1 Piɛr 4

1Kristo n tuo g gaal fala u gbannand n ninŋ nyan, lann, i mɔ ń paan man i pala gii mɔg l maalm nnyan, k l maa yua nba tuo g gaal fala u gbannand n ninŋ, wano yie k u ji kan gii suun tuonbiid n nyan. 2Nnyan, lan cil mɔlane gii saa, dana nba tenn k u baa mɔg miɛl g be tinŋ po ne, u ji kan gii ŋua nifosaal niɛnbiid kaa, ama u baa tie yal tie Yendu buam i. 3Mɔni, siɛnyoug, i bo suun nyan yab g ban Yendu n bua ban gii suun nand nyan hal k l wai. I bo be binbebiiug n ninŋ, g suun cuncontuona, g tie dinyuula, g taand lieb g di g nyu g buog, g suun tuona nba mɔg fai g biɛ pug yennaankad, g Yendu Mɔmaam yen g cab. 4G mɔlane, yab g ban Yendu n la k i ji g ŋua’b k i suun l tuonbiid nyan, k l lid’b k b ji sugd’i. 5Ama b tan bu ŋɔn Yendu b tuonbiid ŋann kul, wano nba bobn g gbenn g bu bu fuodb yen kpienm. 6Lann n tien k b bo muand Laabamann yab nba bo kpe mɔ. B bo jiɛl b buud nyan ban bo sun b tuona k l bual nand nyan i. L bo tien nyan ban tu jiɛl nifosaal kul buud nand nyan i. Ama k b yen muand’b Laabamann g Foŋanm po, ban mɔ ń fid gii fo nyan Yendu n fo nand nyan. 7Ŋanduna juodu ji g fag. I be man binbem nba dagd, gii ceg i kua po, g fid gii jaand. 8Bonn kul n ninŋ, yal nba ŋanm g tie bonmɔnn canyiin tie k yin gii bua i lieb i, g dugn buam piind biid bonciɛnn. 9I gaan man i lieb i ŋai n ninŋ g daa mɔg siɛl yaa bunbulmi. 10I kul n gaal paab buolu buolu nba Yendu buol nyan, yua kul ń gii ban u paab kubnu, g tug l paab gii suun u lieb po. 11Yua nba k u paab tie k wan tu gaal maam g maad, l daan ń tu maad Yendu maam, yua nba suun g tod u lieb mɔ, wan gii suun l tuonn yen paalu nba g Yendu tie’og, g Yiesu Kristo po Yendu ń gaal yudand bonn kul n ninŋ ; wano nba g yudand yen paalu tie u yal youg ń tuu youg. Amɛnn. 12N dɔnn‑nba, i be muupienu n ninŋ i. Yen daa ŋaa man lan lid’i nyan l tie bonsaann nyan kaa. L tie bignn i g baal’i. 13Ama ŋaa man i pal ń gii man k i mɔ taan g la fala yen Kristo ; nnyan i, k i tan baa be pamanciɛnn n ninŋ youg nba k u tan bu legd yen u yudand. 14B gii sugd’i Kristo sann po, pamann tie i yal i, g dugn Yendu Foŋanm nba mɔg yudand g cie bonn kul be i ninŋ. 15I ninŋ ne, baa sua ń daa be fala n k l tie k u kpii nil, lann i kaa k u jan, lann i kaa k u tien siɛl yaa bonbiil, lann i kaa k u kua nil maam n ninŋ. 16Ama l gii tie g nil laad fala g dugn u tie Kristo‑yua po, l daan ń daa jie fai. Wan gii tiend Yendu balg yen niib n yi’ug Kristo‑yua. 17Youg ji baal n nyan g Yendu bu bu niib buud. U bu cind g bu yab nba tie u niib i. L gii tie k u cind yen tinm i, yab nba g tuo g gaal u Laabamann, banm ji bu juod nle i ? 18Nnyan i k l diɛn Yendu Kadaaɔg n g maad: « L gii tie k l tu paa yo, nimɔn ń tan la fielu, yua g jie Yendu yen yua tie biiddaan ji bu tien nle i g la fielu i ? » 19Lann yab nba laad fala k l tie Yendu buam po, ban gii suun tuonŋana, g tug b miɛl g cab b Tagtua nba cɔln u puoni.

will be added

X\