Tuona 12

1L youg g Bad Erod cil g cagn Kristo‑yab tintaanu n ninŋ yenm, 2g te k b kpii Saak yen jug. Saak bo tie San ninja i. 3Erod n la g Suif‑nba pala manŋ l po, k u biɛ te k b suol Piɛr mɔ. L bo tie youg nba k b tu ŋman kpanu nba k b g tien yen dibina nyan i. 4Erod n te k b suol Piɛr k u luon’o, u bo te g sijenm caga ŋanna n guu’ug. Cagl n ninŋ kul bo mɔg sijenm banna i. U bo guu g Suif‑nba fielu jaanm po ń pend yo, wan fid g bu’ug niib kul nunŋ n. 5Piɛr bo be dansaldieog n i, g Kristo tintaanu yab l jaand u po yen ninmɔnn. 6Nyiɛɔg nba bo bu pend, lan fann Erod ń bu Piɛr niib kul nunŋ n, l nyiɛɔg, l sua g Piɛr luol yen kudsiseli yinle, g dua sijenm banle siign, g gɔ. G sijelieb sie dimɔb n g guu. 7Lann i g malɛg tan kpil g legd, g yinyiem yend dieog, k u paa paa Piɛr logl, g fiin’o g maad: « Fiil tonm. » L youg mɔno, g kudsiseli nyiɛ u nui po g baa. 8G malɛg biɛ maad’o: « Lol a gbann g pil a taacaad. » G Piɛr tien nnyan. G malɛg guan g maad’o: « Liɛ a gbagdl gii ŋua. » 9G Piɛr ŋuan malɛg g nyiɛ. U bo g ban g malɛg n tien yal tie mɔni. U bo mali k l tie danŋd i. 10K b pend cincinn cagl sijenm, g guan g pend munle po yab g ji pund dimɔjal nba k l gann tien yen kuda nyan buol. L dimɔb bo tuol yen sɔnu nba saa doug n i. K l gann luod l kukua k b nyiɛ g tug sɔnu g saa. K b tan pund l sɔnu juog, g malɛg kpil g yaad g ŋaa Piɛr. 11L youg u g Piɛr ji fid g bann yal nba tien g maad: « Mɔlane, n ji bann k l tie mɔni i g Yonmdaan sun u malɛg k wan baal g fiel’n Erod nui n, g biɛ nyan’n bonbiiug nba ninŋ g Suif‑nba bo mali k ban kuan’n. » 12Wan gbad l niimn k u gad Mari ŋaag. Wano Mari bo tie San nba k b yi’ug Mark nyan naa i. L buol, Kristo‑yab bonciɛnn bo taan g jaand. 13Piɛr n pund g kuo kuo dimɔjal gann, g sipaan nba suun l buol k b yi’ug Rode nyan baal k wan diid. 14Wan bann k l tie Piɛr niɛlu, k u pal manŋ g pend, k u ŋaa gann luodu, g san g lebd u lieb buol, g maad’b g Piɛr be dimɔb n. 15K b ŋmiɛn’o: « A baa waad i ! » Ama k u ŋanm g maad k wano i, k l tie mɔni i. K b maad k lann l yen baa tie u malɛg i. 16L sua g Piɛr l sie g pua gann i. K b luod g la k l tie wano, k l suol’b yaalidug. 17G Piɛr ŋag’b nuu g maad k ban suon. Lann i g dugn’m Yonmdaan n tien nand g nyan’o dansaldieog n ninŋ. G biɛ maad: « Gad man g maad Saak yen t ninjanm Kristo‑yab nba tenn. » L puol po, k u nyiɛ l buol g tol siɛl po. 18Lan fann, g nyɔgl tien hal bonciɛnn sijenm siign. K b ji bual g Piɛr ji juod lɛ yaa a ? 19K Erod sun k b kpaan’o naan kul, ama b yen g la’ɔg. Lann i k u bual sijenm nba bo guu Piɛr nyan buali, g cab mɔb k ban kpi’b. L puol po, g bad Erod nyiɛ Suude g gad Sesaare, g tien daa ŋanŋaa l po. 20Erod pal bo bie Tiir yen Sidɔn niib po bonciɛnn. K b taan mɔb g bu gad g la’ɔg, g baa yen Blastus, yua bo guu bad n dua naan, k b gad g miɛl Erod sugl g laafiɛ ń gii be. G dugn b jied kul bo nya u doug n i. 21Ban bo bu la Erod yaa daal bo pund, k Erod liɛ u kpanbatiɛd, g kal u badkog po, g pii laabaal niib kul nunŋ n. 22G niib kul ji yign g maad g yendu n maad ne, k l g tie nisaal kaa. 23K l youg mɔno, g Yonmdaan malɛg baal g pua’ɔg, g dugn u bo gaal Yendu yudand. G nanguba ŋman ŋman’o k u kpe. 24Ama Yendu maam nuan bo l yad naan kul i. 25Barnabas yen Sɔl n bo sun b tuonn g gbenn Serusalɛm doug n, b bo tug San, yua k b yi’ug Mark nyan, k b kul lebd Antiyɔs.

will be added

X\