2 Piɛr 1

1Min Simɔn Piɛr, n tie Yiesu Kristo tuonsunn i g biɛ tie u sundu. N da kadaaɔg ne g tien yinm nba mɔ dug Yiesu Kristo po nyan tinm nyan i. Wano Yiesu Kristo nba tie t Yendu g biɛ tie t Fietua n te k t dug u po k l maa u tie mɔnkundaan i. 2Yendu ń yad yedŋanm bonciɛnn i po g biɛ te k i yam ń gii dua buga k l maa i ban’o g biɛ ban t Yonmdaan Yiesu Kristo. 3Yonmdaan n tie paaciɛnudaan nyan i, k u tie’ti bona nba kul tie payiɛnu t po t binbem n ninŋ, k tin gii ŋua Yendu yen t pal kul. U te k t bann yua nba yiin’ti u yudand yen u bulcind po. 4L yudand yen l bulcind po i k u tie’ti wan bo puon’ti puoni nba k l gbenŋ g biɛ tie bonmɔnn t po nyan. U tien nnyan, k i gii gaal l puoni, yin ŋaa g daa bua ŋanduna ne niib n mɔg niɛnŋ nba k l g ŋan g juand b yam nyan i, k yinm yen wano ń ji gii taa binbem. 5L yaa po, yin ji dug Yiesu Kristo po nyan, yin mɔnd k i binbem ń gii ŋan. I binbem gii ŋan yin bann sonml. 6I gii bann sonml yin gii so i kua. I gii suol i kua yin gii mɔg juunn. I gii mɔg juunn yin gii ŋua Yendu yen i pal kul. 7I gii ŋua Yendu yen i pal kul yin mɔnd g naataann ń gii be i siign. Naataann gii be i siign, yin gii bua lieb. 8Yen mɔni l gii tie k i mɔg l bona, g l ŋua nnyan g saa liig, l bu te k i gbanu ń gii walb tuonn po, g biɛ te k yin ŋanm g bann t Yonmdaan Yiesu Kristo g pugn. 9Ama yua nba g mɔg l bona, u g nyuan fagm. U tie nyan juan nyan i. U sunm g Yendu ŋuul g nyan tuonbiid nba k u bo mɔg siɛnyoug o. 10Lann, n ninjanm Kristo‑yab, nyan Yendu n yaan yiin’i g lugd’i nyan, ŋmid man nunŋ g ŋɔn yen mɔni g Yendu yiin’i g biɛ lugd’i. G dugn l gii tie k i tien nnyan, i kan ban g kpiɛd Yendu sɔnu. 11Nnyan i, g Yendu tan bu gaal’i nuujad tinle g kuan’i t Yonmdaan t Fietua Yiesu Kristo diem nba g mɔg gbennu nyan ninŋ. 12N ban k i ban l bona kul ne g biɛ ŋanm g diɛ mamɔni nba k i gaal nyan. Ama yen l kul ne, n baa l tun g tiɛd’i l bona i. 13N diid g sua k min daa be g mɔg miɛl ne, k l dagd yen min gii tun g maad’i l bona k yin gii tiɛn l po. 14G dugn n ban k l kan wai yen min bul g ŋaa’i. T Yonmdaan Yiesu Kristo n te k n bann. 15Lann, n bu mɔnd g baa n ji tan gii g be mɔno, yin fid gii tiɛn l bona po youg kul. 16Yen mɔni, t g gaal manaankam kaa g ŋɔnŋ’i t Yonmdaan Yiesu Kristo n bu baal yen u paaciɛnu nba, ama tinm la u yudand yen t ninbina i. 17G dugn youg nba k u bo gaal sel yen yudand t Baa Yendu buol, t bo be. L youg u k u gbad Yendu paaciɛnudaan niɛlu k l maad: « U ne tie n bija i, n pal kɔn u po bonciɛnn, n tug n buam kul g tien u ninŋ. » 18Tinm mɔno t bo gbad l niɛlu k l nyiɛ polu po, youg nba k t bo be yen’o Yendu jual po. 19T biɛ diɛ yen t pal kul g Yendu sogni‑nba bo maad mɔni i. K l ŋan yen yin ŋanm gii cenŋ ban bo maad yal nba. G dugn l maam tie nyan fidl nyan i, g fand bunbɔnn n be naan, saa yen lan tan bu fann, g siŋaaɔg ŋmaabig ń fand i pala. 20Ama lan daa bual k yin gii ban yal nba n ne: Yendu sogni‑nba n bo maad yal nba k b diɛn Yendu Kadaaɔg n ninŋ nyan kan fid gii tie b yul po maalm. 21G dugn Yendu sogni‑nba ninŋ sua g ban g maad masiɛm k l tie nifosaal buam po, ama Foŋanm n bo tu te ban maad Yendu n yaan bua ban maad yal nba.

will be added

X\