1 Timote 6

1Niib nba be yonmd n kul, ban gii ban k b yonmdanm tie yab nba dagd yen cɔlunŋ, ban gii cɔln’m, g niib ń daa maad mabiid Yendu po yen t tundl po. 2Yab nba k b yonmdanm tie Kristo‑yab, ń daa tua k b kul tie ninjann g ji gii nund’b kaa. Banm n bu ŋanm gii suun b tuona mɔno, g dugn yonmdanm nba laad l tuona nyuad, b mɔ tie Kristo‑yab nba k b bua’b yen b pal kul i. Ŋan baa ŋɔnŋ niib g te k b suun yal n nyan. 3Nil gii diɛ tundfann g tund lieb, g ŋaa t Yonmdaan Yiesu Kristo lanbona mɔno yen tundl nba tuag Yendu sɔnu, 4l daan tie jipaadaan i. U tie yanbɔndaan nba ŋanm g buad mɔniɛɔg g biɛ kɔn yen lieb lanbona po i. Lann n baad yen nanŋ yen kunkɔna yen sugbiid yen maalbiid lieb po. 5Lann n baad yen mɔniɛɔg nba g mɔg juog yukpiena siign, yab nba g siɛl yaa mamɔni ji g be b ninŋ. B mali k b bu tɔgn Yendu sɔnu i g mɔgd. 6L kon tie mɔni i ; Yendu sɔnu tie mɔgm nba yab niib nba tuo k ban mɔg yal dagd b po. 7G dugn t g baal yen siɛl ŋanduna n ninŋ, t biɛ tan kan fid g kun yen siɛl mɔ. 8Lann, t gii mɔg jied yen tiɛd, tin tuo k l dagd t po. 9Ama yab nba kpaan k ban mɔgd nyan, banm n tu baa bignn n yen diɛɔg n. B tu ŋanm g buad manu lan yabd, manu nba g mɔg niimn. Lann n biid niib, g kuand’b tudm n yen juodfam n ninŋ. 10Yen mɔni, ligbuam n baad yen l tuonbiid kul. Siɛb tug b kua g cab ligli i, g buon b dindann, g maalm nba g mɔg dugl ji baal g gbie b pala n g ŋɔnŋ’b fala. 11Fin tie Yendu nil i, lɔgl l bona kul ne. Mɔnd gii suun yal ŋan g dagd, g tug a kua g cab Yendu, gii mɔg dindann, gii bua niib, gii mɔg juunn, a yam ń gii dinŋ. 12Kɔn kunkɔnn nba dagd dindann po. Mɔnd gii mɔg miɛl nba kan ban g gbenn, l po i g Yendu bo yiin’a, k fin mɔno biɛ bo tuo g maad k l tie mɔni sieda‑nba bonciɛnn nunŋ n. 13N maad’a Yendu nunŋ n, wano nba tien bonn kul miɛl, yen Yiesu Kristo nunŋ n, wano nba bo maad mamɔni Pɔns Pilat nunŋ n g niib gbad, 14i diɛ l mɔmaam, g siɛl yaa jɔgnd yen siɛl yaa jalgi ń daa be l n, saa yen youg nba k t Yonmdaan Yiesu Kristo tan bu legd. 15Yedŋanmdaan n tan bu te wan legd wan bo sen yaa youg. Wano kukua n mɔg bonn kul yaa paalu. Wano n tie batieb yaa Bad yen yonmdanm yaa Yonmdaan. 16Wano kukua n kan kpe, wano n be yinyiem nba yab n ninŋ, g nil kan fid g nagn. Sua g ban g la’ɔg, sua biɛ kan fid g la’ɔg. Wano n yen sel yen paaciɛnu youg kul. Amɛnn. 17Maad ŋanduna ne ninŋ mɔgda k ban daa mɔg jipaad, g biɛ daa dug b mɔgm po, l tie sɔnŋu i. K ban gii dug Yendu po, wano n tien’ti bona kul k l yab k tin fid gii be k l man’ti. 18Maad’b k ban gii tie ŋanm, g tuonŋana sunu ń gii tie b mɔgm. K b nui ń gii yaa, k b piin lieb paab yen papienn. 19Nnyan b kpaan mɔgm nba ŋan g biɛ bu wai, g guund b kua youg nba baad ne ninŋ i. Lann n bu te ban la miɛl yen mɔni. 20Timote, ŋanm gii kub ban guun’a yal nba. Lɔgl mafinfam, l g pugd dindann siɛl. G biɛ lɔgl mɔniɛɔg nba g niib g ban g tua k lann n tie banm. 21Siɛb tug b kua g cab lann i, g buon b dindann. Yendu ŋalbalg ń gii be yen’i.

will be added

X\