1 Tewofiil, n kadacincinn n ninŋ n bo diɛn g ŋɔn Yiesu n cil g suun yal nba kul g biɛ tund niib nand 2 saa yen daal nba g Yendu don’o polu po. U bo tie u sundi nba k u bo lugd’b nyan, u mɔbonn Foŋanm paalu po yo, g fid g duo. 3 U fala yen u kuum puol po, u bo yied g ŋɔn u kua u sundi taal munŋaa kul. G tien bona bonciɛnn g ŋɔn’m k u mɔg miɛl yen mɔni. U bo tien daa piinna i k u sundi laad’o k u maad’b Yendu bal po. 4 G diyenn k u tan di yen u sundi g maad’b: « Daa fagd man yen Serusalɛm. I guu man min daan maad’i k n Baa puon’i yal nba. 5 San nuan bo wuul niib yen nyum i, ama yinm nuan, daa ŋanle b bu wul’i yen Foŋanm i. » 6 G Yiesu sundi nba bo taan u buol nyan bual’o: « Yonmdaan, mɔlane i k a bu kaan Israyɛl bal ii ? » 7 G Yiesu ŋmiɛn’m: « L g tie k yinm kaa ń bann youg nba lann i kaa dana nba k n Baa sen yen u yikod. 8 Ama Foŋanm bu jiid i po g te’i paalu. L youg, i bu kun mɔni n po Serusalɛm doug n yen Suude doug n kul, g tuad Samari g ji daan tuu yen ŋanduna munn kul. » 9 Yiesu n maad l kul g gbenn, k b la k u do polu po. G tawalgbaɔnŋ nne baal g legn’o k b ji g nyuan’o. 10 Yiesu n do k b daa sie g nyuan polu po, b sua niib banle nne sie b buol g liɛ tiɛpiend 11 g maad’b: « Galile niib, laabaal k i sie g nyuan polu po i ? Yendu n nyan Yiesu i siign g don’o nand k i la ne, u biɛ tan bu guan nnyan i. » 12 Yiesu sundi bo nyiɛ Oliif tiidi jual po g lebd Serusalɛm doug n. L jual bo g ŋanm g fag yen Serusalɛm. L bo tie nyan taabana tudl nyan i. 13 Ban pund doug n, k b duo detuadug po ban bo tu paa g be naan. Yab bo be n ne: Piɛr yen San yen Saak yen Andre yen Filiip yen Toma yen Bartelemi yen Matieog yen Alfe bija Saak, yen Simɔn, yua bo kɔn u doug po, yen Saak bija Suud. 14 Banm yen puob yen Yiesu ninjanm yen u naa Mari bo taan g mɔg maalyenm i, g jaand daal kul. 15 G diyenn, g yab dug Yiesu po taan lieb g g luol niib kobg yen piinle. G Piɛr fiil g maad’b: 16 « N ninjanm, l bo tie g Foŋanm n maad yal Yendu Kadaaɔg n, ń l tien i. U bo te g Dafiid liid g maad maam k l nyuan Suuda. Wano Suuda n tan ciɛn niib k b suol Yiesu. 17 U daan tie t yegnu i, k b tie u mɔ tuonn nba k t kul suun ne. 18 Wan daan kuad Yiesu g gaal ligli nba, u daan tug l ligli i g daa kpaab. L buol i k u daan baa finfabug, g puol pud g nuad yad. 19 Serusalɛm niib kul daan gbad l maam. G ji pul l kpaab b maam n ninŋ k Akɛldama: l niimn tie sɔm kpaab. 20 L yen diɛn Biɛyani kadaaɔg n ninŋ g maad: “ G sua ń daa kua u ŋaag n, l ŋaag ń te digbeonŋ. ” G biɛ maad: “ G sua ń gaal u tuonn. ” 21 Lan cil youg nba g San wul Yonmdaan Yiesu nyum saa yen daal nba g Yendu nyan’o t siign ninŋ, niib daan be g ŋua tinm yen wano Yiesu youg kul. Mɔlane, l tie k tin gann b siign ninŋ niyend i, k u mɔ ń gii kun mɔni g Yonmdaan Yiesu yied. » 23 Lann i k b sen niib banle: lan tie Matias yen Sosɛf, yua k b bo yi’ug Barsabas k u sanliel tie Sustus. 24 K b kul tien jaandi g maad: « Yonmdaan, fin nba nyuan yua kul pal n, ŋɔn’ti banm banle ne siign ŋan gann yua 25 Suuda yiɛl n k wan te a sundu, yiɛl nba k wano Suuda ŋaa g ji be naan dagd yen’o ne. » 26 Lann i k b tɔ tiɛ tiɛ g gann Matias, k u ji pugn Yiesu sundi piig yen yend ŋann po.
