1 Piɛr 3

1Yinm puob, i mɔ ń daa kand i salb mɔi po. Nnyan, siɛb gii be b ninŋ g g gaal Yendu maam, ban la yin be nand g ji gii dug Yendu po, g sua yen g maad’b siɛl, 2g dugn b bu la i binbem k l ŋan g dagd g biɛ mɔg cɔlunŋ. 3Puob, daa kpaan man i gbannand po ŋanu kaa: lan tie yuounŋ yupiɛnu yen laani nba k b tag yen wula liɛnu yen ligciɛnŋ tiɛliɛnu. 4Ama i kpaan man i pal n ninŋ ŋanu: lan tie k i gii mɔg yam g biɛ gii tie suoo. L ŋanu n kan ban g biil, g Yendu pal kɔn l po bonciɛnn. 5Siɛnyoug puob nba bo cibn g ŋua Yendu g dug u po, b bo ŋami b kua l yaa ŋanmu i, g g kand b salb mɔi po. 6Nnyan i g Sara bo cɔln Abraham g yi’ug k u yonmdaan. Mɔlane i ji tie u bipuobi i, l gii tie k i tuona ŋan k i g ŋaan g siɛl ŋmad i yam. 7K yinm nba mɔ tie puodanm, ŋanm man gii kub i puob yen yanfuom, gii ban g jua yen puo paalu g ja. I cɔln’m man g dugn Yendu bu pi yinm yen banm kul i miɛl. I tie man nnyan g siɛl ń daa fid g pien i jaandi. 8Min bu juod g maad yal n ne: i mɔg man maalyenm g biɛ gii joi i lieb man. I bua man i lieb gii tie man ŋanm, g biɛ gii jiind man i kua. 9Daa tu ŋmiɛnd man tonu yab nba tien’i tonu, biɛ daa tu sugl g ŋmiɛn man yab sugd’i. Ama tu gaal’b man mɔgaalŋani g dugn Yendu bo yiin’i k i gii tie nnyan i g fid g la u yedŋanm. 10G dugn l diɛn Yendu Kadaaɔg n g maad: « Yua nba bua wan gbad manu u binbem n ninŋ g biɛ gii be pamann n l tie k wan suol u mɔb i g daa maad baa mabiiug, g biɛ daa fa faaɔg. 11L tie k wan san g fagd yen tuonbiid, gii suun tuonŋana, gii kpaan yen u pal kul k wano yen u lieb ń gii be k l man. 12G dugn Yonmdaan nunŋ tuol nimɔnm po i, k u tuba gbien g cenŋ b jaandi. Ama g yen kɔn yen yab tie bonbiil. » 13I pal gii kɔn k i gii suun tuonŋana, ŋmaa n bu tien’i bonbiiug u ? 14Baa l gii tie k i bu la fala g dugn i suun tuonŋana po, pamann baa tie i yal i. Daa jie man nifosaal baa waam nne, siɛl ń biɛ daa ŋmad i yam. 15Ama i cɔln man Kristo yen i pal kul, wano n tie i Yonmdaan. Bobn man gii guu youg kul k i ŋmiɛn nil nba kul bual’i buali i dindann po. 16G nyaan tu jiin man b buali yen cɔlunŋ g daa gaan siɛl yaa jad, k i pal n ninŋ yin daa jalg i kua baa siɛl po. Nnyan i, g fai bu suol yab nba maad mabiid i binbeŋanu po, binbem nba k i be g dugn yin yaan tie Kristo‑yab nyan po. 17Yen mɔni l gii tie Yendu buam n i, k i laad fala i ŋanm po, lann n su yen yin gii laad fala g dugn i tuonbiid po. 18Kristo mɔno, wano nba tie nimɔn, u kpe nibiid po k wan gad yen’i Yendu buol i. U kpe taal yenm kua i niib biid po. B bo kpii’ug, ama g Foŋanm te k u yied g mɔg miɛl. 19L Foŋanm n biɛ bo te k u jiid tinkpiiug n, g daan muand kpienm nba bo be dansalg u Laabamann. 20Banm n tie niib nba bo yie Yendu siɛnyoug, youg nba g Yendu bo nyii u pal, g guu g Nowe ń kpaa u ŋadunŋ g gbenn. L ŋadunŋ n ninŋ i, g niib banniin kukua bo kua g la miɛl nyum po. 21L nyum bo tie nyunwulu ninnaɔnŋ u. L nyunwulu n ji fe i mɔ mɔlane. L nyunwulu g tie g nil ń wul g nyan u gbannand po jɔgnd kaa, ama l tie g nil ń tug u kua g cab Yendu yen papienn i. L n ninŋ i, k i laad fielu Yiesu Kristo yiedu po. 22Wano n duo polu po g ji kal Yendu jendu, g mɔg nuu malɛg‑nba po yen polu po yikodanm yen paaludanm kul po.

will be added

X\