2 Korɛnt Kristo-yab 10

1Min Pɔl, min nba k i yed k n tu be i buol g jiin n kua gii tie suoo, ama n yen gii fag yen’i min gii wud naajad nyan, min mɔno n maad’i ne: Kristo pasɔnŋl yen u sugl po, 2n miɛd’i k i daa ŋaa k n gii baal i buol min gbal g ŋɔn’i n naajad. K l maa yab nba tua k t diɛ nifosaal maalm kukua i g suun tuonn nyan, n kon diɛ k n ŋɔn’m ninmɔnn. 3Mɔni, t tie nifosaalb i, ama t g pua tɔb nyan nifosaalb nyan kaa. 4T yaa jakɔntiɛd g tie nifosaalb yal kaa, l tie Yendu yal i g mɔg paalu, k t diɛ g mud t ninnanda n maa b depaald nba, g biid faaɔgdanm n mali g maad maam nba. 5Yua nba kul l fiil g sed yen jipaad g bu pan nil k u kan bann Yendu, t tu tud g lu’ug u, yua l mɔg maalm nba kul, tin suol’o nyan dansalg nyan wan gii cɔln Kristo. 6I tan gii ŋɔn k yinm cɔln canyiin, t bu dad yua nba g cɔln kul tubl. 7Ŋanm g diid man bona n tie nand. Nil gii diɛ u pal n k u tie Kristo‑yua, wan bann bonyenn: u gii tie Kristo‑yua, t mɔ tie Kristo‑yab i. 8Yonmdaan bo tie’ti yikod k tin tod’i yin gad liig i, l bo g tie k tin biɛn’i kaa. Baa n gii ŋaa k l yikod ŋanm g manŋ n pal k l pend waam mɔno, l g mɔg’n fai. 9N g bua k yin gii nyuan’n nyan n tie yua nba da kadaad g tien’i k min gii jiend’i nyan. 10G dugn, n gbiɛ g niib maad n po k nne: « U tu diɛn u kadaad n ninŋ g maad maam nba paa g wagi, g nyaan u tan gii baal t siign wan dinŋ canyiin, g ji gii maad maam nba g mɔg yul. » 11Yua nba maad nnyan, wan ŋanm g bann bonyenn: tin be fagm g da kadaad g maad nand nyan, t gii baal i buol mɔ t bu tien nnyan i. 12T kan tuo g pua g kpabn t kua yen yab nba ŋɔnŋ b kua, g bual tin yed k tinm yen banm ja. B luol yam i g gɔ g bual b kua g ŋmaa n pund’b i, g ŋɔnŋ ban tie yab nba. 13Tinm nuan yen kan don t kua lan pend tin dagd yen yal. Tin bu don t kua yal nba po bu dagd yen Yendu n sen’ti k tin sun g dagd naan i, wano n cab’ti k tin pund hal i buol. 14G dugn t g pend t yikod n dagd naan buol. T bo gii g baal i buol, g yen donŋ t kua, t bo pend t yikod n dagd naan n nyan. Tinm n kpiɛ g pund hal i buol yen Kristo Laabamann. 15Yikod n g cab’ti k tin pend nand, t g pend l buol, t g donŋ t kua lieb tuona po. T daan k i dindann ń kped g pugn i, k t mɔ ń sun t tuonn i siign ninŋ nyan t yikod n cab’ti nand nyan, k lan gad liig. 16Nnyan, t bu fid g muand Laabamann dingbana nba be i liig po, k lan daa tie k t dug lieb tuona nyuad po kaa g donŋ t kua. 17Nyan lan diɛn Yendu Kadaaɔg n nand nyan: « Nil nba kul bua wan don u kua, wan don u kua Yonmdaan n sun yal nba po. » 18K l maa, yua nba pag u kua kaa bu fid g ŋɔn k u dagd yenn, Yendu n pag yua nba n dagd yen pinpagd.

will be added

X\