1 Yua tie nikpel ŋan daa fu yen’o, ŋan te’og cegli nyan a baa nyan, gii diɛ naasenm nyan a ninjanm nyan, 2 puonikpela nyan a naa‑nba nyan, puosipaanm nyan a niipuob nyan, siɛl yaa jɔgnd ń daa be i siign. 3 Ŋanm g nyuand pekɔa n ninŋ, yab nba tie pekɔa yen mɔni. 4 Pekual gii mɔg bid lann i kaa yaabuona, l tie k l bid lann i kaa l yaabuona ń cind g ŋɔn b ŋaag n ninŋ i, k b cɔln, g tod b danm, k b fala ń ŋmiɛn. Lann n ŋan Yendu nunŋ n ninŋ. 5 Yua tie pekual yen mɔni tie yua g mɔg sua k u nyuan u ninŋ, g tug u kua g cab Yendu, g jaand youg kul g miɛd’o. 6 Ama pekual nba mali ŋanduna manu po kukua, wano kpe o, g yen daa fo. 7 Ŋan baa ŋɔnŋ’b yal nba n nyan, g sua ń daa fid g jalg’b. 8 Nil gii g nyuan u naataani n ninŋ, mandg u ŋaag n yab, l daan bɔnd u kua i k u mɔg dindann. Yua g ban Kristo yal su’ug. 9 Pekual nba la bina piinluob kukua n dagd yen ŋan diɛn u sann g pugn pekɔlieb po. L pekual baa tie yua nba n kun jayend kua i, 10 g sun tuonŋana g niib ban. L tuonŋana tie k u ŋanm g ŋub u bid, g gaal saanm, g ŋuul Kristo‑yab titala, g tod niib nba be fala n ninŋ, g sun yal tenn g tie tuonŋana kul. 11 Ŋaa pekɔa nba tie puobid. G dugn jua maalm tan gii kua b yula n ninŋ yaa youg, b bu nyɔl Kristo i, g ji gii kpaan k ban kun jab. 12 Nnyan mɔ, b bu kpaan jalgi b kua po i, g dugn b g cɔln ban bo kpiɛ g puon Kristo yal nba. 13 Ban g mɔg siɛl yaa tuonn nyan, b ji baa waa g tuan ŋai i. L biɛ g tie k b waa fam mɔ, b waa yen mafinfam yen tuali i, g maad yal g la’b. 14 L po n te k n bua g pekɔa nba tie puobid ń guan g kun jab, g mal bid, g kub b ŋaag, g daa ŋaa k t ninnanda ń la sɔnu nba k b baa maad mabiid t po. 15 Pekɔsiɛb tud sɔnu g ŋuan Sitaan o. 16 Kristo‑yua ŋaag n gii mɔg pekɔa, wano n baa tod l pekɔa, k ban ji daa tie tugl Kristo‑yab nba tenn po, k ban fid g tod pekɔa nba g mɔg sua. 17 Nikpela nba ŋanm g kub Kristo‑yab tintaanu dagd yen ban la b tuonn nyuad taal munle ; mandg yab nba gbaa g muand Yendu maam g biɛ tund niib. 18 K l maa Yendu Kadaaɔg maad: « Naab nba tod’a k a pua dii, a kan lol u mɔb. » G biɛ maad: « L dagd g tuonsunn ń gaal u paaɔg. » 19 Nil gii baal yen maam a buol g jalg nikpel, ŋan daa tuo ; l gii g tie g niib banle bantaa i kaa taan g baal yen l maam. 20 Yab tu gii tien biid, ŋan fu yen’m niib kul nunŋ n, g lieb ń la g cegd. 21 N maad’a hal Yendu po, hal Yiesu Kristo po yen Yendu malɛg‑nba po, i cɔln min ŋɔn’a yal ne kul, g siɛl yaa paadu lann i kaa siɛl yaa lugdm ń daa be l n. 22 Daa tu jegl g maan nui sua po. Biɛ daa kuand a nuu sua biid n. Daa mɔg siɛl yaa jɔgnd. 23 Daa nyu nyum kua kaa. A tu gii tien ŋan nyu dimɔunŋ mɔ waam k lan ŋanm a tug n, g dugn a g ped yen yiɛlu. 24 Siɛb yaa biid tu tuod g nyuan k b daa g bu’b mɔno. Lieb mɔ, b tu bu’b yo, g fid g la b biid. 25 Tuonŋana mɔ tie nnyan i. L nyuan g g wuo baa waam. Yal nba wuo mɔ kan wai yen lan wuod.
