min bual yal kul. ” 23Wano Dafiid yaabuona n ninŋ i, g Yendu lugd Yiesu k wan fiel Israyɛl buolu nyan wan bo puon nand nyan. 24San bo liid g muand Israyɛl buolu k ban lebd b binbem g wul nyum ; l bo sua g Yiesu daa g baal. 25San tuonn n ji bo saa g bua n gbenn, u bo maad: “ Yin mali k n tie yua nba nyan, n g tie wano kaa. N puol po sua be g baad. N g dagd yen min lod u taacagbani. ” 26N ninjanm, yinm nba tie Abraham yaabuona yen yinm nba jie Yendu, Yendu sun k b maad tinm i l fielu maam. 27Serusalɛm yab yen b yudanm bo g bann Yiesu n tie yua. B biɛ bo g gbad Yendu sogni‑nba kadaaɔg nba k b lii Saaba daal kul niimn. L po n te k b bo jalg Yiesu. Nnyan, k b tien Yendu sogni‑nba n bo liid g maad yal. 28B bo g la ban bu jalg’o yal nba po g kpi’ug. Yen l kul, b yen bo miɛl Pilat k wan te k ban biɛn’o. 29Ban tien’o nyan lan bo liid g diɛn nand u po Yendu Kadaaɔg n ninŋ nyan, k b nyan’o dapunpɔnn po g jiin’o kakul n ninŋ. 30Ama g Yendu te k u yied kpienm siign. 31G niib nba bo yegd yen’o g nyiɛ Galile g gad Serusalɛm nyan la’ɔg dana bonciɛnn. Banm n ji tie u sieda‑nba mɔlane Israyɛl niib buol. 32Tinm mɔno, t muand’i l Laabamann n nyan. Laabamann nba g Yendu bo puon t yaajanm. 33U tien lann n nyan tinm nba tie b yaabuona po, g yied Yiesu nyan lan diɛn Biɛyani kadaaɔg n lanmgbenŋa ŋanle buol nand nyan. L bo diɛn g maad: “ A tie n Bija i. Dinne min n tie a Baa. ” 34Yendu bo maad k u bu yied Yiesu kpienm siign, k wan ji daa ban g kpe. U bo maad lann i g tua: “ N bu te’i bona nba k n bo puon Dafiid, yal ŋan g dagd g biɛ bu tien yen mɔni. ” 35L po n te k l biɛ bo diɛn siɛl buol g maad: “ A kan ŋaa a niŋan gbannand ń bed kakul n. ” 36Dafiid nuan n bo be yaa youg, u bo sun Yendu tuonn nyan Yendu n bo bua nand nyan i, k l puol po k u kpe, k b pii’ug g kpiɛn u yaajanm k u gbannand yen bed. 37Ama Yendu n yied yua nba, u yaa gbannand g la g bed. 38N ninjanm, l tie k yin bann ne i, Yiesu po n te k b muand’i biid sugl maam. Moyis yiko bo g fid g piin i biid. Ama yab nba kul dug Yiesu po, b biid bu piin. 40Lann, suol man i kua g daa ŋaa Yendu sogni‑nba n bo maad yal ń baal’i. B bo maad: 41“ Yinm nba nund Yendu maam ne, diid man, n bu tien bonn g sua k i daa be g mɔg miɛl ne, k lan lid’i k yin bod. L bo gii tie g nil n maad’i l bonn, i bo kan tuo. ” » 42Pɔl yen Barnabas n tan nyiɛ tintaann dieog n yaa youg, k b maad’b, k ban daan guan Saaba daal nba ŋua g biɛ pag yen’m l maam po. 43Tintaanu n gbenn k b yad, g Suif‑nba yen yab nba bo kua Suif‑nba jaandi, b ninŋ bonciɛnn bo ŋuan Pɔl yen Barnabas. K b pag yen’m g pugn’m papaal k ban gii be Yendu ŋalbalg n. 44L Saaba daal n pund, g doug n niib kul ŋman g tigl g bu gbad Yonmdaan maam. 45Suif‑nba n la niwulug, k b fiil yen nanŋ Pɔl po, g nai u maam g sugd’o. 46Lann i g Pɔl yen Barnabas maad’b g g jie baa siɛl: « B daa bo bu cind g muand yinm i Yendu maam. Ama yin yie l maam, g biɛ diid g sua k i g dagd yen yin la miɛl nba kan ban g gbenn nyan, to, lann t ji bu gad g muand yab g tie Suif‑nba i. 47G dugn Yonmdaan n tie’ti mɔbonn nba n ne: “ Min n tug’a k a gii tie ŋanduna yinyiem, g fid g muand fielu maam ŋanduna n ninŋ kul ”. » 48Yab g tie Suif‑nba n gbad l maam, k b pala manŋ bonciɛnn, k b ji tua g Yonmdaan maam man. G yab kul bo tie k ban la miɛl nba kan ban g gbenn, tuo g gaal Kristo. 49Nnyan i g Yonmdaan maam bo yad l doug n kaannaa kul. 50Ama g Suif‑nba tud tud b tintaanu n ninŋ puoŋalmandanm yen doug n yudanm, k b biil biil maam k b kul fiil g yie Pɔl yen Barnabas po, g bel’b g nyan’m b doug n. 51Lann i g Pɔl yen Barnabas pid pid tangulunŋ b titala po k l ŋɔnŋ k l la banm i, g nyiɛ l buol g gad Ikoniyɔm. 52Kristo‑yab nba bo be Antiyɔs nuan bo be pamann n i, g biɛ gbie yen Foŋanm.

will be added

X\