1 Piɛr 5

1Mɔla po n ji maad yen yab tie Kristo‑yab nikpela g be i siign ninŋ ne i. Min mɔno n tie Kristo‑yab nikpel i. N bo la yen n ninbinn Kristo n la fala nba kul. U gii guan yen u yudand, n mɔ ji baa be l yudand n i. Min bua n maad’i yal nba g paan i pala n ne: 2Pelol nba g Yendu tug g kubn’i, ŋanm man gii kub l pelol nyan pekpaali nyan. I guu man l pelol k lan gii tie yen i yanbuam i. Yendu bua nnyan i. Daa ŋaa man lan gii tie yen niinn, g biɛ daa tie k i kpaan ligli kaa, ama lan gii tie k i yam mɔno n bua l tuonn. 3Daa kpaan man k i gii kub yen paalu yab nba g Yendu tug g kubn’i. Ama mɔnd man k ban la i binbeŋanu n g bann ban baa be nand. 4G daal nba g pekpaali Bad tan bu legd, i bu gaal nyuad nba ŋɔnŋ k i mɔg yudand, l nyuad ŋanu po kan ban g juab. 5K yinm nipaaɔnŋ mɔ, daa kand man nikpela mɔi po, i kul ń gii jiind i kua yinm yen i lieb binbenu n ninŋ, g dugn l diɛn Yendu Kadaaɔg n g maad: « Yendu kɔn yen jipaadanm i, g yen nyuan yab jiind b kua yen nunmanŋ. » 6Lann, i jiind man i kua Yendu paaciɛnudaan buol. Nnyan i, k u tan bu don’i youg nba k u bo sen. 7Tug man yal nba kul tie i pakɔnn g kubn u nui n ninŋ, g dugn wano n kub’i. 8I ceg man i kua po, gii guu i kua, g dugn i ninnand Sitaan lin nyan yanbɔl nba ŋuund nyan i, g kpaan nil nba k u bu biɛn’o. 9Ŋanm man gii dug Yendu po, g daa ŋaa wan paad’i. I yen ban k i ninjanm Kristo‑yab nba yad g be ŋanduna n kaannaa kul mɔ laad l fala i. 10Ama i gii cagn nnyan k l yann waam, Yendu nba bua’i bonciɛnn, bu guan g ŋanm i binbenu, g paan i pala, g pugn’i paalu g biɛ te k i kan gii mɔg begnu. Wano n yiin’i k i mɔ ń gaal yudand nba g mɔg gbennu Kristo n ninŋ. 11Paaciɛnu tie u yal i, youg ń tuu youg. Amɛnn. 12Silfɛn nba tie t ninja Kristo‑yua k n pal paa u po n tod’n k n da kadaaɔg ne g tien’i, g bua k min paan i pala g biɛ ŋanm g ŋɔn’i yal tie Yendu ŋalbalg yen mɔni. Ŋanm man gii diɛ l ŋalbalg k l paa. 13Kristo tintaanu niib nba be Babilɔnn, g Yendu bo lugd’b nyan yinm nyan fuond’i. N big Mark mɔ fuond’i. 14I fuond man i lieb gii lɔnŋ’b yen naataann. Yinm yab nba tie Kristo‑yab kul, Yendu ń te k i yam ń gii dua.

will be added

X\