1 N naataani, yal tie t Yonmdaan Yiesu Kristo guanu, yen tigl nba k t tan bu tigl u buol nyan po, 2 l gii tie g sua maad’i g Yendu ŋɔn’o lann i kaa k tinm n maad, lann i kaa k tinm n diɛn kadaaɔg g tie’i g maad g Yonmdaan daal baal o, t miɛd’i k yin daa ŋaa k i yam ń gbaa g ŋmad, lann i kaa g jiwaani ń suol’i. 3 Daa ŋaa man baa sua ń fid g bɔnd’i palb. Yen l daal ń pund, niib bu fiil g yie Yendu yo, g yua nba tie Nibiiug ń ji fid g legd. Wano i g Yendu yed k u bu biɛn’o. 4 L Nibiiug tan bu fiil g yie niib n l yi yal nba kul yendu, g yie niib n pug yal nba kul, g tan gad mɔno g kua g kal Yendu dondl ŋaciɛɔnŋ n ninŋ g ji yed k wano mɔno n tie Yendu. 5 I g tiɛn k n bo maad’i l maam youg nba k n bo be i buol ii ? 6 I yen ban yal nba daa diɛ’ɔg k l bona kan fid g tien. Yal nba diɛ’ɔg po bu juab yo, wan fid g ŋɔn u kukua youg nba dagd yen wan legd. 7 L Nibiiug ji suun u tuonn i, g nyaan u yen daa wuod i. Ama yua nba daa diɛ’ɔg ji tan gii g be, u ji baa suun g g wuod. 8 Nnyan i k l Nibiiug bu legd, Yonmdaan Yiesu mɔb n faam n bu kpi’ug, Yiesu n bu baal yen yudand nba n bu biɛn’o. 9 L Nibiiug tan bu baal yen Sitaan paalu i gii suun tuona. U baa suun yaalidug tuona, g tie palug g bɔnd niib. 10 U bu sun tuonbuolu nba bi kul g bɔnd niib nba tud sɔnu. B bu tud sɔnu g dugn b bo g tuo g gaal mamɔni nba bo bu fiel’b nyan, b biɛ bo g bua l maam. 11 L po n te g Yendu kuand tudciɛnm b ninŋ, k l tudm te k b pala paa faaɔg maam po. 12 Nnyan i g yab nba g tuo g gaal mamɔni g yen juab b kua g cab biid nyan, g buud bu di’b. 13 N naataani, yinm nba k t Yonmdaan bua’i nyan, l bual k tin gii tiend Yendu balg youg kul i po. G dugn hal cilg youg u g Yendu bo lugd’i k yin la fielu. Yin gaal mamɔni g Foŋanm mɔ biɛ te k i te Yendu yab nyan po n te k i la fielu. 14 L kul ne po i k u bo yiin’i. Laabamann nba k t bo muand’i nyan n te k i bann k u yiin’i k yin mɔ ń gii mɔg yudand nba tie t Yonmdaan Yiesu Kristo yal. 15 N naataani, lann i sie man k l paa g ŋanm g kub tunda nba k t bo luan’i, lann n tie tin yaad t mɔb g maad’i yal nba, yen tin diɛn yal nba kadaaɔg n g tie’i. 16 T Yonmdaan Yiesu Kristo mɔno yen t Baa Yendu nba buad’ti g te k u ŋalbalg po k t mɔg papaal youg kul, g biɛ mɔg dindann yen mɔni, 17 ń te k i pala ń gii paa, g biɛ te’i paalu nba bu te k yin tien yal nba ŋan, i tuona n ninŋ yen i maam n ninŋ.
