1 L po n te k n daan jag g suol mii n kan guan i buol g yaan biɛ baal yen pabɔnn i po. 2 G dugn, n gii biil i pala, ŋmaa n bu manŋ n pal i ? Yinm nba k n biil i pala nyan kaa biɛg ii ? 3 L po n te k n daan diɛn’i nnyan, n daan g bua k n baal i buol o, g yab nba bo bu manŋ n pal ń biɛ ji biil n pal. N dug i kul ne po k n pamann tie i kul mɔ yaa pamann i. 4 Yen mɔni, min daan da’i yaa youg nba, n pal daan g man baa waam, l daan yiɛl’n hal bonciɛnn, n daan da g ninsiid cuud i. L g tie k n daan bua i pala ń biil kaa, n daan bua yin bann k n bua’i hal bonciɛnn i. 5 Nil daan gii te g pabɔnn baal, l g tie k u daan biil min kukua yaa pal kaa, u daan biil i kul pala i. N g bua k n maad g pend, baa l gii g tie i kul mɔno, i siign n ninŋ siɛb yaa pala yen daan biil. 6 Niib bonciɛnn n daan taan g yie u po nyan, l tubdadu dagd’o. 7 L po n te k l ji dagd k yin di sugl u po g paan u pal, g daa ŋaa k u pal ń biil g pend g cie u paalu. 8 Lann, n balm’i k yin mɔnd g ŋɔn’o k i bua’ɔg. 9 Yal nba po te k n diɛn’i n nyan: n bua n diid g liɛ i l cɔln bonn kul n ninŋ ii ? 10 I gii dii sugl yua nba po, n mɔ dii sugl l daan po n nyan. Min dii sugl nba mɔ, n maad l gii bual k n di sugl i, n dii g dugn i po i, Kristo nunŋ n ninŋ, 11 k tin daa ŋaa g Sitaan ń liid g janm’ti, g dugn t ban u ninfantuona po. 12 N daan pund Trowas g bu muand Kristo Laabamann g sua k t Yonmdaan liid g luod sɔnu n po o. 13 Ama n yam yen daan g dua baa waam nne, g dugn n daan g la n naataanu Tiit. L po n te k n daan cab Trowas yab g pend g gad Maseduann. 14 T tien man Yendu balg, g dugn wano n tug’ti Kristo po, k t ŋua’ɔg youg kul, tinm yen u niib nba k u kɔn jad g yend’b. U tug tinm i k t ŋɔnŋ Kristo n tie yua nba naan kul, nyan tilaali nublu n tu yad nand nyan. 15 Yen mɔni, tinm n tie Kristo tilaali nba nu g man Yendu po, t tie nnyan i yab nba tuag fielu sɔnu yen yab nba tuag juodfam sɔnu siign. 16 Juodfam yab po, l nublu tie kuum baaɔg u, g baad yen kuum b po, yab bu la fielu yaa po, l tie miɛl baaɔg u, g baad yen miɛl b po. G ŋmaa n dagd yen l tuonn i ? 17 Niib bonciɛnn tug Yendu maam g tien kpinkpeonŋ u, tinm yen g tie nnyan kaa. Yendu n sun’ti nyan, tinm maad u maam yen papienn i, u nunŋ n ninŋ Kristo sann po.
