1 Min nikpel n da kadaaɔg ne g tien cannaa nba g Yendu lugd’o nyan, yen u bid. N bua’i yen mɔni. Min kukua kaa bua’i, ama yab nba kul ban mamɔni mɔ bua’i. 2 T bua’i k l maa mamɔni be t ninŋ. L mamɔni baa l be t ninŋ i, youg kul. 3 T Baa Yendu yen u Bija Yiesu Kristo bu te’ti ŋalbalg yen sugl yen yanduanm, tin gii mɔg l kul ne, mamɔni n ninŋ yen buam n ninŋ. 4 N pal daan manŋ hal bonciɛnn yen min la k a bid siign, g yenm sonm mamɔni sɔnu n ninŋ nyan t Baa Yendu n bo ŋɔn’ti mɔmaam nba nyan. 5 Cannaa, mɔlane min miɛd’a yal n ne: tin gii bua man t lieb. L g tie mɔmapaanm kaa k n da’a, l tie mɔmaam nba k t bo gaal hal cilg youg u. 6 Buam tie k tin cɔln Yendu mɔmaam i. Lann n tie mɔmaam nba k i bo gbad hal cilg youg nyan, g buam ń gii be i binbem n ninŋ. 7 I ban g faaɔgdanm bonciɛnn ji yad g be ŋanduna n i. B g tuo g gaal g Yiesu Kristo te nifosaal yen mɔni. Yua nba tie l nibuolu tie faaɔgdaan i, wano n tie Kristo ninnand. 8 Lann guul man i kua, k i tuona nba k i suun n tan daa te fam, k yin fid g tan la l nyuad kul. 9 Yua nba kul g diɛ Kristo tundl kukua, g yen pugd u yul po yal nyan, Yendu g be yen’o. Ama yua nba diɛ l tundl kukua g tund niib, wano i k t Baa Yendu yen u Bija Yiesu Kristo be yen’o. 10 L gii tie g sua baal i buol g g diɛ Kristo tundl, yin daa gaal’o i ŋaag n ninŋ, yin biɛ daa tie’og yen sonml. 11 K l maa yua nba tien’o yen sonml taan l daan k b tien biid n nyan. 12 N mɔg maam bonciɛnn g bo bua k n maad’i, ama n yen g bua k n diɛn kadaaɔg n ninŋ kaa g te’i. N mali k n bu baal g gɔnn’i, g pag yen’i k t kul pala ń ŋanm g manŋ. 13 A niipuo nba g Yendu lugd’o nyan bid mɔ fuond’a.
