2 Korɛnt Kristo-yab 8

1N naataani, t bua yin bann Yendu n tien yal nba Maseduann Kristo‑yab tintaancaga n ninŋ g dugn u ŋalbalg po i. 2Fala nba baal’b g tie bigna l yabd, g nyaan k b biɛ yen l be pamanciɛnn n ninŋ. Yen ban l tie talpieni nand kul, b daan pii paab yen bulcind. 3N tie sieda k b daan tien ban bu fid g tien yal nba kul, g pii paab nba cie b paalu mɔno. B yanbuam n ninŋ i k b daan tien l kul. 4B daan baln’ti bonciɛnn k tin miɛl sugl g cab’b k ban mɔ ń pugn b paab todl nba k t bobnd Suude Kristo‑yab po nyan. 5B daan tien yal nba cie tin daan daan k b bu tien yal nba: b daa daan cind g tug b kua g cab Yonmdaan yo, g Yendu buam n ninŋ k b yuand g tug b kua g cab t mɔ. 6L po n te k t daan baln Tiit, wano nba daan cil g suun yen’i nyan, k wan mɔnd g tod’i k i sun i bulcintuonn g juod ŋanu. 7Yin mɔg yal nba ne kul tie ŋalman nba yab hal bonciɛnn i: i mɔg dindann, g ban Yendu maam muandu, g ban mamɔni, g suun tuonn kul yen pakɔnn, g bua’ti. Mɔnd man g ŋɔn i bulcind mɔ nnyan paab ne pinu n ninŋ. 8L g tie mɔbonn kaa k n maad g bil’i k yin tien nnyan, n dugn’i lieb n daan sun nand yen pakɔnn mii n liɛ i buam tie papienn buam ii ? 9G dugn, i yen ban t Yonmdaan Yiesu Kristo bulcind po, i po i k wano nba bo tie ŋalmandaan nyan bo tien u kua taladdaan, k u taladm ń te yin mɔgd. 10Min mali yal nba l po n nyan k n maad’i: n ban k lann n dagd i po, g dugn yinm n bo cil hal jel o g sun l tuonn, lann kua kaa mɔno, yinm n bo jag i yam n g suol k i sun l tuonn. 11Lann, ji mɔnd man g sun l tuonn g juod. I pala n daan kɔn nand k i jag g suol k i bu sun nyan, mɔnd man g juod mɔ nnyan. Tien man i paalu n dagd nand. 12G dugn nil gii pii paab yen papienn, Yendu bu tuo l paab, u nyuan l daan n mɔg yal i, u g nyuan wan g mɔg yal kaa. 13L g bual k yin kpegd yin mɔg yal nba kul g te lieb g faab’b g ji gii cagn kaa, l tie k yin mɔnd i kul ń gii ja i. 14Mɔlane, i nuu n ninŋ n mɔg bonciɛnn nyan, i bu fid g tod yab nba k l pɔd’b. L tan gii pɔd i mɔ yaa daal, k b nuu n mɔg, ban mɔ ń tod’i. Nnyan, i bu sua k i ja i. 15Nyan lan diɛn Yendu Kadaaɔg n nand nyan: « Yua nba bo wod bonciɛnn bo g dii g gbal, yua nba bo wod waam nne mɔ bo g dii k l pɔd’o. » 16Yendu ń gaal balg, wano nba te g Tiit pal kɔn i po nyan t mɔ yaa pal n kɔn i po nand nyan. 17T daan miɛl wano Tiit k wan gad i buol k u tuo. L daan sua k wano mɔno pal tuod g kɔn l gadu po yo, lann i k u kagn tonm g gad. 18T yegn’o yen t naataanu nba k u sann duo Kristo‑yab tintaancaga n ninŋ kul g dugn wan sun yal nba Laabamann muandu n ninŋ po. 19Lann kua kaa, Kristo‑yab tintaancaga daan taan g lugd wano i k wan ciɛn’ti k tin gad yen paab nba k t gaal ne. Yonmdaan mɔno yudand po yen t mɔ yaa yanbuam po i k t suun l tuonn g tod lieb. 20Ban kubn’ti paab nba tie ligciɛnŋ i, t g bua g siɛl yaa jalgi ń tan gii be l ligli kubnu n ninŋ. 21T kpaan k tin tien yal nba ŋan i, l g tie Yendu nunŋ n kua kaa, ama niib nunŋ n mɔ. 22T yegn t naataanu nne mɔ yen yab nba saa i buol nyan. Taal munŋaa kul u ŋɔn k u pal kɔn bonciɛnn lieb po. Mɔlane u pakɔnn ŋanm g pugn i, g dugn u pal paa i po bonciɛnn. 23Tiit nuan tie n yegnu i, g suun yen’n g tod’i. T naataani nba yeg yen’o n tie Kristo‑yab tintaancaga sundi. B suun k ban don Kristo sann i. 24Lann ŋɔn’m man k i bua’b yen mɔni, g Kristo‑yab tintaancaga ń la g bann k t mɔg mɔni yen tin gii pag’i b nunŋ n.

will be added

X\