2 Korɛnt Kristo-yab 1

1Min Pɔl, Yendu yanbuam po i k n tie Yiesu Kristo sundu, min n da kadaaɔg ne, min yen t ninja Timote. T fuond Yendu tintaanu niib nba be Korɛnt doug n yen Yendu niib nba kul be Akaayi diem n ninŋ kul. 2T Baa Yendu yen t Yonmdaan Yiesu Kristo ń yad yedŋanm i po g te k i yam ń gii dua. 3Yendu sann ń do, wano nba tie t Yonmdaan Yiesu Kristo Yendu g biɛ tie u Baa. Wano n tie t Baa nba jie niib ninbaaɔg g biɛ paand niib pala bonn kul n ninŋ. 4T gii be fala nba ninŋ kul, wano n tu paan t pala, k tin mɔ ń fid g paan lieb nba be fala n ninŋ kul pala, g dugn papaal nba k tinm mɔno gaal wano Yendu buol nyan po. 5Yen mɔni, nyan tin laad fala bonciɛnn Kristo po nyan, nnyan i k t laad papaal mɔ bonciɛnn Kristo po. 6T gii laad fala, l tie k yin la papaal yen fielu i. T biɛ gii la papaal mɔ, l bu te k i mɔ yaa pala ń paag k yin fid g juun yaa youg nba k i mɔ bu la fala nba k t laad mɔlane. 7T mɔg dindann i po bonciɛnn g dugn t ban k yin taan g laad fala yen’ti nyan, i taan g laad papaal mɔ nnyan i yen’ti. 8N naataani, t kan wuon’i tin daan la fala nba Asi nyan. Fala daan kua’ti hal bonciɛnn, k l ji tan cie t paalu mɔno k t ji g daan t kua yen miɛl. 9Yen mɔni, t pala n ninŋ t ji daan diɛ k t kuum youg pund n nyan. L daan tien nnyan, k tin daa dug tinm mɔno po kaa, ama k tin gii dug Yendu nba yied kpienm nyan po kukua i. 10Wano n daan nyan’ti l cicagkuum n ninŋ, g biɛ bu nyan’ti yal nba baad n ninŋ mɔ. Yen mɔni, t daan u ninŋ k u baa l nyanŋ’ti nnyan i. 11Yinm mɔno yen bu tod’ti yen i jaandi. Nnyan, niib bonciɛnn jaandi n bu te tin la ŋalbalg nba bu te g bonciɛnn ń tien Yendu balg t po. 12T pala n man yal nba po n ne: t ban t pala n ninŋ k tin daan be yen ŋanduna yab, mandg tin daan be yen’i, t daan ŋɔn t bontitied n ninŋ k t tug n ninŋ pien, k t maad’i mɔni. L tɔgŋanu kul ne nya Yendu buol i, nifosaal yanfuom po kaa k t daan be l binbem, Yendu ŋalbalg po i. 13Tin da kadaad g tien’i g bua yin lii g gbad yal nba, i kon lii g gbiɛ lann n nyan, siɛl g pugd l po. Ama n daan k i tan bu gbad l kul canyiin, 14nyan yin cil g gbad waam, g ban k t Yonmdaan Yiesu guanu daal, i pala bu manŋ t po nyan t mɔ yaa pala ń bu manŋ i po nand nyan. 15N pal daan paa l po bonciɛnn, l po n te k n daan jag g suol k n daa bu cind g baal i buol yo, k yin do nyuad munle. 16Yen mɔni, n daan mali k n nya i buol i g gad Maseduann, n gii nyiɛ Maseduann min biɛ guan i buol k yin tod’n k n pend g gad Suude. 17Min daan jag g suol nnyan, n daan g ŋanm g mali yaa aa ? Bii i mali k n daan diɛ n yul po maalm kua i, k n tug n mɔg maalm munle, k n tu yed k ɛɛn, g biɛ yed k ɛn ɛn ? 18Yendu tie mamɔnmaad g ban k tin maad’i yal nba g tie ɛɛn yen ɛn ɛn maam kaa. 19G dugn Yendu Bija, Yiesu Kristo nba k t daan maad’i u po, min yen Silas yen Timote nyan g tie ɛɛn yen ɛn ɛn yua kaa. Wano l tie ɛɛn yua kukua i. 20Yen mɔni, Yendu n bo puon puoni nba kul, Yiesu n tie l puoni ɛɛn. L po n te k wano Yiesu po k t tu tien amɛnn g don Yendu sann. 21Yendu n te k tinm yen yinm kul taan Kristo n ninŋ g diɛ k l paa, wano n lugd’ti. 22Wano n tien u banm t po, g tien Foŋanm t pala n ninŋ k l ŋɔnŋ k t tan bu gaal bonŋana nba k u bil g guun’ti. 23Min tug Yendu k u tie n sieda, n gii fa faaɔg wan dad n tubl: n daan g bua min ŋɔn’i fala i, l po n te k n daan g guan i buol Korɛnt. 24L g tie k t bua n mabn’i g ŋɔn’i yin baa dug Yendu po nand kaa, t ban k l po nuan i sie k l paa. T kpaan k tin taan g sun yen’i k yin gii be pamann n ninŋ i.

will be added

X\