2 Piɛr 3

1N dɔnn‑nba, kadaaɔg munle po n nyan k n ji da g tien’i. N diɛn l kadaad tinle kul g tiɛd’i tunda nba k i gaal nyan po, g kpaan k i gii mɔg maalŋanm i. 2N bua k i gii tiɛn maam nba g Yendu sogni‑nba bo tuod g maad siɛnyoug, g biɛ gii tiɛn t Yonmdaan t Fietua sundi nba bo be yen’i n bo tund’i u mɔmaam nba nyan. 3Yen daa bann man g dijijuog dani n ninŋ, niib bu baal gii be g tie b gbannand buam. B baa laa’i 4g tua: « U bo puon k u bu guan, u biɛ ji be lɛ i ? Hal t yaajanm n kpe saa yen mɔlane, baa siɛl g lebd ; bona kul tie nyan Yendu n bo tag ŋanduna k l tie nand nyan i. » 5B tu maad nnyan g g bua k b tiɛd g siɛnyoug Yendu bo maad maam i, g polu yen tinŋ tag. U bo paad tinŋ yen nyum, g te g nyum taan yenn buol g tinŋ nyuand. 6L nyum n biɛ bo tan yil ŋanduna nba bo cind g be, g biɛn yal nba l mɔg miɛl kul. 7Polu yen tinŋ nba be mɔlane nuan, Yendu maad k l baa be i g guu daal nba k u tan bu bu niib buud, g biɛn yab g cɔlm’o. L daal, polu yen tinŋ bu di muu g buod. 8Ama n dɔnn‑nba, bonyenn kua n be k i bo kan sunm: Yonmdaan yaa po, diyenn tie nyan bina tudl nyan i, g bina tudl tie nyan diyenn nyan. 9Siɛb mali g Yonmdaan yuand yen wan tien wan bo puon yal nba i. L yen g tie nnyan kaa. U mɔg sugl i po i, k l maa u g bua g baa sua ń biɛl fam. U bua g sua kul ń lebd u pal g ŋaa biid tienu i. 10Yen l yaa kul, Yonmdaan n bu baal yaa daal nba, l baa tie nyan naayig n tu baal g libl niib nand nyan i. L daal, fuug bonciɛnn bu tien, g polu ń bod, g yal nba be polu po kul ń di muu, g tinŋ yen yal nba be tinŋ po kul ń mɔ ń di muu. 11Nyan bona ne kul n tan bu di muu nyan, ji bann man yin baa sonm nand k l ŋɔnŋ k i cɔln Yendu g biɛ ŋua’ɔg yen i pal kul, 12gii guu daal nba g Yendu sen, g biɛ gii gbaa yen i paalu kul k l daal ń baal tonm. L daal i g polu bu di muu, g yal nba l be polu kul ń donn muuwalu n ninŋ. 13Ama t guu polu yen tinŋ nba g Yendu bo puon nyan i. L kul baa tie bonpaana i. Niib nba baa be l tinpaanŋ n ninŋ baa suun tuona nba tuag mamɔni sɔnu kua i. 14Lann, n dɔnn‑nba, nyan yin guu l daal nyan, mɔnd man g daa mɔg siɛl yaa jɔgnd yen siɛl yaa jalgi Yendu nunŋ n ninŋ, g manu ń gii be yinm yen wano siign. 15T Yonmdaan gii dii mindl saa yen mɔlane, u bua k i la fielu i. T ninja Pɔl, wano nba k t bua’ɔg mɔ bo diɛn’i l bona po i. Yendu n bo tie’og yanfuom k u diɛn g tie’i. 16Wan diɛn kadaad nba ninŋ kul, u maad l maam i. L kadaad n ninŋ, yenn‑nba buol be k l gbadu paa. L maam i g yab tie yanbɔndanm k b dindann g yab nyan kpind. B biɛ tie nnyan i Yendu Kadaaɔg n ninŋ liel‑nba buol g kuand b kua tudm n ninŋ. 17Lann n dɔnn‑nba, yinm nuan ji tuod g ban l po n nyan. Suol man i kua g tan daa ŋaa g nibiid tudm ń te k i dindann ń gii lenŋ, k yin ŋaa yin daan tu sie k l paa nand. 18Mɔnd man gii band t Yonmdaan Yiesu Kristo, t Fietua g pugd, k u ŋalbalg ń gii pugd i binbem n ninŋ. Yudand ń gii tie u yal, lan cil mɔlane saa yen youg nba g mɔg juog. Amɛnn.

will be added

X\