1 Timote 3

1Min bua n maad yal ne tie mɔni i: nil gii bua wan te Kristo‑yab liig yua, l tie tuonŋann i k u bua n sun. 2Kristo‑yab liig yua baa tie nil nba g mɔg ban bu jalg’o yal nba po. U baa mɔg puoyend kua i, g tie yua ceg, g tie bona kul g dagd, g ban niib gaalu, g gaan saanm. U baa tie yua bu fid gii tund niib i. 3U kan gii tie dinyuul lann i kaa filkpaandaan. U baa tie yua nba k u yam dinŋ i, yua g bua maam, g biɛ g tug u kua g cab ligli. 4U baa tie nil nba bu fid g kub u ŋaag niib i, k u bid cɔlm’o g cenŋ u maam. 5G dugn, nil nba kan fid g kub u ŋaag niib, u bu tien nle i g kub Yendu niib tintaanu i ? 6U kan gii tie nil nba te Kristo‑yua k l g wai. Lann i kaa u tan bu tug jipaad i g gbien u yul n g tan kua fala n, nyan Sitaan nyan. 7U baa tie nil nba g yab g ŋua Kristo mɔ pag’o, u binbem po, k ban tan daa fiɛg’o, wan biɛ daa baa Sitaan diɛɔg n mɔ. 8Kristo‑yab tintaanu todkab mɔ baa tie niib nba dagd yen cɔlunŋ u, yab g tie mɔi nle danm. B kan gii tie niib nba tug b kua g cab daam lann i kaa yab kpaan k ban di jod g mɔgd. 9B baa tie niib nba diɛ yen b pala kul dindann ŋasiil nba g Yendu ŋɔn Kristo‑yab, g g mɔg siɛl yaa maalbiid. 10B daa bu bign’m yo, b gii diid g sua k b g mɔg niib n bu jalg’b yal po, ban cab’b k ban te Kristo‑yab tintaanu todkab. 11Puob mɔ baa tie yab dagd yen cɔlunŋ u. B baa tie yab g mɔg sanjounŋ, g biɛ tie bona kul g dagd, g niib dug b po bonn kul n ninŋ. 12Kristo‑yab tintaanu todkua baa tie jua nba mɔg puoyend kua i, yua fid g kub u bid yen u ŋaag. 13Yab nba suun todkab tuonn k l ŋan, l tuonn bu don’m, g biɛ paan b pala g dugn dindann nba k b mɔg Yiesu Kristo n ninŋ po. 14N da kadaaɔg ne g bu te’a, g yen daan k l kan wai yen min baal a buol. 15Ama l gii tie k n g baal tonm, l bu te ŋan bann niib ń baa be nand Yendu niib tintaanu n ninŋ, lan tie Yendu nba fo n lugd niib nba k b tie u niib. Banm n tie mamɔni dieog fiɛgl yen l tuudu. 16Yen mɔni, sua kan fid g nai, dindann ŋasiil yab bonciɛnn: U te nifosaal i g baal, g Foŋanm tie’og mɔni, g malɛg‑nba la’ɔg, k b muand buoli kul wan tie yua, g ŋanduna niib tuo g gaal u maam, g Yendu don’o polu po k u gaal yudand.

will be added

X\