2 Timote 1

1Min Pɔl n da kadaaɔg ne, Yendu yanbuam n i, k n tie Yiesu Kristo sundu. Yendu bo puon’ti miɛl, k l be Yiesu Kristo n ninŋ ; n be k min gii muand l laabaal i. 2N fuond’a Timote, n bibuadg. T baa Yendu yen t Yonmdaan Yiesu Kristo ń yad yedŋanm a po, g te’a pasiɛdl yen yam nba dua. 3Yendu n yen nyiɛɔg, min tu jaand, n tu tiɛd a po youg kul g tien Yendu balg, wano nba k n suun u tuonn yen papienn nyan n baa‑nba n bo sun nand nyan. 4N tiɛn a ninsiid po, k n pal kɔn k n guan g la’a k n pal ń manŋ bonciɛnn. 5N tiɛn ŋan dug Yiesu po yen papienn nba. A yaa Loyis yen a naa Enis n bo cind g mɔg l dindann. N ban k a mɔ l mɔg l dindann i. 6L po n te k n tiɛd’a, k a ŋanm g kub paab nba g Yendu bo tie’a, min bo maan n nui a po yaa youg. 7Yen mɔni, Yendu n tie’ti Foŋanm nba g tie yal baa kuand’ti jiwaani kaa. L tie yal bu kuan’ti paalu yen buam yen mindl i. 8Lann daa jie fai yen ŋan maad ŋan ban yal t Yonmdaan Yiesu po, g biɛ daa jie fai n mɔ yaa po, min nba tie dansalg g dugn u po. Nyii Yendu n tie’a paalu nba po, g tuo g cagn yen’n Laabamann po. 9Wano Yendu n fiel’ti g yiin’ti k tin gii tie u yab. L g tie t tuona po kaa, u ŋalbalg po i k u tien wan bo sen k u bu tien yal nba. U bo tie’ti l ŋalbalg i Yiesu Kristo n ninŋ, g sua ŋanduna daa g cil. 10U ŋɔn’ti l ŋalbalg n nyan mɔlane t Fietua Yiesu Kristo baalu n ninŋ. G dugn Yiesu Kristo paad kuum, g ŋɔn’ti miɛl nba g mɔg gbennu n tie yal nba. U Laabamann ŋɔnŋ l miɛl i. 11U tug min i, g tien u sundu, k n gii muand l Laabamann, gii ŋɔnŋ niib l niimn. 12L po n te k n be cicagm ne ninŋ. L yen g mɔg’n fai g dugn n ban min tug n dindann g tien yua nba ninŋ, g biɛ dug u po k u bu fid g kub wan guun’n yal nba, saa yen l Daal. 13Maŋanm nba k n ŋɔn’a nyan, i tuag l sɔnu, yen dindann yen buam nba g Yiesu Kristo tien’ti. 14Foŋanm nba be t ninŋ ń tod’a k a ŋanm g kub tundŋann nba k a gaal. 15A yen tuod g ban, yab nba be Asi po kul yad g ŋaa’n o. Figɛl yen Ɛrmogɛnn tie yenm‑nba n nyan b ninŋ. 16T Yonmdaan ń jie Onesifɔr ŋaag yab ninbaaɔg, g dugn wano daan tund g paand n pal. U biɛ daan g jie fai yen min be yen kudsiseli. 17Wan daan baal Rom, u daan kpaan’n mɔno g la fala yo, g tan la’n. 18Buud daal gii pund Yonmdaan ń jie’og ninbaaɔg. A yen ban wan sun tuona nba kul n po Efɛs doug n.

will be added

X\