2 Timote 2

1N big, fin nuan ń paan a pal yen ŋalbalg nba k t mɔg Yiesu Kristo n ninŋ. 2Min bo maad yal g niib bonciɛnn be g tie sieda‑nba, k a mɔ be g gbad nyan, tug g luan niib nba tie nimɔnm k a dug b po, yab bu fid g mɔ ń fand lieb. 3Tuo g cagn nyan Yiesu Kristo sijemɔn nyan. 4Sije nba bua g yua lugd’o pal ń gii man u po, u g suun tuonfana, l gii g tie sijenm tuona i kaa. 5Niib mɔ gii bign gbigbaal k l mɔg pani, g yua nba g cɔln lan bo bual g gbigbaal ŋann ń tien nand, g gul u lua, l daan kan la pani. 6Kpakuol mɔ biɛ gii ŋub g sun tuonn yen ninmɔnn, wano n bu cind g gaal kpaab jied. 7Ŋanm g cenŋ min maad’a yal nba ; Yonmdaan bu tod’a ŋan gbad bonn kul niimn. 8Tiɛd Yiesu Kristo po, wano nba tie Dafiid yaabuonn, g yied kpienm siign. N muand l laabaal n nyan. 9L po i k n la fala, k b tan lol’n mɔno nyan n tie nikpiil nyan. Yendu maam nuan yen g luol. 10L po n te k n tuo l kul ne, g dugn Yendu nigannkab po, k ban mɔ ń la fielu nba be Yiesu Kristo n ninŋ, yen yudand nba g mɔg gbennu. 11Min bu maad yal ne tie mɔni i: Tinm yen wano gii taan g kpe, tinm yen wano n bu taan gii fo. 12T gii tuo g bu taan g gaal fala yen’o, tinm yen wano n tan bu taan g di bal. T gii yie k t g ban’o, u mɔ tan bu yie k u g ban’ti. 13T ji gii g cɔln t puoni yen’o, wano nuan baa l diɛ u puoni yen’ti ni, g dugn u kan fid g yie u kua. 14I tiɛd a niib l bona kul ne, gii cegl’b Yendu nunŋ n k ban daa kɔn lanbona po. L g pugd siɛl, l biɛnd yab nba cenŋ l lanbona kua i. 15Fin nuan ń mɔnd g ŋɔn a kua Yendu nunŋ n, k a tie nil nba k wano Yendu diid g sua k a sie k l paa, tuonsunn nba g fai g mɔg’o, yua nba diɛ mamɔni mɔmaam g ŋɔnŋ niib lan bual nand. 16Daa kuand a kua mafinfam n ninŋ, lann buond nil dindann i. Yab nba tug b kua g kun l maam, l baa l fagnd’b yen Yendu i. 17B maam tie nyan yiɛɔg nba tu dɔln dɔln g daan yend gbannand kul nyan i. Imene yen Filɛt tie l nibuolu i. 18B ŋaa mamɔni sɔnu g tua g yiedu youg baal g pend o. B tie nnyan i, g niib bonciɛnn buond b dindann. 19Ama Yendu fiɛgl nuan yen sie g paa ; k u diɛn banm l po. L banm n ne: « Yonmdaan ban yab nba tie u niib. » G biɛ pugn: « Yua nba taan Yonmdaan sann kul wan ŋaa tuonbiid sunu. » 20Ŋaciɛnŋ n ninŋ, jetienbona nba k b tag yen wula lann i kaa yen ligtana kua kaa be. Daad yal be, g yɔug yal mɔ be. Yenn‑nba be sel po, g liel‑nba mɔ be tuona nba g tie sel yal po. 21Lann nil gii nyan u kua biid nba k n maad ne ninŋ, u baa tie jetienbonn nba be sel po i. G dugn u ji g mɔg siɛl yaa jɔgnd, u tie bonbuakal i ŋaagdaan po, g ŋan g dagd yen wan tug g sun tuonŋana kul. 22Lɔgl tɔgu nba g nipaaɔnŋ paa g diɛ g suun yenn tuonn. Tɔgn mɔnkund yen dindann yen buam yen laafiɛ sɔnu yen niib nba taan Yonmdaan sann yen papienn. 23Daa kua jadm n yen mafinfam mɔniɛɔg n. A yen ban, lann baad yen kunkɔna i. 24Yonmdaan tuonsunn mɔ yen kan gii tie filkpaandaan. U baa tie yua nba k u yam dinŋ niib kul po, yua nba ban tundl, g mɔg panyiil. 25Yam yen yam i k u baa ŋmagd yab yied u tundl, gii dug k l g kua Yendu bu te ban lebd b pala g bann mamɔni, 26g ji guan g la maalŋanm g nya Sitaan diɛd n ninŋ ; wano n diɛ’b g niind’b k b suun wan bua yal nba.

will be added

X\