2 Timote 3

1Ŋanm gii ban g dijijuog dani n ninŋ, l baa paa. 2Niib baa tie yab nba mali b po kua i, g ŋanm g bua ligli, g donŋ b kua, g mɔg jigbelm. B baa sugd Yendu, g g cɔln b danm. B kan gii mɔg ŋanm. B kan gii cɔln yal nba tie Yendu bonn kul. 3B baa tie niib nba biɛ, g g jie nil ninbaaɔg, g mɔg sanjounŋ, g mɔg jad, g mɔg tonu. B kan gii bua tuonŋana nublu. 4B baa tie niib nba kuad b lieb i, niib nba k b yam ton, g jipaad gbie yul, k b bua yal nba man b po g cie Yendu. 5B baa tie bona nba naan nyan niib nba ŋua Yendu yen b pal kul nyan i, g yen yie yal nba tie dindann paalu mɔno. Daa kuand a kua l nibuolu n ninŋ. 6B ninŋ yenm be g tu kua ŋai n ninŋ, g la puoliini nba sun tuonbiid nba l be kul, yab kpaan manu nba g mɔg niimn kul, g bɔnd’b ban gii ŋua’b. 7L puobuolu n l banŋ youg kul, g yen kan ban g bann mamɔni. 8Nyan Sanɛs yen Sanbrɛs n bo yie Moyis maam nyan, l nibuolu mɔ tie nnyan i, b yie mamɔni sɔnu u. B tie niib nba k b yula kpe, k b dindann juan g lenŋ i. 9B bɔndug kan gad fagm, g dugn l kan wai yen niib kul ń bann b yukpientuona nyan niib n bo tuod g bann Sanɛs yen Sanbrɛs tɔgu nyan. 10Fin nuan ŋanm g gbad n tundl, g ban n binbem, g ban n pal n kɔn k n sun yal nba, g ban n dindann, g ban n mindl, g ban n buam yen n juunn. 11A ban fala nba k b ŋɔn’n yen cicagm nba k n cagn Antiyɔs yen Ikoniyɔm yen Listr. Fala buollanu po i k n g la i ? Ama Yonmdaan yen nyan’n l kul ne ninŋ. 12L kon tie mɔni i, yab nba kul ŋua Yiesu Kristo g bua ban gii tuag Yendu sɔnu, b bu cagn’m. 13Ama tondanm yen jabaabuula nuan baa l tie biid i, g saa liig. B baa l bɔnd niib i, g bɔnd b kua. 14Fin ń ŋanm gii diɛ ŋan banŋ yal nba, g tuo k l tie mɔni. A yen ban ŋan banŋ niib nba buol. 15A bim n yo k a bo tuod g ban diɛni nba be Yendu Kadaaɔg n g bu fid g te’a yanfuom, ŋan gii dug Yiesu po g la fielu. 16Yendu Kadaaɔg n diɛni kul nyiɛ Yendu buol i. L ŋan g bu fid g tund nil, g te wan bann k wan suun yal g ŋan, g ŋmagd’o, g ŋɔn’o binbem nba dagd Yendu nunŋ n. 17Nnyan i, g Yendu nil bu fid g ŋanm g bobn g gbenn gii suun tuona nba ŋan kul.

will be added

X\