1 L yaa po, ŋaa man yal nba kul l tie biɛdm yen bɔndl yen ŋalaaci yen nanŋ yen sanjounŋ. 2 I bua man Yendu maam nyan sanpandi n bua biim nand nyan. Yendu maam n tie biim paaa. Lann n bu te k i Yendu ŋuanu ń gii saa liig, yin la fielu. 3 Yendu Kadaaɔg diɛn g maad lann n nyan: « Yinm mɔno la g Yonmdaan n sun tuona nba i po ŋan. » 4 I nagd man Yonmdaan buol. Wano n tie tann nba fo g niib bo yie g lu, ama g Yendu yen bo lugd l tann g dugn l tie bonbuakal i paaa u po. 5 I mɔ n yaan tie tana nba fo nyan, i nagd man u buol k wan tug’i g maa Foŋanm ŋaag. Nnyan i k i baa tie salg-yidkab nba g Yendu lugd g taan k ban gii yid’o salg nyan Foŋanm n bual nand nyan, g Yendu bu tuo l salg g dugn Yiesu Kristo po. 6 G dugn l diɛn Yendu Kadaaɔg n g maad: « Diid, n lugd tann n nyan k l tie bonbuakal paaa g tien’o tanjal, g bil Siyɔn doug n ninŋ, yua nba dug l tann po, l daan kan ban g fiɛg. » 7 Lann, l tann tie bonbuakal i paaa yinm yab nba dug u po, ama yab nba g dug u po nuan l g tie nnyan kaa b po. L diɛn Yendu Kadaaɔg n g maad: « Tann nba g tanmaala bo yie g lu, l tann n tan guan g te dieog fiɛgl tanjal. » 8 L biɛ diɛn g maad: « L baa tie tann nba g niib baa tuud i, tann nba baa guul niib. » B tuud l tann g dugn b yie k b kan gii dug Yendu maam po. Wan bo sen k l baa tie’b nand nba n nyan. 9 Ama yinm nuan, i tie buolu nba g Yendu lugd i, g taan g tie wano Yendu Badciɛn salg-yidkab, g tie buolu nba tug u munn kul g cab Yendu, g biɛ tie Yendu mɔno yaa niib. U lugd’i k i muand g ŋɔn u tuonŋana nba k u sun i. G yiin’i k yin nya bunbɔnn n ninŋ g kua u yinyiem nba g mɔg liel n ninŋ. 10 Siɛnyoug, i bo g tie Yendu buolu kaa, ama mɔlane i ji tie u buolu i. Siɛnyoug, Yendu bo g jie’i ninbaaɔg, ama mɔlane u ji jie’i ninbaaɔg. 11 N dɔnn‑nba, i tie nyan sɔnpenda yen saanm nyan i tinŋ ne po. L po n te k n maad’i, k i suol i kua yen yin tu juab i kua g cab niɛnŋ nba k i pala n ninŋ k l yen mabnd’i nyan. 12 I taan g be yen yab g ban Yendu i, i mɔg man tɔgu nba ŋan. Nnyan, baa b l gii jalg’i g tua k i tie nibiid mɔno, b tan bu la i tuonŋana i g ji gii dond Yendu, daal nba k u tan bu baal. 13 T Yonmdaan po, yin daa kand yikodanm mɔi po: lan tie Rom badciɛn nba mɔg nuu nil kul po 14 yen batieb nba k u sun’m k ban gii diɛl bibiɛdi tuba, g yen gii pag yab nba suun tuonŋana. 15 G dugn Yendu n bua yal tie k i tuonŋana nba k i suun nyan ń te g yanbɔndanm yen yukpiena ń daa fid g maad siɛl i. 16 I tie niib nba yal b kua i, yen daa mali man k l yal‑n‑kua cab’i k yin gii suun tuonbiid kaa. I tie Yendu tuonsunna i. Lann, i suun man wan bua nand. 17 I cɔln man niib kul, gii bua man i lieb Kristo‑yab, gii jie Yendu, gii cɔln Rom badciɛn. 18 Yinm yab nba tie tuonsunna, daa kand man i canbaa‑nba mɔi po, ŋanm man gii cɔln’m man. Daa cɔln man i canbaa‑nba nba tie nimɔnm g biɛ gbiɛ niimn kukua kaa, ama i cɔln man yab tie tondanm mɔ. 19 G dugn b gii ŋɔnŋ’a fala k a yen g biil siɛl, k a juun g dugn Yendu po, l tie bonŋann i. 20 G nyaan, l gii tie k a biil bonn, k b puag’a k a juun g gaal l puad, n liɛ l nyuad i ? Ama l gii tie ŋanm nba k a tie po i, k a juun g gaal fala, l baa tie bonŋann i Yendu nunŋ n ninŋ. 21 Yendu bo yiin’i k yin sun lann i. Yen mɔni Yiesu mɔno bo la fala i po. Wan la fala buolu nba tie binbiug u i po, k i mɔ ń fid g ŋmaa u taabuod n ninŋ. 22 U g tien biid g la, sua mɔ biɛ g ban g gbad k u fa faaɔg. 23 Ban bo sugd’o, u bo g sugl g ŋmiɛn sua. Ban biɛ bo tan cagn’o, u bo g gaan jad, ama u bo tu tug u kua g cab Yendu i, wano nba tie Mɔnkundaan. 24 Dapunpɔnn po i g Yiesu mɔno tuo g gaal t biid, g la fala, g biid ń ji daa mɔg paalu t po, ama k tin gii be binbem nba ŋan g dagd Yendu po. Wan gaal yiɛd nba u gbannand po nyan n tie i laafiɛ. 25 Mɔni, i bo tie nyan pei nba bund g waa g g ban ban saa naan i, ama mɔlane i ji guan i kpaatua nba guu’i nyan buol.
