1 Tɛsaloniik Kristo-yab 4

1N naataani, i bo gaal tundl t buol k l ŋɔn’i yin baa be nand g Yendu pal man i po, k i kon biɛ l be nnyan, g nyaan t biɛ daa l miɛd’i g pugd’i Yonmdaan Yiesu sann po k yin mɔnd k i binbem ń gii ŋan g cie nnyan. 2I yen ban cegli nba k t daan tie’i k l nyiɛ t Yonmdaan Yiesu buol. 3Yendu n bua yal nba tie k yin gii be binbem nba ŋan g dagd u po i, g daa suun cuncontuona. 4L tie g yua kul ń fid g suol u kua, g mɔnd k u binbem ń gii ŋan g biɛ dagd yen cɔlunŋ. 5Sua ń daa tug u yul g kun niɛnŋ nba g ŋan nyan buolfanu yab nba g ban Yendu n suun nand nyan. 6Sua ń daa tie l bontitied g biil u naataanu pal lann i kaa g janm u lua. T bo tuod g maad’i no, g biɛ l ŋanm g maad’i g led led, k t Yonmdaan bu dad yab nba suun l tuonbuolu tubl. 7Yen mɔni, Yendu g yiin’ti k tin gii be yen jɔgnd kaa, u yiin’ti k tin gii be binbem nba ŋan g dagd u po i. 8L po n te g yua nba yie cegli nba ne, u g yie nisaal kaa, u yie Yendu nba tien’i u Foŋanm i. 9L ji g tie ban diɛn’i kadaaɔg kaa g ŋɔn yin baa bua lieb nand Kristo n ninŋ, g dugn Yendu ŋɔn yinm mɔno yin baa bua i lieb nand o. 10I biɛ l mɔg l buam n nyan Kristo‑yab kul nba be Maseduann diem n ninŋ po. G nyaan t biɛ yen l miɛd’i, yinm yab nba tie t naataani, k yin ŋanm g tien lan gii cie nnyan. 11Mɔnd man g laafiɛ ń gii be yinm yen i lieb siign, g sua kul ń gii nyuan u tuona n ninŋ gii suun g laad yal nba k u baa di, nyan tin yaan bo maad’i nand nyan. 12Nnyan i g yab g tie Kristo‑yab baa cɔlm’i. I biɛ ji kan gii tie tugl sua po. 13N naataani, t g bua k i gii be yanbɔnm n ninŋ yal nba nyuan kpienm po, k lan tan daa te k yin gii kal yen pabɔnn nyan yab nba g mɔg dindann nyan. 14Tin tuo g gaal g Yiesu kpe g biɛ guan g yied nyan, nnyan i k t tuo g gaal g Yendu tan bu yied yaa danm nba kpe g tie Kristo‑yab mɔ, g taan’m yen Yiesu. 15Tin bu maad’i maam nba ne tie Yonmdaan lanbona i: tinm nba tan baa be g mɔg miɛl Yonmdaan guanu youg, t tan kan fid g liid yab nba kpe. 16G dugn yaa youg nba g niɛlu tan bu tand g cab mɔb, niib bu gbad malɛg‑nba ciɛn niɛlu yen Yendu naatunn mɔni, l youg u g Yonmdaan mɔno bu nya polu po g jiid, yab nba bo kpe g tie Kristo‑yab ń cind g yied. 17L puol po, tinm nba bu tenn gii mɔg miɛl, Yendu bu tug’ti g nyan’ti, t kul ń taan yen’m tawalgband n ninŋ, g tuog Yonmdaan polu po. Nnyan i k t ji baa tund g be yen Yonmdaan. 18Lann, i paand man i lieb pala yen l maam.

will be added

X\