2 Tɛsaloniik Kristo-yab 1

1Min Pɔl yen Silas yen Timote n da kadaaɔg ne g tien yinm Kristo‑yab nba be Tɛsaloniik g tie t Baa Yendu yen t Yonmdaan Yiesu Kristo yab. 2T Baa Yendu yen Yonmdaan Yiesu Kristo ń yad yedŋanm i po, g te k i yam ń gii dua. 3N naataani, l tie k tin gii tiend Yendu balg i youg kul i po, l biɛ l dagd k tin tien’o mɔ, g dugn i dindann l kped g pugd i, g buam nba k i mɔg lieb po mɔ pugd g saa. 4L po n te k t maad Yendu tintaanu niib nba tenn, k t pala man i po. K l maa, ban l cagn’i, k i be fala n nand kul, i yen l g ŋaa sɔnu nba k i ŋua, i l dug Yiesu po i. 5Lann n ŋɔnŋ g Yendu buud jiɛlu tuag mamɔni sɔnu. L fala po i k u tan bu maad’i k i dagd yen yin kua u diem n. L Yendu ŋaag n kuanu po i k i cagn ne. 6Yendu tie mɔnkundaan i, yab nba ŋɔnŋ’i fala mɔlane, u mɔ tan bu ŋɔn’m fala. 7Yinm yab nba k b cagn’i nyan, u bu te k tinm yen yinm kul ń fuod. L tuonn bu sun youg nba k t Yonmdaan bu legd polu po yen u malɛg‑nba nba mɔg paalu, 8g baal yen muupienu. Yab nba g ban Yendu yen yab nba g cɔln t Yonmdaan Yiesu Laabamann nyan, u bu dad b tubl l youg u. 9B tubdadu tie k b baa be fala nba g mɔg gbennu n ninŋ i, naan buol fag yen Yonmdaan yen u paaciɛnu yudand buol. 10L tan bu tien daal nba k u bu baal i. L daal u bu gaal dondl u niib po, yab nba kul bo tuo g dug u po baa nyuad’o. Yinm yen tuo g gaal tin maad’i yal o. 11L po n te k t jaand i po youg kul g Yendu ń te k i binbem ń dagd yen wan yiin’i g bua k yin gii be nand nyan. T miɛd t Yendu k wan te’i paalu k yin sun yal nba ŋan nyan yin bua nand nba nyan, g biɛ te k i sun g juod i dindann n te k i suun tuona nba. 12Nnyan i k t Yonmdaan Yiesu bu la dondl i buol, k yin mɔ ń la dondl u buol g dugn t Yendu yen t Yonmdaan Yiesu Kristo ŋalbalg po.

will be added

X\