2 Korɛnt Kristo-yab 12

1L bual g nil ń don u kua, g nyaan l yen g mɔg siɛl yaa nyuad. Ama n bu maad bonyenn nne po, lann n tie Yonmdaan n dɔgd yal nba g ŋɔn’n. 2N ban jua nne k u tie Kristo‑yua, piig yen bina ŋanna n nyan, g Yendu bo tug l jua g don’o polu yaa polu yaa polu. U bo don’o yen u gbannand yaa aa, n g ban, u gbannand bo g duo oo, n g ban, Yendu n ban. 3L jua bo duo yen u gbannand ii, u gbannand bo g duo oo, n g ban, Yendu n ban, 4ama n ban k u bo duo Yendu nimɔnm binbebuol, g gbad maam nba g mɔg maadu k l g cab g nifosaal ń yaad mɔb g maad. 5N bu don n kua l jua po, ama n kukua po nuan, min bu don n kua nand tie k n ŋɔn n gbalm kua i. 6N bo gii bua k n don n kua, n bo bu fid, k l biɛ g tie k n waad kaa, g dugn n bo bu maad mɔni i. Ama n yen suol n kua i, k l maa n g bua g sua ń kand wan gbiɛ yal, lann i kaa wan nyuan n tuona n ninŋ k n tie yua nba, gii mali k n cie l buol, 7g dugn min maad k n la bonŋana nba g Yonmdaan dɔgd g ŋɔn’n nyan po. Yendu bo g bua k n gii pua jipaad l po, lann n tien k u te k n laad fala k l tie nyan kunkonu nyan g tuu n gbannand n ninŋ, Sitaan sundu i, k u puag’n k n daa tug jipaad g lol n yul. 8Taal muntaa i k n miɛl Yonmdaan mii wan nyan’n l fala n ninŋ. 9Ama wan jiin’n yal nba n ne: « N ŋalbalg dagd’a. Nil gbalm n ninŋ i k n ŋɔnŋ k n paalu g mɔg l liel. » Lann, n gbalm n ninŋ i k min baa pua jipaad, g Kristo paalu ń gii be yen’n. 10L po n te k n pal man n gbalm po, sugd po, cicagm po, mabl nba k n laad yen yanbani nba k n mɔg g dugn Kristo po. Yen mɔni, yaa youg nba g paalu pɔd’n canyiin nyan, l youg mɔno i k n tu ŋanm g la paalu. 11I la i, n gii maad nyan n waad nyan, yinm n te k n maad nnyan. G dugn, yinm n daan bo bu ŋɔn min tie yua nba, k l maa n l g tie siɛl nuan, g nyaan, yab yi b kua Yiesu sundgbenŋa g cie’n baa siɛl n ninŋ. 12Yal nba ŋɔnŋ g nil tie Yiesu sundu kul tien i siign k i la: i la pasɔnŋl nba g mɔg l liel, g la yaalidug tuona, g la palug yen ciila tuonbuolu kul. 13N sun bɛ i Kristo‑yab tintaancaga nba tenn po g g sun i yaa po i ? Min g gaal siɛl yaa todl i buol nyan kaa tie n biid ii ? Di man sugl n po. 14N bob g gbenn g saa i buol g ji gɔ taal muntaa po n nyan, g biɛ kan l gaal siɛl i buol, g dugn n g kpaan i mɔgm kaa, n kpaan yinm mɔno i. K l maa, l g bual g bid kaa ń gii bilg mɔgm g guund b danm, bidanm n baa bilg g guund b bid. 15Min nuan, yen pamann i k n bu tug min mɔg yal nba g sun tuonn i po, n bu tug n munn kul i g cab i po. K n gii ŋanm g bua’i bonciɛnn i, yinm baa bua’n waam nne yaa aa ? 16To, i tuo k n daan g te tugl sua po waa, ama k l yen ji tie k min tie ninfandaan nyan, k n daan bɔnd bɔnd’i nii k i baa n diɛɔg n aa ! 17Min daan sun yab nba i buol nyan, n te k b ninŋ ŋmaa n bɔnd g dii’i nii ? 18N daan baln Tiit k u gad i buol, wano yen t ninjalua ŋano. Tiit dii’i nii ? Min yen wano kul g taa maalyenm kaa aa, t g tɔgn sɔnyenu kaa aa ? 19L ji g luol waam, i mali k t kpaan k tin di mɔni i nunŋ n i. N n, tinm maad Yendu nunŋ n i, Kristo n bua nand. N dɔnn‑nba, t kpaan k i dindann ń ŋanm g paag i. 20G dugn n jie k n tan baal i buol g sua k i g tie nyan min bua nand, k yin mɔ ń sua k n g tie nyan yin bua nand i. N jie k n baal g sua g kunkɔna yen nanŋ yen pabienn yen naaniɛɔg yen sanjounŋ yen tuali yen jipaad yen ŋmadl be i siign ninŋ i. 21N jie k n baal, g Yendu ń yaan fiɛg’n i nunŋ n ninŋ i. N jie k n bu buud niib bonciɛnn po, yab nba bo kpiɛ g tien biid, g g mɔ kua b biid po, g biɛ daa l be jɔgnd n ninŋ, yen cunconm n ninŋ g suun naayigtuona nyan i.

will be added

X\