2 Korɛnt Kristo-yab 5

1Yen mɔni, t gbannand tie nyan jounŋ nyan i k t kua l n ninŋ tinŋ po ne. T ban k l jounŋ gii caad, t mɔg ŋaag polu po g Yendu maa g tie’ti, ŋaag nba g maa yen nifosaal nui, yal nba baa be youg kul. 2T be l jounŋ n ninŋ g dun i, k t pal kɔn bonciɛnn k tin tug t ŋaag nba be polu po nyan g liɛ nyan liɛdl nyan g ŋɔl liel po, 3gii mɔg tin liɛ yal nba, g daa be niiyann. 4Tin daa be l jounŋ n ninŋ ne, t dun nyan t tug tugkpiɛgl nyan i. L g tie k t bua k tin land tin liɛ yal nba kaa, t bua k tin liɛ manfopaann nyan liɛdliel nyan i, g ŋɔl tin liɛ yal nba po, k t gbannand nba bo tie kuum yal ń lebd gii tie miɛl yal. 5Yendu mɔno n bobn’ti l po, g tie’ti Foŋanm k l ŋɔnŋ k t tan bu gaal bonŋana nba k u bil g guun’ti. 6Lann, t pala l paa youg kul, k t yen ban k t gbannand ne nuan daa gii tie t ŋaag k t kua l n ninŋ, t fag yen Yonmdaan, 7g dugn t ŋua dindann sɔnu i, t g ŋua t ninbina n nyuan yal nba kaa. 8Mɔni, t pala paa bonciɛnn, k t sun k tin nya gbannand ne ninŋ g gad g kua Yonmdaan buol o. 9G nyaan t gii be t ŋaag n ninŋ ii, t gii nyiɛ ii, t payiɛnu tie k tin gii suun yal nba bu manŋ u pal i. 10G dugn t kul tan bu baal Kristo buol wan bu’ti, g sua kul ń gaal u pani lan dagd yen wan sun tuonŋana lann i kaa wan sun tuonbiid nba tinŋ po ne. 11Tinm ban yal nba tie g nil ń cɔln Yonmdaan, l po n te k t gbaa g niib ń tuo t maam. Yendu ban tin tie yab nba, k n mali k i mɔ biɛ l ban’ti nnyan i canyiin i pala n ninŋ. 12T g kpaan k tin ŋɔn t kua i nunŋ n kaa, t bua k i pala ń gii man t po, k yin gii mɔg yal nba k i tu bu maad niib nba k b pala man b kua po, g dugn niib nyuan’m cincann po ban tie yab nba, g yen g nyuan yal be b pala n ninŋ nyan. 13T gii sun waadtuona, t sun Yendu po i, t gii sun nimɔntuona mɔ, t sun i po i. 14Kristo buam n suol g sen’ti, tinm nba ji gbad niimn k wano niyend ne kua n kpe niib kul po, l bua n ŋɔn k b kul kpe n nyan. 15U kpe b kul po, g yab nba fo ń ji daa fo b kua po kaa, ama k ban gii fo yua nba kpe g yied b po nyan yaa po i. 16L po n te k t ji g nyuan sua nyan nifosaal n nyuan u lua nand nyan. Baa t bo gii nyuan Kristo nyan nifosaal n nyuan nand mɔno, mɔlane t ji g nyuan’o nnyan. 17Nnyan, nil nba taan yen Kristo ji tie nipaan i, bonkpel po juab o, bonpaann n ji be. 18L kul ne nya Yendu buol i. U te k t guan g manŋ yen’o g dugn Kristo po, k u tie’ti l tuonn k tin tod niib k ban guan g manŋ yen’o. 19Mɔni, Kristo n luod sɔnu g Yendu guan g manŋ yen ŋanduna niib, g ŋaa g g dugn b biid. L manu Laabamann muandu tie tuonn i k u tug g tien t nui n. 20Lann Kristo sann po i k t maad. Yendu mɔno n maad yen’i t mɔi n ninŋ: T balm’i Kristo sann po, k yin guan g manŋ yen Yendu. 21Kristo bo g tien siɛl yaa biid, ama g Yendu yen tun’o t biid, k u po tin te nimɔnm Yendu nunŋ n.

will be added

X\