2 Korɛnt Kristo-yab 3

1K tin maad nand ne i, t yaan biɛ ŋɔnŋ t kua yaa aa ? Bii l bual k tin mɔ ń ji te’i kadaad nba ŋɔnŋ k t tie Yiesu sundi nba dagd yen ban gii dug b po, lann i kaa k tin gaal l kadaad i buol, nyan siɛb n tie nand nyan yaa aa ? 2Yinm mɔno n tie t kadaad g diɛn g bil t pala n ninŋ, g nil kul ban g biɛ lii. 3L kon ŋɔn k yinm n tie Kristo n diɛn kadaaɔg nba g tie’ti t tuonn po, l g tie kadaaɔg nba k b diɛn yen nyunbɔnm kaa, l tie yal nba g Yendu nba fo yaa Fuom diɛn i, l g tie yal nba diɛn tanpaba po kaa, l tie yal nba diɛn g bil nifosaal pal n i. 4T pala n paa yal nba po Yendu nunŋ n ninŋ n nyan g dugn Kristo po. 5L g tie k t dug k t bu fid g sun siɛl t kua kaa, tin bu fid g sun yal nba kul nya Yendu buol i. 6G dugn wano n te k t fid g suun dɔnnpaanu po, l g tie yiko nba diɛn kadaaɔg n ninŋ kaa, l tie Foŋanm yal i. Yal diɛn kadaaɔg n nuan baad yen kuum i, g Foŋanm baad yen miɛl. 7Moyis yiko bo diɛn tanpaba po i, k l baal yen yudand bonciɛnn, k l yudand te k u nunŋ po ji nyili g tuud, k Israyɛl yab gbaa k ban nyuand’o g gbal, k l yudand yen bo g tie yal nba bu wai. Yiko nba k l tuonn tie k lan baal yen kuum gii baal yen yudand nba yab nne, 8Foŋanm tuonn n bu baal yen yudand nba ji baa tie nle ? 9Tuonn nba bu te Yendu ń jiɛl niib buud gii ŋɔn k l mɔg yudand, tuonn nba bu te Yendu ń yiin niib nimɔnm yudand ji baa tie nle ? 10Yen mɔni, t gii bogn siɛnyoug yudand yen mɔlane yal, t bu sua g siɛnyoug yudand g tie siɛl, g dugn mɔlane yudand g mɔg l liel. 11K l maa yal nba bo kan wai gii baal yen yudand, yal nba ji baa be youg kul yaa yudand ji baa tie nle ? 12Tin yaan mɔg l dindann nyan i k t pala paa bonciɛnn. 13Tinm g suun nyan Moyis nyan kaa. U bo tu tug cabl i g pibn u nunŋ po, k Israyɛl yab ń daa la yal nba bo nyili g tuud g yen kan wai nyan bodyoug. 14Ama b bo kuan kangbadm b pala n ninŋ g ji g gbiɛ bona niimn. Saa yen dinne, b gii lii dɔnnkpelu kadaaɔg, l tu tie nyan cabl nyan i g duag b nuni po. Nil nba be yen Kristo kua i k l tu dɔgd u nunŋ po. 15Yen mɔni, saa yen dinne, b gii lii Moyis kadaaɔg, l tu tie nyan cabl nyan i g duag b pala. 16Yua nba lebd u binbem g ŋuan Yonmdaan kua i k l cabl tu dɔgd u po. 17K l maa ban maad Yonmdaan nba ne tie Foŋanm i, Yonmdaan Fuom n be naan buol, yal‑n‑kua be l buol i. 18T kul ne, siɛl yaa cabl ji g duag t yaa nunŋ po. T tie nyan ninnyuandg nyan i g ŋɔnŋ Yonmdaan yudand. U lebd’ti, k tinm yen wano ji taa ninnaɔnŋ, k t yudand pugd daal kul. Yonmdaan tuonn n nyan, wano nba tie Yendu Fuom.

will be added

X\