Tuona 11

1Yiesu sundi yen Suude yab nba bo dug u po bo gbad, g yab g tie Suif‑nba mɔ tuo g gaal Yendu maam. 2Youg nba g Piɛr guan g lebd Serusalɛm, yab nba bo kɔnd Suif‑nba kɔnd, g dug Yiesu po, bo jalg’o 3g maad: « Laabaal k a gad g kua yab g kɔnd ŋaag n ninŋ g biɛ dii yen’m i ? » 4Lann i g Piɛr cil g dugn’m lan daan cil nand, g yed: 5« N daan be Jope doug n i g jaand, k l tan tien’n nyan danŋd nyan k n la bonn nne k l nyiɛ polu po g ji. L bonn daan naan cincenciɛɔnŋ u, k l mɔgbana ŋanna kul luol k l jiid g tan pund n buol. 6K n ŋanm g diid l n ninŋ, g la bonkobd nba mɔg titala nna‑na yen muaɔg n bonkobd yen bonbalnkaa yen bonyugda. 7K n gbad g niɛlu nne maad’n: “ Piɛr, fiil g kpi g ŋman. ” 8Ama k n ŋmiɛn’o: Kai Yonmdaan ! Hal min be min be o, jɔgnd bonn lann i kaa ban kuan’ti yal daa g ban g kua n mɔb n. 9K l niɛlu biɛ guan g maad’n taal munle po: “ Yendu n ŋanm yal nba, ŋan daa yed k l tie kual. ” 10L daan tien nnyan i g daan biin taal muntaa, g guan g duo polu po. 11K l youg mɔno, g niib bantaa pund ŋaag nba ninŋ k t daan be. B daan sun’m k b nyiɛ Sesaare g baal n buol. 12G Foŋanm maad’n k min fiil gii ŋua’b g daa mali munle-le. Niib banluob nba ne, banm n daan ciɛn’n k t yeg g gad Kɔrnai ŋaag. 13K u dugn’ti g maad: “ N daan la malɛg n ŋaag n, k u maad’n k n sun niib Jope doug n, k ban daan yiin Simɔn, yua k b yi’ug Piɛr. 14U bu maad’a maam nba bu te ŋan la fielu, fin yen a ŋaag yab kul. ” 15Min tan cil yaa youg g maad, g Foŋanm jiid Kɔrnai yen u ŋaag yab kul po, nyan lan bo jiid t po cilg youg nand nyan. 16L youg mɔno k n tiɛd Yonmdaan n bo maad yal nba. U bo maad: “ San bo wul niib yen nyum i, yinm nuan, b tan bu wul’i yen Foŋanm i. ” 17Tin daan dug Yonmdaan Yiesu Kristo po g Yendu tie’ti paab nba, u gii pii’b l paab, n tie ŋmaa i g bu yie Yendu n tien yal b po i ? » 18Ban cenŋ Piɛr maam g gbenn, k b pala sɔnŋ, k b ji dond Yendu g tua: « Yendu cab yab g tie Suif‑nba mɔ k ban lebd b binbem g la miɛl nba kan gbenn. » 19B bo kpii Etiɛnn, k l puol po g cicagm baa yab dug Yiesu po. K b yad g yenm gad Fenisi, g lieb gad Sipr, g lieb mɔ gad Antiyɔs. Ama b bo muand Suif‑nba kua i Yendu maam. 20G nyaan b ninŋ, yenm bo be g nyiɛ Sipr yen Siirɛnn, g gad Antiyɔs g muand yab nba g tie Suif‑nba Yonmdaan Yiesu Laabamann. 21Yonmdaan paalu bo be yen’m. L po n te g bonciɛnn bo tuo g gaal Yonmdaan g te u ŋuantieb. 22Serusalɛm Kristo tintaanu yab bo gbad l maam g sun Barnabas Antiyɔs doug n. 23Wan pund g la g Yendu ŋalbalg be yen Yiesu ŋuantieb, k u pal manŋ bonciɛnn. K u paan b pala k ban ŋanm gii ŋua Yonmdaan yen b pala kul. 24U bo tie nimɔn i, g gbie yen Foŋanm, g mɔg dindann. L po n te g niib bonciɛnn bo tuo g ŋuan Yonmdaan. 25Lann i g Barnabas gad Tars g kpaan Sɔl. 26Wan la’ɔg, k u gad yen’o Antiyɔs. K banm banle kul tien binmunn g be Antiyɔs Kristo‑yab tintaanu n ninŋ, g ŋɔnŋ niib bonciɛnn bona niimn. Antiyɔs doug n i, k b cind g yiin Yiesu ŋuantieb, Kristo‑yab. 27L dana n ninŋ, g Yendu sogni‑nba nyiɛ Serusalɛm g jiid Antiyɔs. 28B ninŋ, yend, yua k b bo yi’ug Agabus, Yendu Foŋanm bo te k u maad g kom bu baa ŋanduna n ninŋ kul. L kom kon bo tan baa g sua g Klod n tie Rom bad. 29Lann i g Yiesu ŋuantieb tug yanjagl, g maad g yua kul ń te wan mɔg yal, k ban tod Suude Kristo‑yab. 30B bo taan lann i g sun Barnabas yen Sɔl, k b gad g tie Suude Kristo‑yab nikpela.

will be added

X\