2 Korɛnt Kristo-yab 11

1I bo gii bu tuo k n maad yen’i waad maam waam i ? Ɛɛn, miɛl man sugl g tuo. 2N pal kɔn i po, l pakɔnn nya Yendu buol i, g dugn n tug’i nyan sipaan nyan i g tie jayend kua, lan tie Kristo, k wan gaal’i nyan sikpenŋ nba daa g ban jua palb nyan. 3Ama n jie bonyenn i: nyan waaɔg n bo tug ninfanm g bɔnd Ɛf nyan, yin tan daa ŋaa ban kuan maalbiid i yula n ninŋ, yin ji daa ŋua Kristo yen payenn [yen papienn]. 4G dugn, nifan gii baal g ŋɔn’i Yiesu fano, k l g taa yen tin bo ŋɔn’i k u tie yua nba, lann i kaa, u gii ŋɔn’i yal nba g taa yen Foŋanm nba k i bo gaal, lann i kaa, u gii muand’i Laabamann nba g taa yen yin bo tuo g gaal Laabamann nba, i tu tuo g gaal l daan maam k i pal man i. 5N yen g la yab nba yi b kua Yiesu sundgbenŋa nyan n cie’n yen yal nba. 6L tie mɔni i, k n g ban maam jiɛ‑g‑lebdu, ama yal tie banm po nuan, t ŋɔn’i bonn kul n ninŋ taal munŋaa kul k t ban. 7Min bo jiin n kua k yinm ń do, g muand’i Yendu Laabamann g g gaal siɛl nyan, n bo biil yaa aa ? 8Kristo‑yab tintaancaga nba be dingbanfana nyan n bo pa’n l tundl po. Min bo tuo g gaan siɛl b buol nyan, l bo ŋman k n fe ban mɔg yal nba i g fid g suun tuonn i buol. 9Min bo be i buol yaa youg nba g bona tan pɔd’n, n bo g bual sua baa siɛl po. T naataani nba be Maseduann n bo baal yen yal nba bo pɔd’n kul g tie’n. N bo mind g suol n kua k n daa te tugl sua po i, n biɛ baa l diɛ nnyan i g saa. 10Kristo mamɔni nba be n ninŋ po, n bu fid g maad k Akaayi diem n ninŋ sua kan fid g pan’n k n kan manŋ n pal l po. 11Bɛ po i k n bo tien nnyan i ? N g bua’i yaa aa ? Yendu ban k n bua’i. 12Min suun yal nba, n biɛ baa l suun nnyan i, g yab nba bua ban gii pua jipaad ń daa la ban bu kal yal nba g yed k tinm yen banm ja. 13L niib fa i k b tie Yiesu sundi. B tie tuonsunŋalaacidanm i g bɔnd niib k b tie Kristo sundi. 14L g tie yaalidug bonn kaa, g dugn Sitaan mɔno yen fa k u tie yinyiem malɛg i. 15Lann, l g paa u tuonsunna po yen ban fa k b suun tuonn nba tuag mamɔni sɔnu. Ama b binbem tan bu juod nyan b tuona n tie nand nyan i. 16N bua n maad bonyenn g led: daa mali man k n waad kaa. Baa l gii tie k i mali nnyan mɔno, yin di sugl g ŋaa’n k n mɔ ń daa don n kua waam o. 17Min bu maad yal nba ne g tie Yonmdaan n bua nand kaa, n bu maad waad maam i, k n pal paa k n bu la min bu nyii yal nba po g don n kua. 18Niib bonciɛnn donŋ b kua nyan ŋanduna niib n tie nand nyan i. Lann, n mɔ bu don n kua. 19Yinm nuan mɔg yam, ama i yen tuo g cenŋ yab nba g mɔg yam maam, k i pala man. 20I tuo k ban gii diɛ’i nyan yonmi nyan, g di’i, g fe yin mɔg yal nba kul, g nund’i, g pebd’i tanpai. 21N bu maad bonyenn, tinm daan gbal lann canyiin k l mɔg’n fai. G nyaan, nil n bu fid g pua pal g maad yal nba kul, n mɔ bu pua pal g maad. N yaan maad waad maam i. 22B g yed k b tie Ebro‑nba kaa aa ? N mɔ tie lann i. B g tie Israyɛl yab kaa aa ? N mɔ tie lann i. B g tie Abraham yaabuona kaa aa ? N mɔ tie lann i. 23N bu maad nyan n ji l waad canyiin nyan i: B yed k b tie Kristo tuonsunna i, min n tie Kristo tuonsunn g cie’b. N sun g cie’b, g kua dansalg g cie’b, g gaal puad g cie’b, taal munŋaa kul k l tenn waam nne yen k n kpe. 24Suif‑nba pua’n lanbana piintaa yen ŋanwai g daan biin taal munmu. 25Taal muntaa i g Rom yab pua’n gbana. Niib jaa’n tana yenm, taal muntaa g ŋadunŋ baa yen’n nyum n. N ban g tien nyuncinn n yentunmunn yen nyamunŋ. 26Youg kul n be sɔnu po i, g la yubɔnbuolu kul. Nyum n yubɔnn be, g bibiɛdi be g tie yubɔnn, k n buolu n yab be g tie yubɔnn n po, g buolfanu yab be g tie yubɔnn n po, dopienu n yubɔnn be, g fual n ninŋ yubɔnn be, mɔgl n ninŋ mɔg yubɔnn, yab nba fa k b tie t naataani mɔ tie yubɔnn i g kaag’n. 27N sun tuonpaala g cɔgnd kua’n, g yenn youg g yaam pɔd’n k n g guan g buo. Kom yen nyunnyuglu gbad’n, n ban g tien dana g dua kom g taag, g wad kua’n, k n be g g mɔg yal k n bu ŋagn n kua po. 28N g dugd yal nba tenn nuan. Yal nba ŋanm g tie n pakɔnn daal kul n ne: n mali Kristo‑yab tintaancaga kul po i. 29Paalu gii pɔd nil, l tu naan paalu pɔd min i, b gii ŋaa g nil kua tudm n ninŋ, l tu yiɛl’n hal bonciɛnn. 30N gii bu don n kua, n bu don n kua n gbalm po i. 31Yendu nba tie Yonmdaan Yiesu Baa, wano nba gaan dondl youg ń tuu youg ban k n g fa faaɔg kaa. 32Min bo be Damas yaa youg, yikodaan nba bo be l buol g kal bad Aretas sann po nyan bo te g sijenm guu doug n dimɔi kul i, k ban suol’n. 33N lieb bo tien’n kpancubug n i, g nyan’n takobonn, g jiin’n guonn nba bo lind doug nyan depuol po, k n nyiɛ l jua nui n g ciɛl.

will be added

X\