1 N maad’a Yendu nunŋ n yen Yiesu Kristo nunŋ n, wano nba tan bu baal g bu fuodb yen kpienm, wan bu baal gii tie bad po n te k n maad’a, 2 k a gii muand Yendu maam youg kul, l gii man yaa youg uu, l gii g man yaa youg uu, fin ń tu ŋanm g maad g led led. I ŋmagd niib, gii fu yen’m, gii paand b pala. Tu kpi yam o gii ŋɔnŋ’b l kul ne, k lan ŋanm g te’b tundl. 3 Yen mɔni, youg baad k l tan baa yiɛl siɛb yen ban gii cenŋ mamɔni tundl mɔno. B baa ŋua b pala n kɔn bona nba po i, g kpaan gbanbanda bonciɛnn g kul b kua. 4 B tuba n ninŋ n yaan saad nyan, b ji bu ŋaa mamɔni tundl yo, g ji gii cenŋ b kpelug. 5 Fin nuan ń suol a kua bonn kul n ninŋ. Tuo g gaal fala, g muand Laabamann, g ŋanm g sun Yendu tuonn g juod. 6 Min nuan yaa youg pund o. B ji diɛ n sɔm g wulg g yid salg i. N kun daal pund o. 7 N kɔn kunkɔnn nba ŋan, g san nantaal g gbenn, g kub n dindann. 8 Mɔla po n nantaal pani ji dua g guu’n i. L mɔnkund pani i k t Yonmdaan bu te’n buud daal, wano nba tie mɔnkund buuddaan. U kan te min kukua kaa, u bu te yab nba guu u legdu yen b pala kul i. 9 Mɔnd g tien tonm g baal n buol, 10 g dugn Demas mand g buad ŋanduna ne manu, g yaad g gad Tɛsaloniik g ŋaa’n o. Kresɛs gad Galasi, Tiit mɔ gad Dalmasi u. 11 Luk kukua n ji be yen’n. Tug Mark g baal yen’o nii, u bu tod’n bonciɛnn n tuonn n ninŋ. 12 N sun Tisiik Efɛs doug n. 13 A gii baad, ŋan tug gbagdl nba k n daan ŋaa Trowas, Karpus buol nyan nii. Tug kadaad kul nii, n pal ŋanm g kɔn bonkobgband nba k b da l po nyan i. 14 Alɛksandr, yua nba tie mamaal nyan, daan tien’n yal nba bi paaa. T Yonmdaan n bu ŋmiɛn’o u biid nyuad. 15 Mɔ ń lɔgl’o, g dugn u daan yie t tundl yen jad bonciɛnn. 16 Ban daan cind g bu bu’n yaa daal nba, sua daan g sed n puol po. B kul daan yad g ŋaa’n i. Yendu ń daa jalg’b l po. 17 T Yonmdaan nuan daan taa n po, g tie’n paalu k n muand Laabamann lan bual nand, g yab g tie Suif‑nba kul gbad. Wano n daan nyan’n kuum fiɛl n ninŋ. 18 Wano n bu nyan’n bonbiil kul n ninŋ g fiel’n, g te min gad u diem n ninŋ polu po. Yudand ń gii tie u yal, mɔlane saa yen youg nba g mɔg juog ! Amɛnn. 19 Fuond Priska yen Akilas yen Onesifɔr ŋaag yab n po. 20 Erast daa be Korɛnt. Trofiim mɔ daan yiɛl k n gbal g ŋaa’ɔg Mile. 21 Mɔnd g baal g sua g fawaaɔg youg daa g baal. Ebuul yen Pudɛs yen Linus yen Klodia yen t ninjanm kul fuond’a. 22 Yonmdaan ń gii be yen’a. U ŋalbalg ń gii be yen i kul.
