1 Tɛsaloniik Kristo-yab 2

1N naataani, yinm mɔno ban k t baalu i buol g te fam. 2I biɛ ban ban bo ŋɔn’ti fala g biɛ sugd’ti nand Filiip doug n. Niib bo fiil g yie t po i doug n mɔno, ama g Yendu yen paan t pala k t muand’i u Laabamann. 3Tin bo paand i pala k yin tuo maam nba nyan g tie faaɔg maam kaa, l biɛ g tie k t bo mɔg maalfanm kaa, lann i kaa k t bo kpaan k t sun ninfantuona kaa. 4Ama t muand’i l Laabamann nyan wano Yendu n bua nand nba i, g dugn u diid g sua k t dagd yenn i, k u cab’ti k t muand u Laabamann. L po n te k t muand g g kpaan k tin manŋ nisaal pal kaa, t kpaan k t manŋ Yendu pal i, g dugn wano ban t pala n ninŋ yal nba be. 5Yinm mɔno ban, g Yendu mɔ biɛ tie t sieda k t g ban g manŋ mɔb g bɔnd nil, k t maalm biɛ g tie k tin la ligli. 6T biɛ bo g kpaan niib pinpagd kaa. T bo g kpaan k yin pag’ti lann i kaa g nifanm ń pag’ti. 7Tin tie Kristo sundi nyan, t bo bu fid g ŋɔn t yikod g gaal todl i buol, g nyaan t bo kpii yam i g be yen’i, g kub’i nyan binaa n tu kub u bid nand nyan. 8Tin mɔg buam bonciɛnn nba i po n bo te k t muand’i Laabamann. L g tie lann kua kaa, t biɛ bo cegn k t yid t miɛl mɔno salg i po g dugn t bua’i bonciɛnn. 9N naataani, yinm mɔno tiɛn tin bo sun tuonn g cɔg nand, t bo suun yendu n yen nyiɛɔg k tin daa te tugl sua po, youg nba k t bo muand’i Yendu Laabamann nyan. 10Yinm yen Yendu tie t sieda‑nba, k t bo be binbem nba ŋan yen yinm Kristo‑yab, k t taasonma tuag mamɔni sɔnu, k t g mɔg ban bu jalg’ti yal po. 11Yinm mɔno yen ban k t bo be yen yua kul nyan bibaa n tu be yen u bid nand nyan i. 12T bo balm’i, g paan i pala g ŋɔn’i g led led yin baa be nand k lan dagd Yendu po, wano nba yiin’i k yin te u diem n yab g la u yudand. 13T biɛ tiend Yendu balg youg kul bonliel po mɔ: youg nba k i bo gbad Yendu Laabamann nba k t muand’i, i bo tuo g gaal yen mɔni k l tie Yendu maam. K l maam g nyiɛ nifosaal buol kaa. Yen mɔni, l maam nyiɛ Yendu buol i g suun yinm yab nba dug Yendu po pala n ninŋ. 14N naataani, yal nba bo baal Yendu tintaanu niib nba be Suude doug n ninŋ g dug Yiesu Kristo po nyan, lann n ji baal i mɔ. Suif‑nba n bo cagn’m yaa cicagm nba nyan, i mɔ yaa doug n yab cagn’i l cicagbuolu n nyan. 15Banm yab nba kpii t Yonmdaan Yiesu nyan, banm n bo kpii Yendu sogni‑nba. Banm n biɛ ŋɔn t mɔ fala. Yendu pal g man b po. B tie niib kul ninnanda i. 16B biel’ti k tin daa muand buolfanu yab Laabamann nba bu te k ban la fielu. Nnyan, ban bo suun b tuonbiid nba nyan, b ji l sun g pund buol. Ama Yendu mutuol ji tan juod g lag b po i. 17N naataani, t yad lieb l g luol waam, t g fid g cend lieb, ama k t yen mali i po. L po n te k t sun k t guan g la’i, g ji gbaa yen t paalu kul k lan fid. 18T daan bobn k tin lebd i buol, k min Pɔl mɔno bign taal munŋaa kul, ama g Sitaan n jiɛl t sɔnu k t g fid g baal. 19B lɛ yaa po i k t daan k t Yonmdaan gii guan yaa daal t baa mɔg pamann g biɛ la yudand u buol i ? L g tie yinm kaa aa ? 20Yen mɔni, i yaa po i k t mɔg yudand k t pala biɛ man.

will be added

X\